Ke Aloha Aina, Volume VIII, Number 40, 4 October 1902 — Page 2

KE ALOHA AINA, POANO, OKATOBA 4, 1902.

 

AOLE NA WILIKOKI KEIA MAU KOMISINA

            Maloko o ka nupepa Avalataisa o ka Poakahi nei, ua hoike moakaka ae ka Lunahoomalu o ma Komisina America, Senatoa Mitchell aole malalo o ka Elele Wilikoki mau hooikaika ana i hoouna ia mai ai lakou i Hawaii nei. Aka, mamuli no ia o kekahi mau bila i waiho ia aku ai imua o ka Ahaolelo i nele me na ike a me na hooiaio kupono ana aku i i ka Ahaolelo Nui, a eia iho na olelo a Senatoa Mitchell:

            Ma kela kau hooilo i hala he nui na bila imua o makou, a i ko lakou wa i lawe ia mai ai e hoolohe ua nele makou me na ihe kupono ana no ko lakou mau pilikia. Ma kekahi halawai ua ike hou ia keia hemahema nui, nolaila, ua hoopuka ae o Senatoa Foraker, ka Lunahoomalu o ke Komite he mea pono e holo mai kekahi mea i anei e imi pono ai. Ua noi mai o Senatoa Foraker na'u e onou aku i keia kumuhana a ua waiho aku au iloko o ko'u komite a ua apono ia keia manao. Alaila, ua hookomo ia aku la iloko o ke komite o na Lilo Huikau, a ua loaa hou no ia'u ke kakoo ia ana ma o ka hoike i loaa mai a Senatoa Jones o Nevada mai, o ka hopena ua holo iho la maloko o ke Senate. Ua noi ia mai au e lawe i na hana o keia komite a ua ae aku au.

            Ma keia ae la aole he kahua o na olelo i hana ia e ka Elele Wilikoki nana i hoouna mai i keia mau komisina i anei.

            Aole au i kamailio me Wilikoki no na mea e pili ana i ka imi pono ana i na kulana maanei. Aole no hoi oia i hoopuka mai i kekahi manao oia ano. Mai na leo kuka maloko o ke komite i puka ae ia kela mau olelo a loaa ia makou na hoike oiaio, aka aole nae e hiki ia'u ke olelo ae aole o Wilikoki i kamailio ia manao i kahi poe e aku, no'u nei aole mamua aku o ka noonoo ia @n@ o keia kumuhana a i ole i, kona wa e noonooia ana, i kamailio mai ai oia no keia mau hoolala ana. O ka mea oiaio na'u i hana i keia olelo hooholo a ua ike au aole ana wahi hana me ia mea ma na ano a pau.

            Owai la o keia mau mea elua ka pololei o ka Elele paha a i ole o keia Komisina paha. Ke hoike nei o Wilikoki ma na haiolelo ana ana a pau nana keia mau komisina i hooikaika e hoouna ia mai i Hawaii nei. Aka, ma keia hoike ana ae la nae a Senatoa Mitchell, e keehi ana oia i na olelo a ka Elele Wilikoki.

            Ua kokoke e pau na la o ka hoopaa inoa.

 

NA MOHO A NA DEMOKALAKA

            Ma ka halawai ulumahiehie a na Demokalaka i malama ia ae maloko o ko lakou hale halawai ma Waverley Hall, i ka po Poakahi nei, ua lawe ia mai la ka noonoo ana no ka hoopuka ana o na Demokalaka i paa balota na lakou a me ka ole. Ma ka noonoo akahele ana o na mea a pau ua hooholo lokahi ia e lawe mai no na Demokalaka i paa balota piha na lakou mai ke Elele, na Senatoa a hoea loa aku i na Lunamakaainana. Ma ka hooholo ana a ka hapanui ua koho ia he komite o umi lala no ka Wae ana i na inoa kupono na na Demokalaka e hookomo aku ai iloko o keia kau koho balota e hiki mai ana.

            Ua noho keia komite maloko o kekahi o na keena mehameha, a i ko lakou puka ana mai, ua wa iho mai la ke komite i ka lakou hoike piha penei:

            No ka Elele -- R W Wilikoki.

            Na Senatoa -- E Caypless, J O Carter a me ke Keikialii Kawananakoa

            Na Lunamakaainana o ka Apana Eha-- C J McCarthy, J D Holt, H A Juen, J Camara, J F Bowler a me Jos. Aea.

            Na Lunamakaainana o ka Apana Elima -- Frank Harvey, Wm. Mossman, D M Kupihea, S K Oili, M K Kou a me Damiano.

            Mamua o ka apono ia ana o ka hoike a ke komite na hanaia kekahi mau hoololi no kekahi mau inoa i wai ia, a i ka pau ana ua ike ia iho la keia mau inoa malalo iho nei ma ke ano o lakou na moho a ka aoao Demokalaka no keia koho e hookokoke mai nei, penei:

            Elele R W Wilikoki

            Na Senatoa -- Keikialii Kawananakoa, E Caypless me Makainai

            Na Lunamakaainana o ka Apana Koho Eha -- C J McCarthy, J D Holt, @ A Juen, G Wilder, J Aea a me D Kaona.

            Na Lunamakaainana o ka Apana Koho Elima aohe mau hoololi i hanaia. Ma ka nana ana ino i ka wae ana a ka aoao Demokalaka i ka lakou mau moho ua hana ia no ia me ke kaulike, ma ka lawe ana mai he hapanui loa o na moho a ka aoao Home Rule i wai iho nei.

 

NA MOHO A KA AOAO ALOHA AINA DEMOKALAKA

            Ma ka noonoo ana a na lala o ke Komite Hooko o ka aoao kala aina Aloha Aina Demokalaka o ka mokupuni o Maui i keia la 27 o Sept 1902.

            Ke kukala aku nei lakou imua o ka lehulehu na wae ia ae na mo@ o ka aoao Aloha Aina Demokalaka, he poe puuwai aloha oiaio.

            Senatoa -- J.B. Richardson.

            Na Lunamakaainana -- W.H. Cornwell, Lahaina; Thos Clark, Wailuku; Adam Forty, Makawao; W.S. Maule, Waihee; G.P. Kanimakaole Hana me Paia; Naki, Molokai.

            O keia na inoa ua apono ia ua koho ia e kea poe maluna ae, mahope iho o ka koaa ana mai o na lono, aole ae o ka Aha Hooko o ka aoao Home Rule e hoohui. Nolaila, eia mai la ke Aloha Aina Demokalaka ke oni aku la hookahi no Elele, ka mea hanohano R. W. Wilikoki.

            Kakanolelo Nui o ka aoao Aloha Aina Demokalaka o ka mokupuni o Maui, Molokai a me Lanai.

            D. Mahuka

 

HE MAHALO

 

            Ke haawi aku nei au i ko'u mahalo i ka poe i noi mai i ko'u inoa i moho Senatoa no keia kau. Mamuli o ko'u paa i ka'u wahi hana ponoi, nolaila, ke hoike aku nei au ua haawi aku au i ko'u kulana ia Adam Forty, no ka Apana o Makawao. Me ka iini pu iloko o'u e lokahi a hoouna i na poe kupono.

            Aloha nui, Ben Lyons

            Wailuku, Maui.

 

HALAWAI ME KA ULIA POINO.

            Ma ka auinala Poakahi nei, ua halawai iho la me ka ulia poino o William Rose, ke keikane ewalu makahiki a Gus Rose, o ke Keena Puuku makai o ka hale hoahu uka ua o ka Uniona Feed, maloko o ke keena o na mekina e hoohana ia ana no ka hapai ana i na pena mauu a me na eke mea ai a ka lio. Iaia e paani ana malaila ua komo aku ke kahi o kona mau lima iloko o ka mekina a palahe l@l@.

            He maa mau i na kamalii ka hele ana ma kahi o keia mau mekini e niniu ana, iloko o ko lakou huhu ia e na poe hana malaila, ma ka Poa kahi nei ua hoea aku la keia keiki a i ka ike ana mai o ka wiliki ua kii mai la oia a lawe aku la iaia iwaho, aka, ua komo hou aku la no nae ke keiki me ka ike ole o ka wiliki a lawelawe ma kahi o na mekini. Ua hoohik@ele ia ka wiliki i ka lohe ana i kekahi leo uwe, a i kona huli ana ae ua paa ka lima o ke keiki ilo ko o ka huila. Ua hoopaa ko keia na mekini, a i ka hemo ana mai o ka lima ua ikeia ua palahe a hiki i ka poohiwi. Ua lawe koke ia aku ka mea poino no ka haukipila, a mala ila i oki ia ai kona lala poino. Aole he mau hoahewa a na makua i hana aku no ka wiliki. He a'o ana mai no nae keia i na makua mea keiki apau, mai hookuu wale i ka oukou mau keiki e hele ma na wahi poino e like ae la me keia i ikeia iho la.

 

HULI HOI NA KOMISINA

            Ma ka mokuahi Siera i kipa mai la i ka Poalua nei, ma ke alahele no Kapalakiko, i kau aku aku ai na Senatoa Mitchell, Burton a me Foster, no komisina a ke aupuni o Amerika Huipuia i hoouna mai nei po ka huli pono ana i ko Hawaii @@mau makemake a me kona m@ pilikia. He mea oiaio, aohe mau komisina i hiki mai i Hawaii e like la me keia mau komisina ka lawa piha ma ka ike a me ka lohe ana i na makemake o na kupa Amerika e noho nei ma keia Teritori. Ua hoi pu aku lakou me ka lakou mau hoike piha no ka waiho ana aku imua o ka Ahaolelo ke noho mai.

 

UA HOOKAAWALE IA MAI KONA KEENA AKU.

            Ma ke kauoha a@ Luna Auhau Pratt ua hookaawale ia o Amana ke Kakauolelo Pake o ke keena auhau mai ia keena aku. O ke kumu o kona hookaawale ia ana malalo no ia o ka hoike ana a kekahi mau Pake ua uku laua i ko laua mau auhau ia Amana, aka, aole nae i paa ia mau hookaa ana iloko o kaua buke. Ua hoole loa o Amana, aole he dala i uku ia aku iaia, a o na pake na laua keia mau olelo aole he palapala hookaa a laua i waiho pu mai no ka hooiaio ana i ka laua mau olelo. Nolaila, aole he mau ahewa i kau ia aku maluna o Amana, aka, ke huli ia nei no nae kana mau buke.

 

CAMARA & CO.,

Waina, Bia me na Waiona

Kihi o Alanui Alakea me Moiwahine.

WAIN CLARET 50c...1 Galani

WAINA SWEETS 75c... 1 Galani

PRIMR BIA $2.00 o ke... doz qts

 

            Ua loaa mai ia makou he heluna nui o na waiona like ole Waiona, Bia, Gini, Wisike ame Barani a ke kuai ia nei me ka emi loa.

 

            Eia maanei o W. Rice, kekahi o na Hawaii i noho loihi me Frank Brown. Nana e hoikeike aku ia oukou i keia mau waiwai.

 

OLELO HOOLAHA.

            E ike mai a na kanaka apau. Owau of Samuela Kauhane, Luna nui o na Aina o ka Hui hanai holo holona e waiho ala ma Kapua, S. Kona, Hawaii. Eia ma ko'u lima he elua mau lio komohewa, he hookahi lio kane ahinahina hao kuni O, uha hope akau, hookela lio kane keokeo, aole maopopo ka hao kuni. O ka mea nooa keia mau lio i hoike ia ae la, e kii koke mai iloko o na la umikumamalima mai keia la aku, me ka uku pu mai i na lilo o keia hoolaha a me ka uku aina. Ina e hala ka manawa i hoike ia ae la maluna e lilo no keia mau lio i ka hui.

            Owau iho me ka oiaio, SAM KAUHANE. Sepatemaba 14, 1902.