Ke Aloha Aina, Volume VIII, Number 41, 11 October 1902 — Page 7

KE ALOHA AINA

KE ALOHA AINA, POAONO, OKATOBA 11, 1902.

 

MOOLELO HOONI PUUWAI NO KE

KAKELA LANAFODA

Ka Ipuka o ke Kuewa me ka Aea.

 Ka Pua Lilia Ahiu o Sanadela.

 

MOKUNA XXVI.

Ka Moi Kuewa o Na Pelekane — Ka Haku Opio Aea o Lanafoda.

 

            O na saluta aloha ana o ka hooko oihana, oia ka na elele i haawi like ae ai ma ke kani ana o ko lakou mau lima akau iluna me na lima hema e paa ana i ke kuau o ka lakou mau pahikaua, e hooia ana i ka oiaio o ka hoohiki a lakou i hoopaa ai, alaila, i ka uhi ana mai o ka po aia na poe elele ala ua hala aku la no loko o ke kulanakauhale o Ladana, no ka hooko ana i ka hanohano o ke kauoha i haawiia ia lakou.

            Mahope iho o ka hala ana o elima la, ua makaukau a liuliu ae la ka Haku Opio no kana huakai iloko o Ladana, a ma ke ahiahi poeleele o ka eono o na la aia oia ua haalele iho la ia Semafila maluna o kona lio punahele ke “Keikialii” malalo o ka aahu huna o ke kanaka hahai holoholona. O na mile mamao o ke kowa mawaena o Semafila a me kulakauhale o Ladana, aole ia he mea nana e hoohakalia i ka mama holo o ka lio huapala, a he mau minute koe a koelo ae ka hora 12 o ke aumoe, aia ke Kuewa o Lanafoda ua hoea aku no ke eheu hema o ke kulanakauhale kahi o kekahi o na mahele o kona puali e hoolulu ana, a iloko o ka hamau a me ka malie, aia ka leo haawi kauoha ua holo awiwi ae la iloko o ka puali no ka pii awiwi ana aku no ka eheu komohana a hui me na mahele o ka puali e hoolulu ana malaila, a ma ia kahuakaua aina lakou e hoouka mai ai i ka lakou puupuu mau loa o ke kukala kaua hoihoi nohoalii, a me ke au hooponopono honoalii o ka Moi Kale Kuaka i pakaha wale ia.

            O ka hora ekolu o ka wanaao oia ka minute a me ke sekona hope loa i hui ae ai keia mau mahele elua, mahope iho o ka maki ana o ka @a helu mua me ka hakalia a ulolohi. Alaila iloko o na huaolelo moakaka aia ka leo haawi kauoha o ke alakai hiena a Kuewa hoi o Lanafoda ua poha ae me keia mau olelo:

            E na koa o ke aloha aina, na liona wiwoole o ke au monakia; e pii aku imua me ka awiwi a wehe i ka oukou poka mua o ke kukala kaua i ka minute mua loa a ke ahi e lalapa ae ai, ae hoomanao me na manaolana mau o ka poina ole o keia kahuakaua a kako e pii aku ai, hke kauakaua ia e hoihoi hope mai ana i na degere welweli o na maka hiki i kaahope ae nei. Ano e na koa!  Imua maki!

            E like me ka hikiwawe o ka holo ana ae o na aheahe makani e lawe ana maluna o ko lakou mau eheu i na mamalaolelo o kela leo haawi kauoha, aia na koa o ke koa opio ua pii aku la malalo o ke alakai ana a na mahele pu kaa me ka lakou mau batari e halulu hele aku ana mahope, a i ka wa i loaa hou aku ai o ke kauoha no ke ku ana a makaukau kela a me keia mahele me kona kulana, ua haawi pu ia aku me ke kauoha e kiina pukuniahi.

            He olapa ana o ke ahi, he bang ana o ka nakolokolo me ka ikaika nui e hoonaueae ia ai ke kulanakauhale o Ladana, aia he haneri waha pukuniahi ua luai aku la i ka lakou puupuu hao oolea a hoouna me ka ikaika nui maluna o ke kahua hoomoana o na kipi e noho ana me ka nanea nui me ka maopopo mua ole no keia poino poipu i uhi iho la maluna o lakou, a ia lakou iloko o ke pihoihoi a me ka pioo nui, aia ka waha o na pukuniahi a na koa aloha aina ke luai a ke hoouna mau mai la i ka lakou mau puupuu oolea e paluku ana i ke poo, na lae, a me na wahi no apau o ka enemi, a o ka hopena ua auhee aku lakou “kipi” mai luna aku o kela kahua aina a lakou i paa ai me ka haaheo i na la i hala ae la, a hoopakele ia lakou iho maloko o ke kuea e hoopuni ana i ka halealii kahi o kekahi mahele o ko lakou puali e kiai a e hoomoana ana. Alaila, o ke kukala kaua mua loa keia nana i hoonele i na kipi me ka hanohano o ka loaa ole ana ia lakou he kulana kipoka pale.

            E like me ka mama hoopakele o ko lakou mau mawae e ahai ala no ko lakou mau ola, pela no ka eleu awiwi o na koa aloha alii e pii aku la me ko lakou ikaika piha o ka makaukau, iloko o ko lakou mau leo huro o ka hauoli no ka lanakila mua a lakou i papahi ae la i ka hanohano, a ma ko lakou lehelehe e hosana ia ana kela mau huaolelo. Ola ka Moi i ke Akua — E ola loihi ka Haku o Lanafoda.

            Ua puiwa a puoho ae ke kulanakauhale iloko o ka weliweli nui i keia mau minute haalulu o ke kukala kaua e wehe hamama ia ana e ka leo nakolokolo o na pukuniahi, a i ka wa o keia mau leo huro hauoli e hosana ana — e ola ka moi i ke akua, e wawalo mai ana a puni na kihi eha o ke kulanakauhale, alaila, ike a hoomaopopo iho la lakou ua komo mai na koa aupuni me ko lakou alakai wiwo ole a hoouka i ka lakou puupuu hope loa no ka pono o ko lakou moi a me ka hae kahiko. O na kipi e noho uhauhaa e lealea ana i na pomaikai a lakou i hauoli @@@ na la i newa aku la, eia lakou ke naka haaluu nei maloko o na puia o ke kulanakauhale, a o na aloha alii hoi e noho pee ana ia mau la a ka mana o ko lakou mau enemi e noho mana ana, ua ala like ae la lakou ma keia po me ka hauoli nui a hosana like i kela halelu — God save the King me ka manao lana ana, e hoihoi hou ia mai ana ke ea, ke Kuokoa a me ka noho lanakila o ke au nohoalii o ko lakou moi aloha.

            Aole wale o ko ke kulanakauhale poe keia e haalulu a e olioli nei, aka o na poe aku kahi mawaho. Iloko o na mahele koa o kela kahua hoolulu a me keia kahua hoolulu o ka puali aloha aina e ku hoomoana ana ma na wahi i haawi ia ai na kauoha paa o ka makaala a me ka makaukau, eia lakou ke hauoli like nei, a ma ke poo o kela a me keia mahele aia ka hae liona he pulelo haaheo ala, e hoike aku ana i kela a me keia kipi ua ala hou mai na kakoo o ka hae liona me ko lakou mau @@@uu i makaukau e haehae ae i kela papale @@@a “Hae Ulaula” o ka poe kipi a kumakaia.

            O ka leo hoahewa hoino a na alakai e ahewa ana i ka Moi Kale Kuaka a me kona Alihikaua nui, ua kuahaua koke ia ae la imua o ko lakou mana kaua he kipi maopopo ka moi a me kona alihikaua, a i hooiaio no keia mau leo ahewa o ka lokahi mahope iho o ka loaa ana aku o ka lono no ke auhee a me ka luku ia ana o ko lakou mau puali kiai kulanakauhale ma ia kakahiaka poniponi o ka wanaao. Nolaila me ka leo kuahaua o ke kakela aia kela a me keia puala ua haalele aku la i ka huli ana ma ka meheu o na paahao mahuka, a huli hoi awiwi mai la no Ladana me ka manao e haawi ai i ka lakou puupuu hamare e kipoka ia ai ko lakou mau enemi iluna lilo loa o na paia uliuli o ka lani. Aka, oia mau upu ana ua halawai aku ia me kekahi maka paa paoa loa o ke pakalaki, no ka mea, ma ka auina la, oiai lakou e maki hope mai ana me ka puahi nui me na manaolana ulu mahiehie o ke komo ana mai iloko o Ladana, aia ponoi hoi imua o ko lakou mau maka e nana mai ana e welo haaheo aku ana ka hae liona, a o na eheu ulaula o ko lakou hale aupuni “hae” aole ia maluna o kela pahu hae.

            Alaila, me ka leo oolea o ka inaina ua huli ae o Komowela maluna o na kea a kukala aku me ka leo nui. E na koa; wahi a ua Oliva Komowela nei. Aia imua o ko oukou mau ike maka me ka hoohewahewa ole na hiohiona e hoike mai ana i na hana kipi maopopo a ko oukou mau enemi. O ko kakou hae o ka wiwoole, ua ulupa ia ilalo, a o kela hae kipi a kumakaia aia ia ke welo hookano mai la, e kahea mai ana hoi i ko kakou mau puuwai wiwoole e pii hou aku imua o Ladana a huki iaia ilalo no ka manawa elua. O ka haulehia ana o ko kakou hae aole ia he mea nana e kauoha mai ia kakou aole e hehi hou ia Ladana. O kona hanohano a me kona laahia i hoohaahaaia, oia ka leo kahea o ka haawi kauoha — imua ano maki.

            O keia na olelo pokole i haioleloia e Komowela ma ke poo o kona puali, a wawalo ae la ko lakou leo huro a kahea ana e lanakila mau ke aupuni kuloko, a e pau loa ke aupuni kuloko, a e pau loa ke aupuni Monakia, alaila, maka aku la lakou me ka umauma lokahi e hanaia ka pono o keia ninau aupuni me ka waha o ka pukuniahi. Aka, heaha ka mea i ikeia no ua Komowela ala me kona mau Kenerala a me kona mau koa. Ua nahoahoa na lae, weluwelu na kino, a auhee iloko o ka nohaha, no ka mea, aia ponoi imua o ko lakou alo ke ku aku la ke Koa Opio Kuewa me kona puali kaua huiia a haawi i ka lakou mau puupuu oolea e wawahiia ai ka ikaika paa o na kipi a hiki i ko lakou auhee ana iloko o ka nahaha. Alaila e hoomanaoia ua loaa i ke alakai aupuni ka hanohano o ka hikimua iluna o ke kahua aina ma ke kulana makaukau o ke kue a me ke pale ana aku i ka enemi.

            E hoomanao puia hoi, mamua ae o ko ua alakai aupuni ala hoea ana aku iluna o kela kahua kaua hamama a kue aku i ke komo ana mai o na kipi, e hoi hope aku ka heluhelu ana ma kela kahua kaua lanakila i hooukaia mawaho o ka hora 3 a me 4 o ka wanaao. Ua hoike ia ua auhee aku na koa aupuni kuloko a kipi hoi ma kahi olelo ana imua o na koa aupuni roiarisi, mailoko aku o ko lakou kahua kiai kulanakauhale, a holo no ke kuea e hoopuni ana i ka halealii.

            Ma ko lakou meheu o ke auhee, @ia pu na koa aupuni ke hahai ala me ka waha o ka lakou pukuniahi, i makaukau mau e luai aku i na elele ahailono ole a ka make i kela a me keia minute e loaa aku ai o ke kauoha no ke ki ana alaila, i ka wa e loaa aku ai o ke kauoha no ke ki ana i ua mau pukuniahi ala, aia na poka e hihio hele ana ma o maanei o ke kuea pa alii, e hoopau a e kiola ana i kela a me keia mea e loaa aku ana ma ko lakou alahele. Ua haawi mai no na koa o ke kuea pa alii i ka lakou mau ki poka ana maluna o na koa aupuni iloko o na minute o ke pihoihoi nui, aka ua hapalua aku na manawa e haawi ia aku ana e na ki poka ana ai na koa aupuni aku, a i ka @@@ ka malamalama o ka la i olino ae ai maluna o na huini puoa o ke kulanakauhale o Ladana, aia hoi ua auhee a nohaha iho la na kipi e malama ana i ka maluhia o ka halealii, a holo aku la ke koena kakaikahi no ka hoopakele ana i ko lakou mau ola me ka waiho ana iho, he mau tausani kino make o ko lakou mau hoa i alina hoomaewaewa na keia hooili kaua.