Ke Aloha Aina, Volume VIII, Number 42, 18 October 1902 — Page 6

KE ALOHA AINA, POAONO, OKATOBA 18, 1902.

 

 

KA PAA BALOTA E OLA AI KA LAHUI.

 

Wailuku, Oct 11, 1902

Ed. L Like,

 

Aloha oe:--

 

Oluolu oe e hoike ae i ke akea i ike mai ai na hoa makaainana aloha aina, aloha alii, oiaio o ka mokopuni o Kama. Eia mai he mau moho aloha aina oiaio, he poe hoi i kakia iho ia lakou maluna iho ou e Hawaii.

 

He poe hoi e molia ana ia lakou iho no ka pono ou e kuu lahui.

 

E ka makani kololio o Waikapu, poina anei oe ia Thomas Clark, aole. Oia kau Senatoa no keia kau, aole oia he malihini, aka, he kamaaina no ka aina. E ua keiki kupa o na makani nei, hii ia i ka puuwai. Lei ia a hiki i ka pahu balota.

 

E mama @ina, na kaikuahine a ka hoomanawanui a me ke aloha, moe iho ma na kuli o papa a’o aku e koho ia Thomas Clark, ka moho ia nana e kukulu hou i ka hale o Keawe i wawahi ia iho nei e keia poe lima nui.

 

E Wailuku e poina ana anei oe ia Thomas Clark, ka mea au i kapa aku ai ka “Pohaku Hauoli o Hawaii.” Eia la imua ou i keia la, he Senatoa no keia kau, ka mea nana kela olelo kaulana, he aloha aina au i ka M. H. 1893, he aloha aina au me ke Demokalaka i ke kau koho balota i hala, he aloha aina me ke Demokalaka i kela la a moe aku keia mau iwi ma ka poli o kuu aina makuahine.

 

E ola na kini o Maui, e na kaikamahine, na @i o Maui e lilo oukou i mau kiai no Ke Aloha Aina paipai ia kunane ma, mai poina ia Thomas Clark.

 

I kaulana mau no o Maui. “O Maui no ka oi,” na koho ia he aloha aina oiaio.

 

Oi mahope ke koho ia ka epa a me ke kumakaia, a mai poina e ka ua hoehaili aole oe e poina ana ia Thomas Clark ua ike au. Mai ka makani kaahaaha lai o Niua a i ke kai lai o Maluhia e ala, eia mai o Thomas Clark, he Senatoa no keia kau ahaolelo ae.

 

Ua paa ua kui ia e ka makani kilioopu o Waihee. Aohe au olelo ana nou, aia imua o ke alo. Ua ai, ua inu a ko’u ka puu i ka wai a ka naulu, nawai hoi ia e poina.

 

E na pali kinikini o Kaukini eia mai o Thomas Clark, he Senatoa ua kamaaina ia oe.

 

E na keiki o ka wai Kukaeiole o Kahakuloa, eia mai o Thomas Clark he hiapaiole, he iole, he pua na kela lole nui o Kahakuloa he moopuna na kela lelo i paa ai iloko o ke koko a Makalii, pela au i manao ae ai, ia’u hoi kahi lihi, ia oe mai hoi kahi lihi kapeku mai hoi ka Malu Ulu o Lele, ka paa no ia o keia iole i ka pahu balota, e like no me ka hana ana a kela iole a Makali, pe@a auanei keia iole e hana ai haule mai malona ou na pomaikai au iupu ai no keia wa loihi. E ala @ n@ iho he moo iloko ou e Kahakuloa! @@.

 

E na pali po i ka ohu, hookipa ia aku o Kamaki Kaleka i Senatoa na kakou, ua lawe hoi kaua i ka aila.

 

E Maui Hikina, hiki ka la hiki po mai no me ke aloha, ke aloha o kuu aina, ke aloha o kuu alii, ke aloha o kuu hoa.

 

O keia poe kumakaia aloha ole ia oe e Hawaii, e alualu hou mai nei i kou balota a kumakeia hou mai no, mai haawi ia lakou, eia mai o Thomas Clark he Senatoa no keia ahaolelo ae, koho ia, na lawa hoi kaoa me ka aila.

 

Eia iho hoi na Lunamakaainana: John Richardson, he loea ma ke kanawai, kakaolelo, he aloha alii, aloha aina a me ka hae Hawaii, he elele na ke aloha aina o Maui i Wasinetona, kue i ka hoohui aina o ka makahiki 1897, eh moho na ke aloha aina i keia la ke noi aku nei au ia oukou oia ka moho kaulana o Maui, aole i lolo.

 

Akamu Forsyth Lunamakaainana, no Kula keia keiki, no ka aina i kaulana ai ke mele. moe kokolo ka uahi o Kula ia he ohu. Na keia keiki ka olelo kaulana, he nui loa na kii o Honolulu mai hoonua hou kakou i kili ilala, @ua kela.

 

Paia Naku Lunamakaainana he Molokai, he pule oo na inei keia mau olelo kaula@.

 

Ina oukou e lawe aku i kuu inoa a koho a hiki au iluna o ka papahele o kela Hale Kaukanawai, e paio no au no ka pono laula o keia lahui ina ia he mea no’u e haule iho ai maluna o kela hale hanohano.

 

Mea e ka nani ola ina oia ka moho, koho ia a puka i ike i ka oiaio hookahi Senatoa, ekolu Lunamakaainana.

 

Ia Molokai Nui a Hina, eia mai na moho a ke Aloha Aina a me Demokalaka a mai poina i ke aloha o kipa hewa anei ke aloha i ka poe kumakaia na@na e koala mau ia kakou iluna o ke ahi nanahu.

 

Aloha,

D. MAHUKA.

 

NUI KA MAKE I KE KORELA

 

Cairo, A@gupita, Oct. 2. He 2004 ka nui o na ma’i korela i ikeia m@ ka la inehinei, a he 241 hoi ka nui o na make ma ia la. O ka huina nui o na ma’i mai ka hoomaka ana o ke korela e puka ma ka la 5 o inlei, a hiki i keia la he 369,358, a o ka nui o na make he 30,898.

 

@@@@@@

[ TWO COLUMNS REMAINING TO BE TRANSCRIBED......]