Ke Aloha Aina, Volume VIII, Number 51, 20 December 1902 — Page 3

KE ALOHA AINA

POAONO, DEKEMABA 20 1902.

 

POINO HOU NO KEIA KALA.

IWA KAA.

 

            Ua hoea aku i ka halewai ma ke aumoe o ka po Poakahi nei he kalaiwa kaapio Pake me ke poo i nahoahoa e hoike ana hoi i na alina o kekahi hana lokoino i lawelawe ia aku maluna ona. Ma ka hoike a ka Pake imua o na makai ua kau aku kekahi mau kanaka elua iluna o kona kaa me ke kauoha aku e lawe ia laua no Kalihi, a i ka hiki ana aku malaiia ua kauoha aku ia na ohua e lawe ia laua i kai o Puuhale ma kahi kokoke i Kalihi Camp.

            Mamuli o ka manaoio o ka Pake e loaa ana iaia kekahi uku nui mai kana mau ohua mai ua hooko aku la oia i ko laua makemake, a ia wa no i lelo aku ai na ohua mahope ona a pepehi iho la iaia me ka lawe pu ana aku i kana mau dala he umi kumamalua a me ka uwati, alaila haawi mai la na mau powa nei i ko laua aloha i ke kalaiwa kaa a nalo aku la iloko o ka pouli. Ma kona hoomaopopo he hookahi o laua he Porto Rico a o kona kokoolua he haole.

 

HOIKEIKE KII NUI.

 

            Eia ke hoikeikeia mai nei ma ke alanui Moi, mauka ae o ka Hui Kaa I X L, kekahi mau kii hooleleaka nani loa o ka hoikeike Parisa. E ike ia aku no na hale nui a nani, na kaa me na kanaka e oloio ana ma kona mau alanui, na moku heihei Columebia a me Shamrock e pahee e pakika ana iluna o na ohuku ale, na mokuahi makaikai e uhai ana mahope o laua. Na poe hololio e uhai ana mahope o kekahi dia a pela aku. He nui na kii e ae e hoikeike pu ia mai ana e oni ana no me he mea ala, he mau mea io lakou, oka leo wale no koe a pae mai. He 15 keneta wale no ka uku komo. O kou hoohala ana malaila no kekahi mau minute pokole, o kou ike ana no ia i kekahi mau wahi kaulana o ka honua nei. E hoololi ia ana na kii i kela a me keia Poalima. E hoikeike pu ia mai ana ke kulanakauhale o Piere i lukuia mai nei e ka pele.

 

EIA KE HOOMOE IA MAI NEI KA UWEA TE LEGARAPA.

 

            O na hoike i loaa mai la ma ka mokuahi Zealendia ma ka La Pule nei ua hoea aku la i Kapalakiko ma ka Poaha Dec. 4, ka mokuahi Silvertown me na pokaa uwea telegarapa maluna ona no ka hoomoe ana mai Kapalakiko mai no Hawaii nei.

            He ekolu mau kapu maluna o ka moku kahi o ka uwea i pokaakaa ia ai nona ka loa he 2,413 mile. He 2,100 mile wale no ke ana pololei mai Hawaii nei ako a hiki i Kapalakiko maluna o ka ilikai, aka, malalo nae o ka papaku he nui na mauna, na awaawa kuhoho, a pela aku, a me keia mau wahi ae la e moe mai ai ka uwea iluna a ilalo a hiki i kona pae ana mai i Hawaii nei.

            O ka Poaono i hala lio la Dec. 13 oia ka la a ka Silvertown e haalele aku ai ia Kapalakiko me ka hoomala ana e hoomoe mai i ka uwea no Hawaii nei, a e hiki mai ana hoi oia i anei i keia pule aku mamua o ke Karisimaka. Eia ke manao ia nei ina aole he mau kuia, alaila, i ka La Karisimaka e hoouna ia ai na kukai olelo mua loa.

 

LOAA PONO KA AIHUE.

 

            I ka hora 3:30 o ka wanaao Poaono kela pule aku nei, ua hopuia iho la he elua pake i ka wa e hoao ana e komo aihue aku iloko o kekahi hale tela e ku nei ma ke alanui Beritania makai o ka haukipila, ua loaa mua aku ka lohe ia Hope Makai Nui Chillingworth a me Ah On, he makai Pake no keia aihue e lawelaweia ana, nolaila ua hiki mua aku laua i ka hora 11 o ka po ma ua halekuai ala, a pee mahope o ka hale. He mau hora mahope iho ua hoea mai la he elua pake, he hookahi ua lawe ae i ke kulana kiai no ka nana ana i ka poe hele o ke alanui. Mahope o ko na makai ike ana i ka wa kupono e hopu ai i keia pake, ua lele aku ia laua a hopu iho la iaia, i ka huli ia ana aku o kona kokoolua ua loaa oia e wili ana i ka puka, he umiku mamawalu pukapuka e kau ana. Ua laweia mai laua i ka halewai me ke kau ia o ka $250 bona pakahi maluna o laua.

 

E KUAI KUDALA IA ANA.

 

            Ua hoopuka ae la o Hope Makai Nui Chillingworth he hoolaha e kuai kudala ia aku ana na waiwai paa o ka Puuku apuka Wright, malalo o ke kauoha a ka Aha Kaapuni Ekahi. O keia kuai kudala e malama ia ana ma ka Poakahi, Ianuari 19, 1903, koe wale no ma ka uku koke ia ana mai o na dala he $18,744 45, ka huina dala ana i lawe kolohe ai.

            O na waiwai paa e kudala ia ana oia kela apana aina e waiho nei ma ke kihi o na alanui Sheridan a me Lincoln, nona ka nui he 15,000 kapuai kuea, a i hoolilo ia aku iaia e Anna S. Wright i ka la 30 o Maraki, 1901, a me kela aina e waiho nei ma Puunui nona ka nui he 20,000 kapuai kuea, i hoolilo ia aku e Agnes H. B. Judd ia Wright i ka la 3 o Augate 1901.

 

            He ulumahiehie mau no “KE ALOHA AINA” i na wa a pau.

 

MA KE KAUOHA

HOOLAHA HOOILINA WAIWAI.

 

            Ua makena keia na hoi iluna o na po Ma’i Lepera i make me ke Kahua Ma’i Lepera, Molokai, o lakou na inoa malalo iho nei, e waiho ae ma ke Keena o ka Papa Cla. Kepu iwa liale, i ko lakou mau koi no ke koena dala o ka waiwai o na mea i make, iloko o na pule eono, mai keia la aku.

ARTHUR KAWAIELI (K) no Honolulu; 38 makahiki; laweia i ke Kahua Ma’i Iulai 25 1893; make, Malaki 5, 1900.

PIKA PELO (k) no Puowaina, Honolulu; 22 makahiki; laweia Okakepa 25, 1898; make Aukake 18, 1900.

KAOMEA (k) no Hilo, Hawaii; 46 makahiki; laweia Feberuari 16, 1896; make Aukake 18, 1990.

AH PAT (k) no Lahaina, Maui; 50 makahiki; laweia Malaki 22, 1893; make Feberuari 6, 1901.

KEAHO (k) no Kahaluu, Hawaii; 16 makahiki; laweia Iulai 5, 1893; make Ianuari 8, 1902.

HALOA (k) no Kakaako, Oahu; 52 makahiki; laweia Okakopa 11, 1896; make Feberuari 14, 1902.

PAAUKI (k) no Waimanalo, Oahu; 44 makahiki; laweia Novemaba 17 1897; make Feberuari 23, 1902.

JOE TAVIS (k) no Koloa, Kauai; 18 makahiki; laweia Aperila 23, 1892; make Feberuari 14, 1902.

L. PALEA (k) no Kohala, Hawaii; 66 makahiki; laweia Mei 23, 1900; make Aperila 7, 1902.

KAUKUNA (k) no Kona, Hawaii; 51 makahiki; laweia Malaki 7, 1884, make Feberuari 1, 1902.

            No na mea i koe e ninau i ke Kakauolelo o ka Papa Ola.

            C. CHARLOCK,

            Kakauolelo o ka Papa Ola.

            Honolulu, Dec. 9, 1901.

 

HOOLAHA A KA MEA PAA MORAKI.

 

            I kulike ai me kekahi palapala moraki i hana ia e Caroline Aniu Ah Buck a me Ah Buck, kana kane ia Patrick Gleason, ma ka la 29 o Mei, 1899, a i hoopaa ia ma ke Keena Kope Aupuni, Oahu, buke 196, aoao 23 4 5, ke hoolaha ia aku nei ma keia na manao ka mea paa moraki e paa i ua moraki ala i ole loia no ka hahakiia o ka aelike, oia ka uku ole ia o ke kumupaa a me ka ukupanee i ko laua wa uku, a o na waiwai i paa maloko o ua moraki ala e hoolilo ia aku ana ma ke kuai kudala ma ke keena kudala o Will E. Fisher, ma Honolulu, ma ka Poaono, la 20 o Dekemaba 1902, ma ka hora 12 awakea o ka la i ole loia. O na waiwai i hoakakeia maloko o ua moraki aia oia keia i hoakaka ia malalo iho nei.

            No na mea i koe e ninau ia J. Lightfoot, ka Loio ma ke Kanawai, Magoon Hale, kihi o na alanui Alakea a me Kalepa, Honolulu.

            PATRICK GLEASON,

            Mea Paa Moraki.

            O na waiwai i hooakaka ia maloko o ka moraki:

            Ekahi. Oia kela aina a pau e waiho ana ma Kailua, Koolaupoko, Mokupuni o Oahu, i hoakaka ia ma ka Palapala Sila Nui 2296, Kuleana 2765, nona ka ili aina o 3 eka 3 38-100 kuea kaulahao.

            Elua. Oia kela aina a pau e waiho ana ma Kailua i olelo ia i hoakakaia ma ka Palapala Sila Nui 1362, Kuleana 2792 nona ka ili aina 3 55 eka.

            Nov 29, Dec 6, 13, 20.

 

Kauka L. F. Alvarez

KEENA ME KAHI NOHO HELU 1240, ALANUI EMMA.

 

NA HORA HANA:   8 a ka 10 a m

                                    3 a ka 5 p m

                                    7 a ka 8 p m

NA LA PULE:           8 a ka 10 a m

                                    7 a ka 3 p m

            Telepona White 211.

 

HOOLAHA HOOKO MORAKI.

HOOLAHA KUAI A KA MEA PAA MORAKI.

 

            I kulike ai me ka ni ua hoolilo o kekahi moraki i hanaia e H. N. Kahulu a me Miliama Kepe kana wahine, na mea moraki, o Ewa, mokupuni o Oahu, Teritori o Hawaii ia Mrs. E. Humphreys o Honolulu, mokupuni i oleloia, ina ka la 10 o Maraki, 1888, a i hoapiliia ma ke Keena Kope Aupuni, Oahu, buke 113, aoao 286 7 8 a oia moraki ma ka la 5 o Iune, 1901, ua haawi a hooliloia aku ia J. ALFRED MAGOON, me paa moraki, ke hoolana ia aku nei oia keia ua manao ka mea i hooliloia aku ai o ka moraki e hooko aku i ua moraki ala i olelo ia no ka hahaki ia o ka aelike oia ka uku ole ia o ke kumupaa a me ka ukupanee, i ko laua wa uku, e hooliloia aku no ua moraki ala ma ke keena kudala o James F. Morgan, Alanui Moiwahine, ma ka Poaono Ianuari 3, 1903, ma ke hora 12 awakea o ka la i oleloia. O na waiwai i oleloia ma ua moraki la oia keia i hoakakaia malalo iho nei.

            No na mea i koe e ninau ia J. Lightfoot, ka loio Magoon Building kihi o na Alanui Alakea me Kalepa, Honolulu.

            J. ALFRED MAGOON,

            Mea Paa Moraki i Hooliloia.

            Hanaia Honolulu, Dec. 10 1902.

 

NA WAIWAI I HOAKAKAIA MA KE MORAKI.

 

1. O kela apana aina a pau e waiho ana ma Puapuaaiki, Kona Akau, mokupuni o Hawaii, a i hoakoka hoakakaia ma ka Palapala Sila Nui 6716; Kuleana 4887 no Thomas Sams, nona ka ili aina o 170 eka i lilo mai i ka mea moraki ma kekohi palapala kuai i hanaia e Oana, ma ka la 26 o Iulai, 1883, a i hoopaaia ma ke Keena Kope Oahu buke 81, aoao 301, koe keia mahele a pau o ka aina i oleloia me ka pahale e waiho ana makai o ke alanui Aupuni e moe ala mai Kailua aku no Holualoa.

2. O kela apana aina a pau e waiho ana ma Haleaha, Apana e Koolauloa, mokupuni o Oahu i oleloia, a oia noho i ka pa hale hookahi i hoakakaia ma na Apana 1, 2 a me 3 Kuleana 5853 no Kamano, nona ka ili, aina 3 ¼ eka oi a emi mai paha a oia pa hale hookahi ua hoolilo ia Miliama Kepe Kahulu e Kaneumi (k) ma kekahi palapala kuai i hana ia ma ka la 17 o Iune, 1885, a i hoopaaia ma ke Keena Kope buke 96, aoao 169.

Dec. 12, 19, 26, 1902, Ian 3, 1903.

 

OLELO HOOLAHA.

 

               E ike auanei na kanaka a pau owau o ka mea nona ka inoa malalo iho nei, ke hoike aku nei i ke akea. Ua haalele kumuole mai ka’u wahine ia’u nona ka inoa o Mrs. Hookahi Akana, ma ka Poakahi Dec. 1, 1902 mai ko maua wahi noho aku ma Leleo, Honolulu, Oahu, me ka lawe kolohe aku he $100. Ke papa a ke hookapu loa nei au i na mea apau aole he manao kuu wahine e aie ma kuu inoa, a o ka poe e hoolohe ole ana e ili no na poho a pau maluna o lakou.

               Owau no me ka oiaio,

               W. AKANA.

               Leleo, Honolulu, Dec 10, 1902.

 

KAUKA HANA NIHO IAPANA.

M. Asahina.

 

               Ke hoike ia aku nei ka lohe i na poe a pau ua nee mai ko’u Keena Hana ma ke kihi o na alanui Beritania a me Nuuanu.

               Na hora hana:           8 a. m., a 5 p. m.

                                                7 p. m., a 8 p. m.

               Ke kono ia aku nei na poe a pau he niho eha ko lakou e kipa mai ma ko’u keena, a e loaa no na lapaau maikai ana me ka uku haahaa.

               KAUKA M. ASAHINA,

               Honolulu, Oct 9, 1902.