Ke Aloha Aina, Volume IX, Number 2, 10 January 1903 — KUE NA POE KALEPA I KA HOOLILO ANA IA MOLOKAI I KAHUA NO NA MA'I LEPERA A PAU O AMERIKA. [ARTICLE]

KUE NA POE KALEPA I KA HOOLILO ANA IA MOLOKAI I KAHUA NO NA MA'I LEPERA A PAU O AMERIKA.

I ka wa i loaa mai ai o ka hoike ma ka uwea olelo, ua waiho aku la na Komite Senate i hiki iho nei i anei i ka lakou hoike, no na bila kupono e loaa ia Hawaii e like me na mea i hoikeia maluna ae nei, ua hoouna koke aku la na poe kalepa o Honolulu nei i na kue ikaika ana no kekahi mau bila a keia komite i manao ai e hooholo aku, oia hoi, e haawi ana ia Molokai i Panalaau maʻi lepera no Amerika Huipuia, Ma ka manao o na poe kalepa ua hiki no ia Hawaii ke malama i kona mau maʻi lepera, a e malama no hoi o Amerika i kona poe maʻi. O ka

lua o na bila a lakou i kue ai, oia ka hoomalu ana mai o Amerika ina aina aupuni. O keia mau manao kue o na poe kalepa o Hawaii nei ua hoounaia aku ma ka uwea olelo, ma ka Poaha nei mahope o kekahi halawai kui kawa i malamaia, ia ia Senatoa J.B. Foraker, Lunahoomalu o ke Komite Porto Rico me Pakipika, a me hon. William Knox, Lunahoomalu o ke Komite Teritori o ka Hale o na Lunamakaainana. O ka hopena o keia mau kue ana oia ka na poe kalepa e kali nei me na manaolana e kapae ia keia mau bila.