Ke Aloha Aina, Volume IX, Number 42, 17 October 1903 — KUMUHANA -O KA- AOAO KUOKOA HOME RULA. [ARTICLE]

KUMUHANA O KA AOAO KUOKOA HOME RULA.

KA AOAO KUOKOA HOME RULA o ke Kalana o Oahu, Teritori o Hawaii. Ma keia, ke hana a ke hookahua nei, a ke hoopaa nei i kana mau MOHO maluna o keia KAHUA HANA. 1— KE KUKALA nei makou, o ka Aoao Kuokoa Home Rula oia ka Aoao o ka Lehulehu, e kakoo ana i na Hooponopono Aupuni Hoopono, Kaulike a uhaai ole i na Pono o ka Lehulehu. 2— KE HOOIA nei a ke kakoo nei makou, a e like hoi me ka mana i loaa ia makou ma ke ano he Lahui, e Kiai i ka Pono Koho Balota o na Makaainana a pau o keia Teritori me ka hookikina ole ia ma na ano a pau, a me ka hooweliweli ole ia; a ma keia Kumuhana ke noi nei makou i na kakoo ikaika ana a na Makaainana a pau me ka nana ole i ka Aoao a me ke kulana Kalaiaina. 3— KE KU-E nei makou i na Hui Monopoli a pau, a ke hoahewa nei i na Ahahui i kukuluia no ke kapae ana i na olelo o ke Kanawai Kumu o ke Teritori, a ke hoahewa nei no hoi ia mau Hui ma ke ano he mau Hui Monopoli ia e kue ana i na Pono o na Kanaka. 4—KE HOOPAA nei makou ia makou iho no ka hoohanaia ana o na poe Kupa wale no o ke Teritori, a i ole, o na poe i kupono e lilo i mau kupa ma na hana Aupuni a pau o ke Kalana, ke hoi ikaika nei makou i na kanaka a pau a me na Ahahui o keia Teritori e haawi mai i na kokua like o keia ano i na Paahana Kupa o ka Aina. 5— KE HOOPAA nei makou e loaa ka auhau kaulike a hoopono a me na hoolilo pakiko akahele o na hoolilo dala o ka Lehulehu. 6— KE KAKOO nei makou i ke Kumuhana no ka hoolilo ana ia Hawaii nei i "Mokuaina," a ke mananoio nei e hiki ana ia makou ke hoike maopopo i ko makou kupono io maoli no ia Kulana Hooponopono Aupuni mamuli o ke hooponopono ana i na hana o ke Kalana ma ke kulana hoopono, makaukau, me ka hoonui lilo ole no ka Pono Kaulike o ka Lahuikanaka holookoa. 7—I KE KAKOO ana, e like hoi me makou e hoapono nei i na manao hoakaka a Peresidena Roosevelt e hookumuia na hana o keia Teritori "Maluna o na Rula Alakai Aupuni o Amerika Huipuia" he mea minamina ia makou ka ike ana aku i ke kulana hoomaopopo ole o ka Aoao Repubalika o keia Teritori ia mau Olelo Kuahaua, a ke Kukala nei i ka manaoio a kulana loli ole o ka Aoao Kuokoa Home Rula ma keia kumu Alakai Aupuni. 8—MA KA INOA o ka Lahui Hawaii ke kue nei makou a ke hoahewa nei na wa a pau i ka hapaiia ana mai o na NINAU PILI LAHUI MA KA ILI. C. P. IAUKEA, Lunahoomalu o [ke] Komite. D. KALAUOKALANI OPIO, G. MARKHAM. Na Hoa o ka Papa Komite.