Ke Aloha Aina, Volume X, Number 21, 21 May 1904 — LELE O KOHALA ILUNA ME HE LUPE LA. [ARTICLE]

LELE O KOHALA ILUNA ME HE LUPE LA.

Ma ke ahiahi Poaha Mei 12 1904, ua noho hou ka halawai Demokalaka, maloko o ka hale hookolokolo o Kohala nei; no ke koho ana i na Luna Nui o ka aoao Demokalaka. Na ka Hon C. H. Pulaa i waho mai i ka inoa o J. H. Kuhinapule i Lunahoomalu hooholoia. Nana no i ka inoa o S H. K. Ne Kakaolelo, hooholoia. Na S. P. Kamakea i noi mai e whe ia na hana o keia halawai me ka pule a ka Lunahoomalu Hooholoia. Na ka Hon C. H. Pulaa, i noi mai e heluhelu ia ka moolelo o ka halawai i hala, aponoia. Na D. P. Mc Dougall i hoike mai o ka hana o keia halawai i kahea ia ai, oia ke koho ana i na Luna Nui, hooholoia. Na S. P. Kamakea i waiho mai i ka inoa o Samuel Woods i Peresedena no ka aoao Demokalaka o Kohala nei, kokua ia. Ia wai i ku mai ai o Samuel Woods a olelo mai, e kela aku iaia, no kona ano hemahema iki i ka olelo Hawaii. Ia wa i waiho mai ai o Seneteo P. P. Woods i ka inoa o S. D. Kaneailua i Peresidena, hooholoia. Na S. D. Kanehailua i ka inoa o Samuel Woods i Hope Peresidena hooholoia. Na S. P. Kamakea i ka inoa o Mr. Lono i kakauolelo hooholoia. Na S. H. K. Ne i ka inoa o J. F. Woods i Puuku a na W. P. Mc Dougall i ka inoa o Senetoa P. P. Woods, hooholoia ka inoa o ke Senetoa i Puuku. Na S. D. Kanehailua i waiho mai i na inoa o ke komite, S. H. K Ne, S. P. Kamakea, Kaaina, J. H. Kuhinapule, J. F. Woods, hooholoia. Na W. P. Mc Dougall i noi mai e hai ae ka Peredidena i koho ia iho ma kona noho, hooholoia. Ua hoi ae oia ma kona noho me ke ohohia o ke anaina, a me kana mau hoomaikai ana no ka hanahou i hookau ia aku maluna ona e ka aoao Demokalaka, oiai oia ka pou hana o ka aoao Home Rule i na la i hala ae la. Aloha no! Na S. P. Kamakea i noi mai e hoike mai na komite kakau inoa i ka noi o ka poe i kakau inoa no ka aoao Demokalaka hooholoia. Oka nui o ka poe i kakau inoa mai ka la 3 mai a hiki i keia la he 55. A ina he mau la malie kela o ka ua, ina ua pau loa na Home Rula i Demokalaka, a koe kokoolua aku no o Pili me Kalahikiola ma. Ua kauoha mai ka Peresidena i na komite kakau inoa e hoomau

aku i ka lakou hana a hiki i ka puau loa ana o na Home Rula o Kohala nei i Demokalaka a koe no paha auanei o Hua a ma. Na D. P. Mc Dougall i noi mai e noho hou ka halawai ma ka la 21, no ka wae ana i na moho Elele no ke koho balota ana ma ka la 28, hooholoia. Na S. H. K. Ne, i noi mai e hoopanee ka halawai. Ua hookuu ia ke anaina me ka hauoli. S. H. K. Ne Kohala, Mei 21, 1904