Ke Aloha Aina, Volume XI, Number 50, 15 December 1906 — HALA O JOHN ENA, KEKHI O NA KANAKA KAULANA O HAWAII NEI. [ARTICLE]

HALA O JOHN ENA, KEKAHI O NA KANAKA KAULANA O HAWAII NEI.

Ma ke kakahiaka nui Poaha nei i hiki mai ai ka lono kaumaha ma ke telegarapa mai Los Angeles, Kaleponi, no ka haalele ana mai la i keia ola ana ka Hon John Ena, kekahi o na hapa-pake naauao kuonoono a kaulana o Hawaii nei. O Hilo ke one hanau o keia keonimana i hala aku la, ua hanauia mai ka puhaka o kona makuahine Kaikilani he ewe no ka paiaala o Puna a me Keoni Ina kona makuakane kekahi o na Pake kahiko i hiki mua mai i Hawaii nei, he elua ona mau kaikuahine oia o Mrs. Amoe Haalelea i make mamua aku nei a me Mrs. Ami Koni e ola nei, a nana na keiki he nui e ola nei a me na moopuna, He ohana hapa-pake kaulana keia i ike a i lohe nui ia a he mau inoa nalowale ole hoi i ka pepeiao o na Hawali, na haole a me na Pake. I ko John Ena mau la opiopio loa, ua mare ae la kona kaikuahine mua ia Levi Haalelea kekahi o na Kaukaualii Kiekie o Hawaii nei, ka mea nona kela pa nui e ku nei ma ka aoao Waikiki mai o ka Hotele Hawaii i kapaia o Holani Pa, me kela hale pohaku nui e ku 'la maloko olaila. Ua hookomoia oia i ke Kula Alii o Kahehuna a mailaila aku i ke Kula Nui o Ahulimanu a malaila oia i hoonaauao pu ia ai me Ke'lii Kunuiakea i ko laua mau la kamalii; a i kona puka ana mailaila mai, ua hoi aku oia i Hilo me kona mau makua a me kekahi o kona kaikuahine, ka mea i mare ia J H Koni, ka Ilamuku Nui o ka Mokupuni o Hawaii ia mau la, a noho aku la oia he Kakauolelo no ke Keena Ilamuku o kona kaikoeke no kahi mau makahiki, e noho kakauolelo a Hope Lunaleta hoi no ka Hale Leta o Hilo i kahi wa; a i ka hala ana o kekahi mau makahiki loihi o ka noho ana i Hilo, ua hoi mai oia i Honolulu nei a noho hana aku la ma lalo o T R Foster, ma ke ano oia kekahi o na kupakako o ka Hui Mokuahi o Poka, a mailaila i pii ae ai oia i na keehina mua o ka hookuonoono ana i kona wahi loaa uuku oia mau la, a hiki i kona lilo ana oia kekahi o na Hoahui e paa ana i kekahi mau mahele nui iloko o ua Hoi 'la, ma o kona noho kahu ana no na mahele nui o kona mau kaikuahine. He kanaka waiwai o John Ena a hiki i kona make ana aku la, he nui kona mau mahele i ka Hui Mokuahi Pili-aina, he mau aina me na hale nani kona ma Honolulu nei, a ua kuai aina oia a kukulu i kekahi hale nui nani kohu kakela e ku 'la ma ke kapakai o "Long Beach" ma Kaleponi kahi i lohe wale ia mai ai ma mua aku nei, e kuai ana oia no kanalima tausani. Ua mare mua oia me Lilia Piikoi kekahi o na'lii wahine koko kiekie o Hawaii nei, ke kaikuahine ponoi o ka luaui makuakane o na Keikialii Kawananakoa a me Kuhio, a mahope o ka hala ana o kekahi mau makahiki e ko laua noho pu ana, ua kaawale iho la laua, a mare hou aku la oia me Miss Mary Lane a na laua mai na keiki he nui e ola nei, he ekolu keikikane ame eha kaikamahine Mahope o ko laua noho ana no kekahi mau makahiki me na keiki ua make aku la ia wahina a, mare hou iho 1a oia me kekahi

kaikaina o kana wahine Miss Maraea Lane, a oia kona hoapili a hoa kaoa pu o ka hauoli a me ke kaumaha iloko o na la hope o kona ola ana a hiki wale i kona hala ana aku la ma kela ao maha. Auwe! Aloha wale ia ewe o ka aina uwahi noe lehua o Hilo, ia kupu o ka ua lu lehua o ka aina, ia hoa uhaiaholo o na pali kinikini o Hilopaliku, hoa aloalo ku ana lanipili o na aina kupolua aia i ke ala o ka hala me ka lehua, na wehi kaulana oia aina a ke aloha i noho ai.—Aloha ia mau kaikunane o ka holoholo pu ana i na la opio me ko makou makuahine nei. O KE ALOHA AINA kekahi e komo pu aku nei me ka ohana holookoa o ka mea i hala iloko o ke kaumaha luuluu me ke aloha paumako no ka makamaka aloha i hala aku la i ke ala hoi ole mai.