Ke Aloha Aina, Volume XII, Number 12, 23 March 1907 — AOHE ONA KULEANA INA MOOLELO KAAO. [ARTICLE]

AOHE ONA KULEANA INA MOOLELO KAAO.

"Ia Albert Kahuena, Abr. Kauhiakama a me Lionel Kahoalii o Kalihi-kai." Aloha no, Ua ikeia ka oukou pane kuhalahala no na moolelo a ko makou mea unuhi moolelo e hoopuka nei ma Ke Aloha Aina. Aohe kuleana o ka Makuahine o Ke Aloha Aina ina moolelo kao e hoopuka mau ia aku nei, he okoe ka mea kuleana ia mea ua ike ou kou i na hoakaka a ka nupepa. Ina ma ka uku dala a ka poe lawe nupepa a kuai mahele paha a me ka uku o na hoolaha e ukuia mai nei aia malaila kona kuleana. Ea, ke minamina nei makou i ko oukou hoikeamaka maoli ana mai i ko oukou hupo, eia ka he poe noonoo nui oukou ma na kaao hoolealea waiwai ole a ka nupepa, he mau mea hoonanea wale no ia, a haalele la ae la na manao waiwai a ka nupepa e hoopuka mau aku nei. Kupanaha ka manao nui ia o ka moolelo kaao hoopunipuni mamua o na manao hoonaauao a me na mea hou o kela a me keia ano. Eia ka, o ka moolelo kaao iho la ka oukou noonoo, a o ko oukou mea la i lawe ai i ka nupepa. Ea, ua oki ka lawe ana i ka nupepa ina oia ka manao, e mau loa auanei ka hupo me oukou. Ke kono pu ia aku nei oukou e kipa mai ma ke Keena a e hoike ia aku no na buke e unuhiia nei ia mau moolelo ia oukou a me na buke i unuhiia iho nei o Finela ma, a heaha ko oukou manao malaila, ina oukou e ike ana ia mau buke.