Ke Aloha Aina, Volume XII, Number 17, 27 April 1907 — WM MOSSMAN JR [ARTICLE]

WM MOSSMAN JR

Ka Alihikaua Hou o ka Aoao Demokalaka no na Hono a Piilani. Ua hala aku no na Hono a Piilani ma ke Kalaudina i hala, o Mr. Wm. Mossman Jr. i ikeia ma mua oia kekahi o na kakoo ikaika o ka aoao Home Rula ma na Kau i hala. Ke ukala akea aku nei Ke Aloha Aina imua o oukou e ka lehulehu mai keia wa aku, e ike ia mai oia e oukou ma na wahi a pau ana e hele 'la a e kipa kauhale aku ai a kuka pu me oukou ma kona kulana hou "he Demokalaka oiaio," a e hooia pu aku ana makou, ua hoi mai oia ma keia aoao lahui a oia kekahi o na Alihikaua Nui a mea Alakai o keia aoao mai keia wa aku, a i keia Kau hou e hiki mai ana. O kana mau lawelawe hana ana no ka pono o ka aoao a me na hana e ae e pili ana i ka wahaolelo wiwo ole a ka Lahui, ua mana ole ma ia mau mea a pau. Imua e Mokimana, no ka pono o kou Lahui oiwi, imua no ka hanohano o ka aoao au e alakai like aku ai me kou mau hoakanaka no ke kahua hooili kaua nui o keia Kau ae. E holomua a holopono kau mau lawelawe hana ana, oia na upu a ma na li'a ana a Ke Aloha Aina.