Ke Aloha Aina, Volume XV, Number 2, 14 January 1911 — KA MAUA LEI ALOHA HE KEIKI UA HALA. [ARTICLE]

KA MAUA LEI ALOHA HE KEIKI UA HALA.

I KE ALOHA AINA, Aloha oe: - E oluolu mai oe e hookomo iho ma kahi kaawale o kou oneki i ka maua wahi puolo a nau hoi ia e lawe aku ma na wahi like ole o na mokupuni o Hawaii nei, i ike mai ai na makua, na kupuna, ka ohana ame na hoa oha o Antone K. Mitchell ua hala, ua nalo, ua pau kona ike hou ia ana. Ma ke ahiahi Poaha, Dekemaba 20, 1910, hora 7; i kii palanehe mai la ka lima o ka Mea Mana Loa a kaili aku la i ka maua keiki aloha Antone K. Mitchell. Pela no hoi i ko ai ka olelo a ka Buke Nui. Nana no i haawi mai, a nana no i lawe aku. E hoomaikai ia Kona inoa. He 19 la kona waiho ana i ka mai. Ua hanauia o Antone K. Mitchell ma Pauwela, Maui, loko o Mei 3, 1901, nolaila, ua piha iaia na la he 9 makahiki, 7 mahina, 17 la. Antone K. Mitchell ka maua hiapo, ua haalele iho oia he elua kaikuahine, hookahi pokii a me maua na makua ma keia ao. He keiki oluolu a hoolohe oia, he haahaa me ke akahai, a hoopono no hoi. A he he mea nui oia i ka ohana. Ke haawi nei maua i ko maua hoomaikai nui ia Mr. ame Mrs. J. P. Kaleo, no ko laua komo pua ana ma, me maua i na hora o ke kaumaha a me ka luuluu, a o ka oi loa aku ko laua haawi ana mai i wahi e moe ai o ka maua keiki aloha. E like me ka ka Makua; i mai ai, no ka lepo no ke kanaka, a e hoi hou aku no oia i ka lepo. Nolaila, ke haawi aku nei maua i ka maua leo pule i ka Makua Mana Loa. E like me ko laua hana maikai ana maila mai ia maua, oiai he aina malihini keia. E haawiia mai na hoopomaikai he nui maluna o laua ame ka ohana apau. A maluna ae o na mea apau, o ka Haku ka Puuhonua no kakou, he kokua kokoke oia no kakou i na ma nawa apau. Me ka luuluu, O maua iho no, Mr. me Mrs Frank A. Mitchell Kahuku Plantation, Oahu Ian. 1911