Ke Aloha Aina Oiaio, Volume I, Number 3, 3 December 1896 — NA ENEMI. [ARTICLE]

NA ENEMI.

hoikeia mai ia makou, eia na enemi ou o Hawaii, ka poe ma ka lehelehe wale no ke aloha aina, a he mau manao o ka poe lapuwale haahaa loa kailoko o ko lakou mau puuwai; ke papa nei i na Luna-lawe pepa, aole e lawe i ka makou nupepa, Ke Aloha Aika Oiaio. Ua hoike pu ia mai hoi ia makou ka lono, ina ka o lawe ana kekahi luna, alaila, e hoopania ana kona noho luna aua no ke "Aloha Aina" ole wale. Ea! 1 Kupaianaha keia mau hana, ua hiki anei keia poe kanaka ke punukuia lakou e like me ia—a he poe anei lakou i kepaia e hookauwa kuapaa malalo o kekahi mea me ka hiki ole ia lakou ke huli hou aku i ola no ko lakou mau ohana ma kekahi ano e ae? Aole anei he makau honua ko keia poe i ke koa wiwo ole nana e paio aku ia lakou a hiki i ko lakou weluwelu ana a nahaha liilii loa.

No makou iho, ua waiho aku makou i ke akea a i ka lahui Hawaii hoi na lakou e ike mai, a aole hoi na kekahi poe kakaikahi i komohia ia me na uhane ino o ka haukae e hana i keia mau hana ku i ka lapuwale a me ka haahaa, ka niania aua i kekahi poe aole e lawe i ka makou nupepa. lna he makemake ko lakou e ikeia mai e na kini lehulehu a me na mano kanaka, ua akea ke kahua, a e waiho aku ia mau hana o ka niania na ka poe lapuwale e hana, a e lawe ae i ka oi o ka makakila maluna o ke aiai o ke kanana e kalai ai i na manao a hiki i ke kumu mu ana o ka peni. O ke ano hana iho la ia a ka hohe wale he niania. Ua makaukau mau ka makou makakila e paio aku a hiki i ke auhee ana o keia poe hanaiahuhu a kuamu ai-kahu, a aole o lakou ka mea e kumumu ai o ka makou makakila.