Ke Alakai o Hawaii, Volume I, Number 2, 10 May 1928 — KUE I KA HANAIA I ALANUI HELE WAWAE Hana Ino Ka i Ka Ui o Ke Alanui. [ARTICLE]

KUE I KA HANAIA I ALANUI HELE WAWAE

Hana Ino Ka i Ka Ui o Ke Alanui.

I keia malama aku la kauoha mai la ka Papa Lunakiai o ke Kalana o Honolulu i na poe aina e huli a e pili ana i na alanui aupuni e hana a e kimeki i ko lakou mau alanui hele wawae e pili mai ana mawaho o ko lakou mau aina. Ke hana nei kekahi poe he lehulehu i keia mau alanui hele wawae, aka o na poe waiwai a kuonoono o Manoa ke kue mau nei lakou me ka olelo mai aole pono ke hanaia ia mau alanui kimeki ma Manoa no ka mea he hana ino ka ia i ka nani o ko lakou mau alanui. Ua oi aku ka ka nani o ko lakou mau alanui hele wawae ke waiho wale ia me ka mauu e ulu ana mamua o ka hulaala ae o ka mauu a hanaia ke kimeki ma kahi o ka mauu e ulu ana. He paio nui kai ulu ae mawaena o Mr. Warren kekahi o na ona aina o Manoa ame Mr. Thurston ka ona o ka nupepa Advertiser a oia no hoi ka ona o ke Kuokoa i hoopauia iho la ke paiia ana i ka pau ana aku la o kela maikahiki 1928, a komo maoli na, manao iloko o na nupepa. Ma ke kaupaona ana o KE ALAKAI ua pololei ko Kakina mau manao. He elua haneri a oi ka nui o na poe i make i ke kaa okoopila ma o ko lakou hookuiia ana aku ma ke alanui aupuni. He umikumamaiwa ka nui o na poe i make i keia mau mahina ekolu a oi i kaa hope aku Ia o keia makahiki, a ina e mau keia pakeneta e hiki aku ana paha i ke kanaono na poe make o keia makahiki i na kaa okomopila o Honolulu nei. Ua make ka hapanui ma na alanui aupuni i paa ole na alanui hele wawae I ke kimeki ia, No ka inoino o na alanui hele wawae nolaila hele r.a kanaka ma na alanui o na kaa, a nolaila ka makemake nui ia e pau na alanui hele wawae i ke kimeki ia. Ua olelo ae kekahi mau ona aina o Manoa ua kue lakou no ko lakou ui mua ole ia aku. Na ka poe o Manoa (wahi no a lakou) i hooikaika a holo ke kanawai e koi ana i ha poe mea aina pili i na alanui e -uku i ka hanaia ana oia mau alanui, eia nae ke kue mai nei lakou. Ina he pono ke ui ia ia lakou ka ninau pili i ka uhi ana i ko lakou mau alanui hele wawae me ke kūneki, alaila he pono no e ui ia aku na poe mea aina a pau o kekahi mau wahi okoa e ae a ae mai lakou alaila hana aku i kela mau alanui, Ke manao nei kela wahaolelo hookahi no kuniu nui o ko Manoa poe kue nei i keia hana, mamuli no ia o ka nui o ka lilo o ke kimeki ana ia mau alanui hele wawae oiai he $1.25 a oi I aku ka lilo o ke kapuai hookahi,