Ke Alakai o Hawaii, Volume II, Number 37, 9 January 1930 — AIA I HONOLULU KUU POHAKU. [ARTICLE]

AIA I HONOLULU KUU POHAKU.

E na hoa uhai a holo o ka kakou mele 'AIA I HONOLULU KUU POHAKU.' Ua loaa mai i ka Hale Hoonaauao Hawaii he manao hooponopono mai ia Kuluwaimaka mai ka olohe oli i ke alo o ka Moi Kalakaua e pili ana i ka huaolelo hoohanua ma ka lalani ehiku o ke mele, a me ka hoololi ana i ka lalani umi a hoihoi ae mawaena o ka lalani ehiku a me ka lalani ewalu. Ma kahi o ka huaolelo 'hoohanua' e hookomoia ka huaolelo 'hoohonua' a penei ka heluhelu ana:

7. Hoohonua mai ia ka ua iuka 8. Ua malu ka honua ia Kalani

Wahi ana o keia iho la ka ka pololei loa. Ina ua manao oukou e na hoa heluhelu ua pololei keia mau hooponopono ana, ua pono iho la no, aka, ina ua ike oukou aole i pololei keia mau hooponopono ana, alaila, e oluolu e hoike mai, no ka mea, o ka pololei kai makemake ia, aole hoi o ka hemahema. Ke mahalo aku nei ka Hale Hoonaauao Hawaii no ko oukou hialai nui i ka moolelo ame na mea kuhohonu o keia mele Alii.