Ke Alakai o Hawaii, Volume VII, Number 1, 3 May 1934 — PIHOLO HE KEIKI O 2 MAKAHIKI ILOKO O KA LUAWAI [ARTICLE]

PIHOLO HE KEIKI O 2 MAKAHIKI ILOKO O KA LUAWAI

He keiki Kepani uuku o elua wale no makahiki ka i piholo iloko o ka luawai ma Waipio i kela la aku nei. Loaa ke kino i ka po iho mahope o ka huliia ana no kekahi mau hola.

Olelo mai ka makuahine o ke keiki o kana ike hope ana i ke keiki e paani ana oia ma kahi e kokoke ana i kahi o kekahi hoaloha ma Waipio ma kahi o ka hola 2:30 o ka auwinala. I ka po ana iho aole hoi mai ke keiki, hoomaka na makua e pihoihoi nona a kahea i ka makai. Hoomakaia ka huli i ka hola 7:30 o ka po a loaa ke kino i ka hola 10:30 ma ka'e o ka luawai ia Makai Moses Piohia ame E.L. Craddock o ka mahihala o Libby.