Ke Au Okoa, Volume I, Number 48, 19 March 1866 — Page 3

Page PDF (1.26 MB)

MA KE KAUOHA.

 

Olelo Kahea.

O MAKOU O KAMEHAMEHA V., MOI o ko Hawaii Pae Aina, ma ke ahonui o ke Akua, ua oluolu ia Makou,

KE KAHEA

ana aku, e like me na mea i olelo ia ma ko kakou Kumukanawai, e halawai ana na Hoa o ka Ahaolelo o ko Makou Aupuni, ma ka Hale Hookolokolo, ma ko Makou Kulanakauhale Alii ma Honolulu, no ka hooko ana i na Hana ku i ka Lehulehu, ma ka hora 12 awakea, i ka la 25 o Aperila, M. H. hookahi tausani ewalu haneri me Kanaono kumamaono.

Haawi ia malalo o ko Makou lima, ma ko Makou Hale Alii, ma Honolulu, i keia la 7 o Maraki, M. H. hookahi tausani ewalu haneri me kanaono kumamaono, a i ke kolu hoi o na makahiki o ko Makou noho Alii ana.

KAMEHAMEHA V,

Ma ke kauoha a ka MOI.

FER D. W. HUTCHISON.

 

Ke noi ia aku nei ka poe hana aupuni, a me kekahi poe e ae i hiki mai ka manawa e hookaa ia aku ai ka lakou mau dala, ma ka la 31 o Maraki, e kii mai i ko lakou mau uku ma ia la, a me kekahi mau la e ae e pili koke ana i ua la la, i mea e hiki ai i keia Keena ke hooponopono koke i na Buke.

Ma ke kauoha a ke Kuhina Waiwai.

G. WUNDENBERG,

Luna Buke Helu.

Keena Waiwai, Mar. 1, 1866.

 

O na poe lepera a pau ma ka Mokupuni o Oahu, i hai ia mai i ka Papa Ola, a i nana ia, a malama ia; a me kekahi poe e ae hoi i loohia i ka mai lepera i hai ole ia mai, a i nana ole ia hoi mamua, e pono lakou e hai mai i ka mea nona ka inoa malalo nei; a ina paha ua ike kekahi poe, i kekahi poe i loaa i ka lepera, e pono e hai mai.

T. C. HEUCK,

Kakauolelo o ka Papa Ola.

 

Ma keia ke kahea hou ia aku nei ka poe Mahiai a me ka poe hana lima, a me kekahi poe e ae e ke Kuhina Kalaiaina, ua pau ka manawa i haiia ai no ka hoouna ana mai i na mea e hoouna aku ai i ka Hoikeike o Parisa, no ka M. H. 1867, ma ka la mua o keia mahina, a ke hai ia aku nei nae, ina he poe kahi i koe e manao ana e hoouna mai i ka lakou mau mea, e pono e hoouna koke mai.

FERD. W. HUTCHISON,

Kuhina Kalaiaina.

Keena Kalaiaina, Mar. 3, 1866.

 

KEENA KALAIAINA,

Dek. 7, 1865.

I ka poe Mahiai, ka poe Hana Lima, a me na kupa o keia mau Mokupuni.

Ua oluolu i ka mea nona ka inoa malalo nei, ke hai aku ia oukou, ua poloai mai o Mons Denoyers Kanikela a Komisina o Farani e noho nei ma ke alo alii o Hawaii nei, i ke aupuni o ka MOI e komo pu aku i ka Hooikeike Nui, na hua o ka Oihana Mahiai a me ka oihana mikiala o na lahui a pau, e kukulu ia ana ma Parisa i ka la mua o Aperila, 1867.

Ke hai aku nei ka mea nona ka inoa malalo nei, e hoomakaukau oukou i na mea ulu maikai o keia Pae Aina, a oukou e makemake ai e hoikeike ia ma Parisa, ma ka Hoikeike Nui i oleloia maluna.

Ma ka aoao o ke Aupuni, ua oluolu ka mea nona ka inoa malalo nei, e malama a hoouna aku i Parisa i na ukana kupono, a oukou i manao ai e hoouna mai mamua ae o ka la 1 o Maraki e hiki mai ana. E pono e hoailona ia o waho penei:

"No ka Hoikeike Nui o Parisa. Hoouna ia mai e———, He kupa no———, Pae Aina Hawaii. Ma ka malama ana a ke Kuhina Kalaiaina." (Ma keia wahi e hookomo ai i ke ano o ka mea i hoouna ia.)

E pono e hoouna mai ka mea nona ka puolo me kekahi palapala, e hoakaka ana i ka mea e hanaia ke pau ka hoikeike ana.

F. W. HUTCHISON,

Kuhina Kalaiaina.

Ke hoike ia aku nei i na mea a pau, e hoouna mai ma ke Keena Kalaiaina na mea a lakou e manao ai e hoikeike ma Parisa, oia hoi, na mea i hana ia ma Hawaii nei. Na moena, a me na kapa maoli o kela ano keia ano, na ihe, na pololu, na lei palaoa, na ahu ula, na uluna o ka wa kahiko, na kua, a me na ie, kuku, na ohe kapala, na waa liilii, na hale liili a-mau o ka uka, na hale liilii pili na hue wai a me na umeke pawehe, na koi kalai waa, na upa niho mano, na lei hulu, na ao uwala, a me na ao maia, a me na mea kahiko o kela ano keia ano a pau loa, i hana lima ia ma Hawaii nei.

 

MAI KA LEPO MANU MAI.—I ka Poalima iho nei, ku mai ka moku kuna Odd Fellow mai na aina lepo manu mai. Ua halawai mai oia me ka ino ma ka moana, mai kona manawa i haalele ai ia Puakailima, (Baker's Island,) a hiki wale mai ia nei. He kanalilma kumamamakahi ka nui o kona mau la ma ka moana, a o ka ai a ka poe ee moku no kekahi mau pule, he barena paakiki me ka wai.

 

KA WAHINE O KA LUA.—Ma ke ku ana mai o ka moku Emalaina mai Kona mai, ua lohe ia mai, ua pau ka hana ana a ka "wahine o ka lua," i kana hana. Ua pau ka ike ia ana aku o ka pu-a ana o ka wena iluna. Ua ana iho la paha la!

 

AIHUE IA.—Ua lohe lauahea mai makou na aihue ia ka hale kuai o Frederick Fluger, ma ka po Poaha. A o na mea i lilo o ua hale kuai la, elua kihei huluhulu, a me kekahi apa lole kalakoa.

 

Haina o na ninau Baibala a S. Ek. K. Papaai.

Ninau 1. Owai ka inoa o ke kanaka i hana i na pahi oi lua a omau ae la ma kona uha akau?

Haina. Aole pahi i omau ia ma ka uha o kekahi kanaka. Nani hoi ha ka eha ole o ka uha oia kanaka i ka hou ia mai; a pehea la hoi e paa ai ke omau wale ae no ma ka alualu. Ua hemahema keia ninau au. Ke hai aku nei au ia oe, aole i ike ia iloko o ka Palapala Hemolele ma ka olelo Beritania, keia ninau ano ole. He ninau no paha, eia nae he hemahema loa.

Ninau 2. Owai ka inoa o ke kanaka a ke Akua i kau ai i ka uhane ino, a na Davida i hookani me ka lira, a haalele ka uhane ino?

Haina. Na Davida, 1 Nalii 16, 23, pela ma ka Baibala Beritania.

Ninau 3. I ka makahiki hea, a i ka malama hea hoi ka hanaia ana o ke kumu o ka hale o Iehova?

Haina. I ka ha o ka makahiki, i ka malama o Zio, oia ka walu o ka malama o ka makahiki civila ma ka olelo Hebera, III Nalii 6 37, oia hoi ka makahiki i hoonoho ia ai ke kumu o ka hale o Iehova.

Ninau 4. I ka malama hea, a i ka makahiki hea hoi ka paa ana o ka hale o Iehova?

Haina. I ka makahiki umikumamakahi, i ka malama o Bula, oia ka walu o ka malama o ka makahiki Sacreda ma ka olelo Hebera, III Nalii 6, 38. Eia kekahi, ma ka Baibala, Hawaii I Nalii, 6, 38; aole like pu me ka Baibala Beritania, ei ae ko ka Baibala Beritania maluna.

Ninau 5. Heaha ka hamare a me ke koi i kalaiia'i ka pohaku o ka hale o Iehova?

Haina. Aole i haiia mai ka inoa o ka hamare a me ka inoa o ke koi i kalaiia'i ka pohaku o ka hale o Iehova? Nana iho oe ma I Nalii 6, 7; penei no ia: Aole ka hamare aole hoi ke koi, aole mea hao i loheia maloko o ka hale i kona kukuluia ana.

Ninau 6. Heaha ka holoholona ma ka honua nei, aole o lakou alii?

Haina. Aole holoholona alii ole ma ka honua nei, o ke Akua ka Moi nui loa maluna o na kanaka a me na holoholona a pau loa, eia nae, ua hoonoho mai la oia i mau alii malalo iho ona, a oia no hoi ko lakou poo. Elike me keia, o ka Aeko ke alii maluna o na manu e lele ana ma ka lewa, o ka Liona hoi ke alii maluna o na holoholona ikaika, a pau loa a pela aku, & Kinohi 2, 19; 20.

Ninau 7. Owai la ke kanaka i pee ia Iehova iloko o kona lua me he Liona la?

Haina. O Davida, ka i pee iloko o ke ana ma Adalama, no kona makau ia Saula, I Nalii 24, 9: Ke i aku nei au ia oe, ua ano hemahema keia ninau, no ka mea, i mai o Davida, aole wahi i noho ole ia e ke Akua, aole mea nalowale iki ia ia, no ka mea, he puni ole kona ike, eia nae, ua pee o Adamu ma ia Iehova, me ka manao e nalowale laua imua ona. Aole i nalowale i kona mau maka, nolaila, makehewa ka olelo, he hiki ke pee kekahi kanaka ia Iehova. Kinohi 3, 8.

Ninau 8. Owai ka inoa o ke kulanakauhale o ka poe hea, i haiia ma ka Palapala Hemolele? Ua heia ninau, penei ka pololei loa, o ke kulanakauhale o ka poe hea i haiia ma ka Palapala Hemolele?

Haina. O Ierusalema ke kulanakauhale o na kulanakauhale i oi aku ke kaulana iwaena o lakou a pau, no ka mea, aia malaila ka luakini o ke Akua Mana Loa. Aia no hoi oia maluna o ka Aina Hemolele, i hoohiki'a ai no na mamo a Isaraela. He nui loa na kulanakauhale i ike ia iloko o ka Palapala Hemolele kahi a kuu hoa e kukala mai nei; I Nalii 6, 1;

Ninau 9. Owai ke 'Lii o ka poe Isaraela i lawehala?

Haina. O Solomona, 1 Nalii 6; 1, pela a hiki i ka hope oia Mokuna. E nana pu iho no hoi ma ka Baibala Beritania i unuhiia noloko mai o ka Latina Vulgate. Aole nae i oleloia, ua hoolilo aku o Solomona ia Isaraela i poe lawehala, eia nae, ua kau oia maluna o lakou i na auhau kaumaha.

Oia iho la no na haina a kou hoa i imi ai iloko o ka Baibala, i kapaia hoi he ninau Baibala. Ina e hoole mai oia i keia mau haina Baibala hiki no ia'u, ke alakai mai ia ia maanei i ike ia hoi na haina o na wahi ninau ana e waiho nei. Aka, ina he makemake kalakalai wale iho no, alaila, makehewa kona hoopuka ana i keia mau ninau noloko mai o ka Baibala. Aole no au e kanalua no keia mau haina. E hoi ana au i na pali Koolau, ke ninau mai la ka huila wiliko o Kikiwelawela. Me ka mahalo.  R. P. KANEALII.

Heeia, Koolaupoko, March 8, 1866.

 

He Kanikau no C. Niau.

Kanikau la he aloha,

Nou no e C. Niau,

Kuu makuakane hoi o ka hau anu o Kaala,

Mai ka lai lua o Waianae,

Kuu hoa pili o ke anu me ke koekoe,

Kuu hoa hele o ka ua me ka la,

Kuu makakane o ka hale kanaka nui,

Mai ka pihe ua lua i ke aumoe,

Moe iho au a huli ae aole oe,

Mahea la oe i hele iho nei,

Ei aku nei paha oe ma ka Hikina?

Ma kahi a ka la i hiki mai ai,

Hiki mai ko aloha, e uwe no au,

Auwe kuu makuakane hoi,

Na M. KAUANOE.

Kanikau la he aloha,

Nou no e C. Niau,

Kuu makuakane hoi, mahea oe i nalo iho nei?

I hakukoi ai o ko'u puuwai i ke aloha,

I moe ole ai o ko'u po,

Kuu makuakane hoi, kuu aloha pau ole ia oe,

Akahi au hoi kau e hemo ai, ua hele oe,

Kuu makuakane i ka malu hale o Mahilaula,

Aloha ia wahi au e luana ai,

Kou pili kaumaha i ko aloha,

E lia ai o ke kulu aumoe,

Moe au a huli ae, aole oe,

Kuu makuakane, ua hala aku nei,

Ka hooilina o kela kino e pono ai,

Kuu makuakane o ke kula loa o Lihue,

Mai ka makani he Waikoloa,

Auwe kuu makuakane hoi.

Na J. MAHULUA.

Kanikau la he aloha,

Nou no e C. Niau,

Kuu makuakane aloha iho nei,

Ua wehe i ka pili me na keiki,

Hele i ke ala hoi ole mai,

Noho hoi makou me ke aloha,

Kuu makuakane mai ka la lealea o Halealii,

Akahi a pau ka lealea ana, ua hele oe,

Hele ka makua o ka lehulehu,

I ulua mai ke aloha a nui,

Kuu makuakane i ka wai o Hoopilia,

Auwe kuu makuakane hoi.

Na C. KAPOLIWELA.

Kanikau la he aloha,

Nou no e C. Niau,

Kuu makuakane i ka hale malu a ke ao,

Mai ka ohu nee mai i na pali,

Pali mai na maka, ua hele oe,

Kuu makuakane hoi,

Kuu makuakane mai ka hau anu o uka,

Pau ka i ana ae, he makua,

Akahi kau e haule ai, ua hele oe,

Auwe kuu makuakane hoi.

Na D. KAANAANA.

Kanikau la he aloha,

Nou no e C. Ninau,

Kuu makuakane aole, ua hele iho nei,

Ua haalele i ka pili a kaua,

Kuu noho hookahi i ka luhi o kaua,

Aloha ko leo i ka pane ana mai,

I ka i ana mai, aloha oukou,

Auwe kuu makuakane hoi.

Na J. F. KAOAO.

Kanikau la he aloha,

Nou no e C. Niau,

Kuu makuakane mai ka la welawela o Kaena,

Huli aku kaua nana, o ka nani o Mokuleia,

Haaheo ka wai o Pololea iluna,

Kuu hoa hele o ke alanui,

Kuu makuakane o ke kai o Kaiaka,

Hoomaha aku kaua i ke one o Maeaea,

Kuu makuakane i ka wai o Ponanue,

O ia wai awili pu no me ke kai,

Kuu makuakane i ke anu o Hapuu,

Ku ka uhane i ka wai o Waimea,

Kuu makuakane o na hala o Kahuku,

Kuu makuakane o na pali o Koolau,

Aloha ia wahi au e hele ai,

Kuu makuakane o ka nuku o Nuuanu,

Anu ka po, ua hele oe,

Kuu makuakane o kahi ia iki,

Auwe kuu makuakane hoi.

Na K. KAMOE.

Kanikau la he aloha,

Nou no e C. Niau,

Kuu makuakane mai ka la lealea o ka aina,

Ke pua mai la iluna o ka laau,

Kuu makuakane mai ke kula la e Pokii,

Aloha ia wahi a kaua e hele ai,

Hele hookahi oe, aole lua,

Hopu hewa i ke aka o ke kino wailua,

Elua a'u mea nui e noho nei,

O ka-u o ke aloha ia oe,

I ko hele ana aku nei nalowale,

Auwe kuu makuakane hoi.

Na J. NANA.

Kanikau la he aloha,

Nou no e C. Niau,

Kuu makuakane hoi o ka ai hoeha ili,

O ua aina nei, ko kino ka mea aloha,

I ka nalo ana iho nei, i ka hale noho hookahi,

Hookahi no makua, he nui na keiki,

Ko leo ka mea aloha, ka uwe ana mai nei,

Aloha ino oukou, ke noho iho i ke ao,

Ke haalele nei au, i ka pili a kakou,

Pau ka ike ana i ka nani, i ka lau o ka Laila,

Ke noho nei makou, me ka-u me ke aloha,

Auwe kuu makuakane hoi—e.

Na L. MAAOE.

Kanikau la he aloha,

Nou no e C. Ninau,

Kuu makuakane o ka la o Honolulu,

Mai ka huikau o Polelewa,

Mai ka ululaau la o Mamala,

Ke malama nei no makou i ko aloha,

Kuu makuakane hoi, ke aloha pau ole ia oe,

Kuu makuakane o ka wai o Kemanowai,

Aloha ia wahi a kaua e noho ai,

No kuu makuakane ke aloha nui,

Auwe kuu makuakane hoi—e.

Na H. ANAHULI.

Kanikau la he aloha,

Nou no e C. Niau,

Kuu makuakane o ka la o ka lealea,

Huli iho nei makou, o kahi e ike ai,

Ua ike ia aku oe, ma ko kino wailua,

Elua mea aloha, ka maka i ka ike aku,

I ke kino, i ka oni mai,

Kuu makuakane hoi o ka la kohaihai,

O ke one o Kuihewa,

Auwe kuu makuakane hoi—e.

Na G. HIKAPOLOA.

Kanikau la he aloha,

Nou no e C. Niau,

Kuu kupunakane mai ka la welawela o Makalii,

Mai ka po anu o ka hooilo,

Kuu kupunakane mai ke kai leo nui o Waialua,

Aloha ia wahi a kaua e noho ai,

Kuu kupunakane i ke kaha ai ole o Kapaeloa,

Aia ka ai i ka ihu o ka Lio,

Kuu kupunakane o ka ia ku o Waimea,

Ka mea haule ole a maua,

Akahi kau e haule ai, ua hele oe,

Auwe kuu kupunakane hoi—e.

Na H. KUPAU.

Kanikau la he aloha,

Nou no e C. Niau,

Kuu kupunakane aloha ino,

Mahea ke ala i hele ai ea?

I haalele mai ai oe ia makou,

Ke u nei no makou ia oe me ka minamina,

Aloha kahi a kaua e hele ai,

E noho ai kaua, malu kukui o Hoopilia,

Auwe kuu kupunakane hoi—e.

Na D. KAANAENA-IKI.

Kanikau la he aloha,

Nou no e C. Ninau,

Kuu kupunakane aloha nui,

I noho hoomanawanui ai,

O kaua i ka pono a ka Haku,

Ka ula melemele a ke kaunoa i ke kula,

I noho hoomanawanui,

He nui oe, he kamalei na makou,

Auwe kuu kupunakane hoi—e.  Na J. KANA.

Na'u na W. K. KAPAELE,

Kakauolelo.

Kainea, Waianae, Oahu, Mar. 10, 1866;

 

OLELO KAHEA!

Ke kahea ia aku nei ka poe a pau loa i aie mai i ko kakou nei pepa, e hookaa ae i ka uku o ka oukou mau pepa, ma ka lima o ko oukou mau LUna lawe pepa, mamua ae o ka pau ana o ka Buke mua, oia hoi mamua ae o ka la 21 o Aperila. E malama ia keia Olelo Kahea i pono ai.

Ma ke Kauoha.

Honolulu, Mar. 9, 1866.

 

OLELO HOOLAHA.

EIA I KA PA AUPUNI I PAUOA NEI, HE mau Lio hele hewa. 2 Lio, 1 Bipi, e kudala ia i ka Poalua, la 20 o Maraki, 2 Lio i ka Poaha, 22.

Poalua.

Lio kane ulaula wiwi, T akau.

" wahine " " mau hao ano e.

Bipi " " keiki, m me he mu la ka hao.

Poaha.

Lio kane puakea, kuapuka, I akau, H H hema.

" " ulaula, kuapuka wiwi, he mau hao ano e.

Na Lio Hou Mai.

Lio kane ulaula, mau hao ano e.

" " " maikai, IV IMI M hema, ano e ak.

P. KAAIAHUA,

Luna Pa Aupuni.

Pauoa, Mar. 17, 1866.  48-1t*

 

OLELO HOOLAHA.

EIA MALOKO O KA PA AUPUNI MA WAIawa, Ewa nei, na Lio hele hewa he 15, i lawe ia mai. Ke ano o ka Lio me ka hao kuni, malalo iho.

1 Lio kane eleele kua puka, lae keokeo loihi, hao akau K. 1 Lio kane puakea, lae keokeo loihi, mau wawae keokeo eha, hao akau K2 P. 1 Lio kane ulaula, kiko keokeo ma ka lae, hao akau ano e, uha mua akau ano e. 1 Lio kane lokia kalakoa, lae keokeo nui, mau wawae keokeo eha, hao akau, hapala, hema hao ano e. 1 Lio kane ulaula hou, lae keokeo nui loihi, aole hao. 1 Lio kane ahinahina hou, aole hao. 1 Lio wahine ulaula kuapuka, hao hema KC. 1 Lio wahine puakea, hao hema (. 1 Lio wahine hulupala, lae keokeo loihi, me ke keiki, aole hao. 1 Lio wahine hulupala, lae keokeo nui loihi, mau wawae keokeo mahope, hao akau hao hapala. 1 Lio wahine hulupala, lae keokeo nui loihi, hao hema ano e. 1 Lio wahine ulaula, kiko keokeo ka lae, mau wawae keokeo mahope, hao akau hao ano e. 1 Lio wahine ulaula, lae keokeo nui loihi, hao hema hao ano e. 1 Lio wahine ulaula, kiko keokeo ka hale, me ke keiki, mau wawae keokeo ekolu, hao akau hao ano e. 1 Lio wahine ahinahina, kiko keokeo ka lae, aole hao.

Ina aole oukou e kii mai, a hala na la he 15 ma ka Pa Aupuni ma Waiawa, Ewa nei, alaila, e kuai kudala no au ma ka Poalima, oia ka la 23 o Maraki, 1866, hora 9 o ia la. E like pu me ke Kanawai Kivila.

J. KAHAULONO,

Luna Pa Aupuni.

Waiawa, Ewa, Mar. 14, 1866.  48-1t*

 

NA LAKO HALE!

—UA—

HIKI MAI NEI,

—KA—

MOKU PAPA O MAUA, OIA

—O—

"MAUNAKEA!"

A ua makaukau maua e kuai aku me na kanaka mai Hawaii a Kauai, i na Lako Hale, eia:

PAPA KALAKALA KEOKEO,

PAPA KALAKALA ULAULA,

PAPA HOLE I ME 1 ¼ INIHA,

PAPA KEPA,

AAHO.

Papa Hole Ulaula,

Papa kahiia, keokeo me ulaula,

Laau, 2x3 2x4 2 ½ x5 3x3 3x4

3x6 4x4 4x8 6x12

Pili kila me ulaula,

Pine, Pa.

OLEPELEPE,

PANI PUKA,

ANIANI,

KUI,

LAKA,

AMI,

PENA,

AILA.

&c., &c., &c., &c., &c.

KAMUELA A ME KIMO PELEKANE.

Honolulu, Mar. 15, 1866.  48-tf

 

ANOAI A KA MANAO!

OWAU O KA OUKOU KAUWA, KE KAHEA aku nei au i na

KEIKI PUNI NANI,

o na Kaiaulu o Hawaii nei, e kipa mai, e wae, e kilohi, no oukou iho, i na lole hoeha puuwai, o na opuu pua rose ma ko'u Hale Humuhumu Lole, oia hoi o

ANOAI A KA MANAO,

ma ke Alanui Nuuanu, ma ka Hale Humuhumu Lole mua o FISCHER, aia ilaila na lau Ahihi kahi i haiamu ai.  H. L. BAUMEISTER.

Mea Humuhumu Lole,

Honolulu, Mar. 15, 1866.  48-6m*

 

KA POE JURE MAOLI NO KE KAU O Aperila, e noho ana ma ka Hale Hookolokolo, Honolulu, ma ka Poakahi, hora 9, la 2 o Aperila, M. H. 1866.

W. P. Wood,  John M. Kapena,

Keolaloa, (Sumner,)  Wm. Buckle,

Nohea,   J. Kahai,

Kapahukepau,   John Alapai,

Jesse Aimoo,  H. Kahanawai,

N. Nihi,  Kalaauala,

Wm. H. Tell,  Mose,

E dwin Hall,  Kawainui,

W. N. Pualewa,  Kalaau,

S. K. Kuapuu,  Kawaihoa,

Kahalione,   H. Kolomoku,

Kanamu,   J. Papa.

L. McCULLY,

Kakauolelo o ka Aha Kiekie,

Hale Hookolokolo, 18 Mar., 1866.  48-2t

 

OLELO HOOLAHA.

O MAKOU, O NA MEA NONA NA INOA malalo iho nei, ke papa aku nei makou i na mea Bipi, Lio, Miula, Hoki, PUaa, aole e hele wale maluna o ko makou mau aina kuleana ponoi, e waiho nei ma Kauaula, i Lahaina, Maui, ina e loaa i ko makou Luna, e uku no $1.00.

M. Ihihi, Kamananui, Kaaeae, Waiholoa, Kaiama, Makakapu, Opunui, Ahaula, Waihoioahu, Pai, M. Makalua, Kainuawa, Kaaea, Paupau, Hanapono, Uleulekeahi, Hina, Kaaumoana, Kuikaalele, Kalawaia, Makaike.  S. W. NAILIILI.

Kakauolelo.

Puehuehu, Lahaina, Mar. 12, 1866.  48-1m*

 

OLELO HOOLAHA.

NO KA MEA, UA NONOIIA MAI KA MEA nona ka inoa malalo, e Peter Kalaikini, e hooiaio ia ka palapala kauoha a Ioba Kalaikini, o Lahaina, Maui, i make aku nei. Nolaila, ua hoikeia i na mea a a pau, ke pili, o ka Poalua, oia ka la 20 o Maraki, e hiki mai ana, ma ka hora 10 o ke kakahiaka, oia ka la a me ka hora e hoolohe ia keia nonoi ana, a a me na mea kue ke hoike ia mai, aia ma ka Hale Hookolokolo ma Lahaina, kahi e hana ai.

A. M. KAHALEWAI.

Lunakanawai Kaapuni o ka Apana Elua.

Lahaina, Mar. 3, 1866.  47-2t

 

OLELO HOOLAHA.

NO KA MEA, UA NONOI IA MAI KA MEA nona ka inoa malalo, e Hoomili w., e hooiaio ia ka palapala kauoha a Nailiili k, no Wailuku, Maui, i make aku nei. Nolaila, ua hoikeia i na kanaka a pau, ke pili, o ka Poakolu, oia ka la 4 o Aperila, e hiki mai ana, ma ka hora 10 o ke kakahiaka, oia ka manawa e hoolohe ai ka oiaio o keia nonoi ana, a me na mea kue i hooikeia mai, aia ma Wailuku, kahi e hana ai.

A. M. KAHALEWAI.

Lunakanawai Kaapuni o ka Apana elua.

Lahaina, Mar. 2, 1866.  47-3t

 

OLELO HOOLAHA.

NO KA MEA, UA NONOIIA MAI KA MEA nona ka inoa malalo, e Kaalu, e hooiaio ia ka palapala kauoha a Kalahoouka, o Honokohau, Maui, i make aku nei. Nolaila, ua hoikeia i na kanaka a pau, ke pili, o ka Poakolu, oia ka la 4 o Aperila, e hiki mai ana, ma ka hora 10 o ke kakahiaka, oia ka manawa e hoolohe ia keia nonoi ana, a me na mea kue ke hoikeia, aia ma Wailuku, kahi e hana'i.

A. M. KAHALEWAI,

Lunakanawai Kaapuni o ka Apana Elua.

Lahaina, Mar. 2, 1866.  47-3t

 

OLELO HOOLAHA.

NO KA MEA, UA NONOIIA MAI KA MEA nona ka inoa malalo, e Mrs. K. Rutherford, e hooponopono ia ka waiwai o William Rutheford, o Makawao, Maui, i make aku nei, a e hoonohoia o George E. Miner, i luna hooponopono waiwai. Nolaila, ua hoikeia i na kanaka a pau, ke pili, o ka Poakolu, oia ka la 5 o Aperila, e hiki mai ana, ma ka hora 11 o ke kakahiaka, oia ka la a me ka hora e hoolohe ai i keia nonoi ana, a me na mea kue i hoikeia mai, aia ma Wailuku, kahi e hana'i.

A. M. KAHALEWAI,

Lunakanawai Kaapuni o ka Apana Elua.

Lahaina, Mar. 2, 1868.  47-3t

 

OLELO HOOLAHA.

NO KA MEA, UA NONOIIA MAI KA MEA nona ka inoa malalo, e Kahale w, e hooponoponoia ka waiwai o Puna k, a me Napahi k, no Waihee, Maui, i make aku nei, e hooiaio ia kona pili ana ia laua i hooilina no ko laua waiwai. Nolaila, ua hoike ia i na kanaka a pau, ke pili, o ka Poakolu, oia ka la 4 o Aperila, ma ka hora 11 o ke kakahiaka, oia ka la a me ka hora e hoolohe ai ka oiaio o keia nonoi ana, aia ma Wailuku, kahi e hana'i.

A. M. KAHALEWAI,

Lunakanawai Kaapuni o ka Apana Elua.

Lahaina, Mar. 2, 1866.  47-3t

 

OLELO HOOLAHA.

NO KA MEA, UA NONOIIA MAI KA MEA NOna ka inoa malalo, e A. Mauae, e hooiaio i ka palapala kauoha a Kaama k, o Wailuku, Maui, i make aku nei. Nolaila, ua hoikeia i na kanaka a pau ke pili, o ka Poakolu, oia ka la 4 o Aperila, ma ka hora 10 o ke kakahiaka, oia ka la a me ka hora e hoolohe ai i keia nonoi ana, a me na mea kue i hoike ia mai, aia ma Wailuku, e hana'i.

A. M. KAHALEWAI,

Lunakanawai Kaapuni o ka Apana Elua.

Lahaina, Mar. 2, 1865.  47-3t.

 

$544!

MAKANA GULA NUI!

—E—

KOKUA I KA POE MAHIAI

—O—

HAWAII NEI!

Me kuu ake nui e hoohoihoi i ke kanu ana o ka Pulupulu Si Ailana, mawaena o na kamaaina o Hawaii nei, mai Niihau a ka lae o Kau, a e kokua no hoi i ka poe ilihune, ke manao nei au e haawi aku i na makana manawalea malalo nei, i ka poe e kanu ana a e mahi nui ana i ka Pulupulu, iloko o ka

MAKAHIKI 1866,

mai ka la mua o Ianuari, a ka la hope o Dekemaba, 1866. E haawiia'ku keia mau makana i ka poe e loaa ana iloko o ka malama o Ianuari, 1867.

1.—E uku ia kekahi kanaka maoli e kanu ana i ke "SI AILANA," i na eka he umi a oi ae paha, ke hoohua mai i na paona Pulupulu he 10,000 a oi ae, mai Ianuari 1, a hiki i Dekemaba 31, 1886, i ka makana gula, - - - - - $200.

2.—O ke kanaka e hooulu ana i ka Pulupulu i emi iho na paona malalo o ka ke kanaka mua, alaila, e loaa ia ia ka makana gula, - - - $100.

3.—O ke kanaka e hooulu ana i ka Pulupulu i emi iho i ko ke kolu, e loaa ia ia ka makana gula  $50.

4.—O ke kanaka e hooulu ana i ka Pulupulu i emi iho i ko ka ha, e loaa ia ia ka makana gula,  $40.

5.—O ke kanaka e kanu ana i ka Pulupulu i emi iho i ko ka lima, e loaa no ia ia ka makana gula,  $30.

6.—O ke kanaka e kanu ana i ka Pulupulu i emi iho i ka ke ono, e loaa no ia ia ka makana gula,  $20.

7.—O ke kanaka e kanu ana i ka Pulupulu i emi iho i ko ka hiku, e loaa no ia ia ka makana, He Wili Pulupulu.

8.—O ke kanaka e kanu ana i ka Pulupulu i emi mai i ko ka walu, e loaa no ia ia ka makana, He Wili Pulupulu.

9.—O ke kanaka e kanu ana i ka Pulupulu i emi mai i ko ka iwa, e loaa no ia ia ka makana, 4 buke Kuokoa, i humuhumuia a paa.

10.—O ke kanaka e kanu ana i ka Pulupulu i emi mai i ko ka umi, e loaa no ia ia ka makana, 4 buke Kuokoa, i humuhumuia a paa.

NA RULA O KA MAKANA ANA AKU.

RULA 1. —O keia mau makana a pau, e haawi ia i ka poe i loaa iloko o Ianuari, 1867.

RULA 2. —Na ke kanaka wale no nana e mahi i ka ka Pulupulu, ia ia wale no e loaa aku ai ka makana, aole ka Pulupulu a kekahi mea e ae i kanu ai.

RULA 3. —Aole e loaa aku kekahi o keia mau makana aia he Kanaka Hawaii, (koe na haole.)

RULA 4. —O na Pulupulu a pau loa, i loaa ai keia mau makana, e kuai mai lakou ia'u, a na'u no e malama pono i Buke Hooponopono no na paona a kela mea keia mea i kuai mai ai.

RULA 5. —Ina elua a ekolu kanaka paha, i lawe mai i na paona he Umi Tausani a keu, e haawi ia aku no ka makana mua i ka mea nona na paona i oi ae, a o ka mea malalo iho e loaa no ia ia ka makana elua, a pela aku.

Nolaila, e o'u mau Makamaka mea aina, e ala ae oukou; a e hooikaika nui oukou, e hana pauaho ole, a mai hoopalaleha, no ka mea, e loaa auanei ia oukou na makana maikai. O ka poe i hana hooikaika me ke akamai, e loaa no ia lakou na makana maluna ae nei.

O ka poe e makemake ana i na Hua Pulupulu Hou e kanu, mai Kaletona Hema mai, e loaa no ia lakou ma ko'u Halewili Pulupulu, aia ma ka Hale Leta.

47-1 a m.  H. M. WINI.

 

OLELO HOOLAHA.

AIA MA KO'U HALE KUAI MA KAPANO, Koolauloa, na

LOLE MAIKAI O KELA ANO KEIA ANO,

e huki ia ai ko oukou mau naau, no ka nani luaole a hiwahiwa no hoi no na kane a me na wahine, e hele ai a linohau, i ua mea he nani. Eia kekahi, e kuai kukai aku no wau me na hoa e hele mai ana e kuai me a'u, no ka

Puaa, Moa, Pepeiao, a me ka Pineki.

Nolaila, e wikiwiki e na makamaka, no ka mea, he oluolu loa ke kumukuai o ka LOLE.

AIONA, (PAKE.)

Kapano, Koolauloa, Oahu, Mar. 6, 1866.  47-4t*

 

OLELO HOOLAHA.

MA KA WAIWAI O KAIKAINAALII.

E ike auanei na kanaka a pau, na mea waiwai moloko o ka waiwai o Kaikainaalii, i make aku nei, o ka poe i aieia, o ka poe pilikino, a pili paha ma kahi ano e ae, na lakou e hele mai a e hoike mai ia lakou iho imua o ka Mea Hanohano, G. M. Robertson, kekahi Lunakanawai o ka Aha Kiekie, ma ka Hale Hookolokolo i ke kulanakauhale o Honolulu, i ka Poakolu, oia ka la 21 o Maraki, e hiki mai ana, i ka hora 10 o kakahiaka. Ia manawa, e hooponopono ia ka moo waiwai a ka mea i make, a e hoike mai i kauwahi kumu ina paha he kumu oiaio kona i ole e hookoia ua moo waiwai la, a e hoopauia ka oihana a ua mea hooponopono waiwai la.  L. McCULLY,

Kakauolelo o ka Aha Kiekie.

Honolulu, Mar. 6, 1866.  47-2t

 

OLELO HOOLAHA.

MA KA WAIWAI O NAPAPAI (W.)

E ike auanei na kanaka a pau, na mea waiwai maloko o ka waiwai o Napapai (w,) no Lahaina, Maui, i make aku nei, o ka poe i aieia, o ka poe pili kino, a pili paha ma kahi ano e ae, na lakou e hele mai a e hoike mai ia lakou iho, imua o ka Mea Hanohano o R. G. Davis, kekahi Lunakanawai o ka Aha Kiekie, ma ka Halehookolokolo i ke kulanakauhale o Honolulu, i ka Poalima, oia ka la 23 o Maraki, e hiki mai ana, i ka hora 10 o kakahiaka. Ia manawa e hooponopono ia ka moo waiwai a Lukia Aliona (w,) a me J. W. Keawehunahala (k,) na luna hooponopono waiwai a ka mea i make, a e hoike mai i kauwahi kumu, ina paha he kumu oiaio kona i ole e hookoia ua moo waiwai la, a e hoopauia ka oihana a ua mea hooponopono waiwai la.

WM. HUMPHREYS,

Hope Kakauolelo o ka Aha Kiekie.

Honolulu, 9 Mar., 1866.  47-2t

 

OLELO HOOLAHA.

MA KA WAIWAI O MANOHA K, ME KAAEA W.

E ike auanei na kanaka a pau, na mea waiwai maloko o ka waiwai o Manoha (k,) a me Kaaea (w.) no Kapalama, Oahu, i make aku nei, o ka poe i aieia, o ka poe pili kino, a pili paha ma kekahi ano e ae, na lakou e hele mai a e hoike mai ia lakou iho, imua o ka Mea Hanohano, G. M. Robertson, kekahi Lunakanawai o ka Aha Kiekie, ma ka Hale Hookolokolo i ke kulanakauhale o Honolulu, i ka Poaono, oia ka la 24 o Maraki, e hiki mai ana, i ka hora 11 o kakahiaka. Ia manawa e hooponopono ia ka moo waiwai a Niau (k,) me Komoikehuehu, na luna hooponopono waiwai a ka mea i make, a e hoike mai i kauwahi kumu, ina paha he kumu oiaio kona, i ole e hookoia ua moo waiwai la, a e hoopauia ka oihana a ua mau mea hooponopono waiwai la.  WM. HUMPHREYS,

Hope Kakauolelo o ka Aha Kiekie.

Honolulu, 10 Mar., 1866.  42-2t

 

OLELO HOOLAHA.

E IKE IA MA KEIA, KE PAPA LOA AKU nei na mea nona na inoa malalo nei, i na mea a pau loa; ua hookapu loa aku maua, aole e ki ia na manu lele, a me na holoholona a pau loa o kela ano, keia ano, e hele ana maluna o ko maua aina, o

MANANA NUI, MA EWA, OAHU.

E hoomaka kona kapu ana, mai ka la e puka aku ai keia Olelo Hoolaha.

BARNARD & RAYMON.

Honolulu, Mar. 7, 1866.  47-1m

 

OLELO HOOLAHA.

E IKE AUANEI NA KANAKA A PAU, NA mea kuleana iloko o ka waiwai o Peter Dach, o Lahaina, Maui, i make aku nei, o ka poe i aeia, a pili kino, a pili paha ma kekahi ano e ae, na lakou e hele mai a e hoike mai ia lakou iho, imua o ka Mea Mahaloia, A. M. Kahalewai, ka Lunakanawai Kaapuni o ka Apana Elua, ma ka Hale Hookolokolo ma Lahaina, i ka Poakolu, oia ka la 28 o Maraki, e hiki mai ana, i ka hora 10 o kakahiaka. Ia manawa e hooponopono ia ka moowaiwai a A. Manaka a me Mrs. Wahineino, na luna hooponopono waiwai a ka mea i make, a e hoike mai paha i kahi kumu, ina he kumu oiaio ia, i ole e hookoia ua moowaiwai la, a e hoopau ia ka laua oihana.

A. M. KAHALEWAI.

Lunakanawai Kaapuni o ka Apana Elua.

Lahaina, Mar. 2, 1866.  47-3t

 

OLELO HOOLAHA!

Ke kauoha ia aku nei na Luna a pau o ka Nupepa "KE AU OKOA," e hooili mai ma ka lima o ka Luna Pai, o J. H. Black, i na dala a pau loa, a ia ia wale no, aole ia hai, oia hoi na dala no ka lawe pepa, na olelo hoolaha, na kanikau, a me na mele; aole hoi e ae ia kekahi palapala hookaa ke ole i kakauia ma kona inoa mai keia manawa aku, e kapaeia no.  MA KE KAUOHA.

Keena Oihana, Aukake 22, 1865.

 

Makemake i kanaka hana.

Ke makemake nei au e Hoolimalima i mau kanaka hana ma ka mahina Ko ma Halawa i e umi kanaka, i eono malama e noho ai. E haawi no au i ka uku kupono, me na dala ohi mua.  KIMO PELEKANE.

Honolulu, Mar. 3, 1866.  46-1m

 

HE MAU PAPALE NANI HOU LOA!

I O'U MAU HOA PUNI NANI, A MAU MEA hou, ke hai ia aku nei, ua loaa mai ia'u he mau

PAPALE HOU MAIKAI LOA!

A ME

NA LIPINE ANO MAIKAI LOA!

no ke kumukuai haahaa, mai ka $1.50, a hiki i ka $10.00. E hele mai a e wae i ko oukou makemake, e kipa, he wahi oluolu no e luana ai.

M RS. J. H. BLACK.

Alanui Papu, Honolulu, Oct. 27, 1865.  28-

 

OLELO HOOLAHA!

—A KA—

AHAHUI HOOHOLO MOKU MAOLI KULOKO.

O KO HAWAII NEI PAE AINA.

No ke kuia ana mai nei o ka Mokuahi KILAUEA, i ka poino, nolaila, o

KA MOKU KUNA HOU,

—KA—

"ONWA RD,"

LAM BERT, ke Kapena,

E holo mau ana ia i Kawaihae, a e ku ana ma Honoipu, ke malie kupono.

Kekahi Moku Kuna o ka Ahahui,

—KA—

"AL BERNI,"

E holo mau ana keia moku i Hilo, a e ku ana ma Lahaina a me Honoipu, i keia la, (Poakahi,) ma ka hora 4 ahiahi. He moku paa a maikai loa keia, kupono no ka poe ohua.

Ka uku o ke keena Kapena, he $10.00, o ka holo ana aku, a he $10.00, no ka hoi ana mai.

KA MOKU KUNA

"ANNIE LAURIE,"

I HANA HOU IA IHO NEI A PAA pono, e holo mau ana ia i KOLOA a me WAIMEA, a hiki i ka wa e paa pono loa ai.

KA MOKU KUNA

"NE TTIE MERRILL,"

E holo mau ana ia mai Honolulu aku nei, a i Lahaina a me Maalaea.

N. B.—Ina ua poino loa io ka Mokuahi KILAUEA, e hooholo koke ia ana no kekahi mau Mokuahi hou, e kupono ana i keia mau mokupuni, i ka wa pokole.

No na mea e pili ana i keia mau moku, e ninau no ia  CAPT. FRANK MOLTENO,

a ia  JANION, Green & Co.,

33- tf  Agena H. S. & G. I. I. N. Co.

 

HE MAU AINA MAIKAI

E KUAI KUDALA IA ANA!

E KUAI KUDALA IA ANA NA AINA O LEVI HAALELEA, e ka mea nona ka inoa malalo nei, ma ka Hale Hookolokolo, ma Honolulu, iloko o Aperila, la 2, M. H. 1866, i ka hora 12 o ke awakea. A o ka inoa o ua mau aina la e kuai kudala ia ana, eia iho malalo nei:

Aina.   Kahanui,  Aia ma Molokai.

"   Kipu,  "  "

"   Manawainui,  "  "

"   Kapuahi,  "  "

"   Kumuele,  "  "

"   Awawaia,  "  "

"   Makanalua,  "  "

"   Kamanoni,  "  "

"   Wainiha,  "  Kauai.

"   Waikoko,  "  "

A e ike no na mea a pau e makemake e ike i na kii o ua mau aina la, ma ka Hale Kudala o ka mea nona ka inoa malalo nei.  H. W. SEVERANCE.

46-4 t  Luna Kudala.

 

OLELO HOOLAHA.

OWAU O KA MEA NONA KA INOA MAlalo iho nei, ke hookapu loa aku nei au i ko'u mau aina e waiho la ma Kalihi, Mokupuni o Oahu, o

KEONEPANEE A ME PUAWAAHAKEA.

Aole e hele wale kekahi holoholona, Bipi, Lio, Miula, Hoki, PUaa, a me na holoholona e ae, aole e hele wale ma ua mau aina la o'u i hai ia ae la maluna, mai ko na kanaka a me ko na Haole. Aole hoi e hele wale kekahi kanaka maluna o ua aina la, a lawe wale i kekahi mea maluna, me kuu ae ole. Mai ka la e hoolaha ia ai ma ke akea, a ina e ike ia a e loaa paha kekahi o na mea i hoike ia maluna, alaila, e hoopii no au e like me ke Kanawai. Mai ka la aku e puka ai o keia ma ka nupepa, e kapu loa ua mau aina la.

Owau no,

PI CKFORD & HUDDY.

Ma rch 1, 1866.  46 4t

 

OLELO HOOLAHA.

NO KA MEA, UA HOONOHO IA MAI NA mea nona na inoa malalo, i mau Luna Hooponopono no ka waiwai o Thomas Phillips, o Lahaina, i make aku nei. Nolaila, ke kauoha ia aku nei na mea a pau i AIE aku ai, e hoike koke mai ia maua i ka lakou mau bila, mamua ae o ka la 31 o Maraki, e hiki mai ana.  JOHN W. KAHUE,

A. MANAKU,

Na Luna Hooponopono Waiwai.

Lahaina, 19 Feb., 1866.  45-4*

 

OLELO HOOLAHA.

E HALAWAI ANA KA POE HUI O KA Ahahui Mahi ko o Lahaina, ma Honolulu, ma ke keena o SAMUEL SAVIDGE, ma ka Poaono, la 31 o Maraki, M. H. 1866, ma ka hora 10 o kakahiaka. Ua makemake ia e pau loa mai, oiai, he mau mea nui kahi e waiho ia mai ana imua o ka halawai.

Honolulu, Mar. 1, 1866.  46-5t

 

OLELO HOOLAHA.

NO KA MEA, UA NOIIA MAI KA MEA NONA ka inoa malalo, e Kalili w, e hooiaioia ka palapala kauoha a Kapele w, o Waipio, Hamakua, Hawaii, i make aku nei: Nolaila, ua hoikeia i na kanaka a pau, ke pili, o ka Poalua, oia ka la 3 o Aperila, 1866, e hiki mai ana, ma ka hora 10 o kakahiaka, oia ka manawa e hoolohe ai i ka oiaio o keia noi ana mai, a me na mea kue i hoikeia, aia ma Waipio, Hamakua, kahi e hana ai.  D. K. NAIAPAAKAI,

Lunakanawai Kaapuni o ka Apana Ekolu.

Kapaau, Kohala, Feb. 26, 1866.  46-3t

 

OLELO HOOLAHA.

MA KA WAIWAI O KUKUI (K.)

No ka mea, ua noiia mai ka Mea Hanohano G. M. Robertson, Lunakanawai o ka Aha Kiekie, e Kamehaiku (w,) no ka hookohu ia ia i luna hooponopono waiwai o Kukui (k,) no Honolulu, Oahu, i make aku nei: Nolaila, ua hoikeia i na kanaka a pau loa, ke pili, o ka Poaono, oia ka la 24 o Maraki, i ka hora 10 o kakahiaka, oia ka la a me ka hora i oleloia no ka hoolohe i ka oiaio o keia noi ana mai, a me na mea hoole i hoikeia, aia ma ka Hale Hookolokolo ma Honolulu, Oahu.  WM. HUMPHREYS,

Hope Kakauolelo o ka Aha Kiekie.

Honolulu, Mar. 9, 1866.  47-3t