Ke Au Okoa, Volume I, Number 49, 26 March 1866 — Page 1

KE AU OKOA.

BUKE I--HELU 49.}  HONOLULU, MONEDE, MARAKI 26, 1866.  {$2.00 NO KA MAK.

 

"KE AU OKOA,"

E HOOPUKA MAU IA'NA I

KELA POAKAHI KEIA POAKAHI,

MA KA

HO RA EWALU O KAKAHIAKA.

ELUA DALA NO KA MAKAHIKI hookahi, he kanalimakumamalua nupepa ia. E uku e ia ke DALA HOOKAHI no ka hapalua makahiki mua, iloko o na mahina mua eono; a pela ho ka lua o ke dala, e uku e ia iloko o ka hapa hope o ka makahiki.

 

"KE AU OKOA."

KA UKU O NA

OLELO HOOLAHA.

NA OLELO HOOLAHA—No na lalani he 10, oia hoi 1 iniha, no ka hoopuka hookahi ana, $1.00; alua hoopaka ana, $1.50; ekolu, $1.75; hookahi mahina, $2.00.

Aia no ke keena o "KE AU OKOA" ma ka Hale Paipalapala Aupuni, maluna ae o ka Hale Pai.

 

HE KAAO O HABIBA!

He Kaao no Arabia.

HELU 15.

O Iameha ke kaikuahine o Sira, ua kaulana oia no ka nani, ka nohenohea, a me kona akamai i ka noonoo ana ma na mea a pau; a he puloku mau ia no hoi oia e ko laua mau ohana malalo mai o laua; oiai nae, oia kahi i hilinai nui i ka ikaika o kona kaikunane.

No kona ike maoli paha e lanakila ana auanei o Habiba ma maluna o na ohana o kona kaikunane, nolaila, olole aku la ia i kona kaikunane penei :—

"E kuu kaikunane, mea paha o manao mai i ka'u mau mea e hai aku ai, ua uhi ia e na manao nui hiki ole ia oe ke ae mai ia'u. Ua ike ia i na la i hala ae nei, he kanaka koa lua ole o Salamisa, e manao no au o kou hoa paio kupono no ia, aka, ke manao nei au ua kahuli ae ke ano o na hoku o ka lani ma ko lakou la aoao.

"Ua hilinai nui ko lakou lanakila i keia mau la maluna o ka ikaika o ka ohana a Benihilala. Oia ohana a me na kanaka a pau loa e pili ana i ua ohana la, ua lanakila oe maluna lakou.

"Aka, e kuu kaikunane, ua kahuli na lani, a ua loli pu ae no hoi me na hoku mai ko lakou mau kulana ae.

"He olelo mau i laulaha ae mao a maanei e i ana, aole e hele papakahi mai ana ka poino. Ua hilinai nui kakou ma ka pomaikai ili wale mai; aohe nae kakou i manao iki, e uhai aku i kona ano mau mai ka hookumu ana.

"Nolaila, e noonoo pono loa oe i ke ano mau o ka pomaikai i uluhia mai maluna o kou mau enemi; a e imi aku hoi oe i na kumu kupono, i pakele a i mau ai hoi kou ola a me kou noho alii ana, oiai, ua hilinai nui hoi ma kou ikaika a me kou noiau, ke ola a me ka pakele o ka ohana Kaleba."

"He nui wale no hoi ka manawa e noonoo ai," wahi a Sira, "no keia mau mea, mahope iho o ko'u lanakila ana maluna o Salamisa. Aole mana ona i koe, no ka mea, ua kue mai ka lani i kana mau hana. Ua ike au i kona hoohiolo ia ana, aka, ke ala hou mai nei oia mai kona kahuli ana ilalo. Ua hookuu mai ia i kana keiki imua, i mea e keakea mai ia ia'u.

"O Arabia holookoa nei a pau loa, ua haiki loa no ko'u lanakila; a heaha la auanei ka'u mea e haawi pio wale aku ai ia'u iho i keia mau enei o'u? E hiki no i na hoku i maliu mai ia oe ke hana e like me ko lakou makemake; aka, ina lakou e kue mai ia'u, na'u no e hooaiai ia lakou me ka makau i na enemi a lakou e manao nei e kue mai ia'u."

Ia Iamena a me kona kaikunane e kamailio ana no keia mau mea, ku mai ana ka ea o ka lepo, o ike ia aku la o Salamisa e holo mai ana ma ke poo o kona mau puali koa imua o na halelole o Sira, a me na ohana hoi a Kaleba, oiai, he eiwa wale no mile mai kona mau halelole aku.

I ka ike ana mai o Sira i ka holo aku o Salamisa ma,  liuliu ae la no hoi o Sira i kona mau alihikaua, ua like ko lakou nui me ko Salamisa poe alihikaua. Holo mai la lakou a halawai pu me ko Salamisa poe koa. O Sira maluna ia o kekahi lio keokeo nui e holo ana mao a maanei o kona mau puali koa.

Ia ia i ike mai ai ia Salamisa, hookiliopu loa mai la oia i kona lio me ka haaheo nui. Na ia mea i ho-a mai i ka inaina iloko o ka puuwai o Salamisa, a hoonene aku la oia e holo aku e kaua ia Sira, aka, olelo aku la o Habiba, "Aole, e kuu makua! aole o oe ke hele aku e kaua me ia, oiai, ua malama maikai mai ka lani ia'u, a ua hoouna ia mai au e haawi aku i ka hoopai ino maluna o kou mau enemi a pau loa."

"He opiopio loa oe," wahi a ka makuakane, "e Habiba, aole i oolea pono loa kou mau lala, e hiki ai la ia oe ke kaua aku me keia nunui."

"Mai kanalua oe," wahi a Doratila, "o ke koa i puka mai mailoko mai o kou puhaka, ua kupono ia no kou kulana kiekie. E hoomalielie oe ia oe iho me ka nani i loaa mai ia oe, a e waiho aku oe i ka hakaka ana me kuu Habiba, a e ike auanei oe he mea ole na nunui a pau loa ia ia!"

No na noi ana aku a Habiba, Doratila a me Amirala, e waiho aku na Habiba e kaua pu me Sira, oia ka mea i akakuu mai ai ka manao aa a koi hoi o Salamisa, a waiho aku la ia i na mea a pau o ke kaua i kana hanau kama.

Waiho ae la o Habiba i ka ihe a kana kumu i haawi mai ai ia ia, a lalau aku la oia i kekahi ihe Arabia i mea e kulike ai laua ma na lako kaua me kona hoa paio o ka la makani. Wehe ae la ia i ka mea papalu o kona maka, a holo aku la imua o Sira, me ka haawi aku i na hoailona o ka hoowahawaha ia Sira.

No keia mea, hele mai la o Sira imua, me ka olelo mai me ka olelo hoonaikola, "Maikai wale hoi kou mau maka, a hoehoene hoi

kou leo me he leo la no ka wahine haku mele. Ka, aole auanei oe he wahine?" "A mamuli e ike auanei oe, he wahine paha a aohe paha, kou hoa hakaka o keia la," wahi a Habiba me ka ukiuki.

No keia mea, olelo mai la o Sira, "A! ke hoomanao nei au i kou mau la pokeo wale; ua ike au i na la au e pipii ana oe i na kuli o ko wahi makuahine o Amirala. Nani maoli ou mau wahi maka! He mea oiaio paha, aole i hoouna mai ko wahi makukane e kaua pu me a'u! Ua ike no ia he poe aloha na'u ka poe opiopio. O hoi a hai aku ia ia ke kali nei au nona—a aole au e hakaka ana me kekahi poe e ae, aia wale no he kanaka nunui."

"Hoowahawaha kuu makuakane," wahi a Habiba, "i ka hakaka ana me kakahi o kana mau kuapaa kipi. Ua ao ia au, ia'u e hii ia ana e na lima o kuu makuahine, e hoowahawha aku i ka poe kipi."

Pane hou mai la o Sira, "Aka, e ke kanaka opiopio, aole o'u makemake e kono ia au e hoaahu i kou makuahine me ka aahu eleele no kou make opiopio ana. O hoi, a lawe mai i ko wahi makuakane i o'u nei; oiai he ikaika i na la i kaahope ae nei, aka, ke hai aku nei au i kona poo i mea makaikai na kuu poe ohana koa."

Ia wa, olelo aku la o Habiba, "Ua hai aku nei au ia oe e ke kuapaa ino, aole e ae mai kuu makua ia oe e hakaka pu me ia. He kanakolu wa au i hahai ai ia ia ma ke kahua kaua, me ke mele ana i kona mau lanakila ana; a o kou aa ana aku ia ia i keia wa, aole ia he mea e pakui aku ai i kona nani. Mai hoopilikia oe ia oe iho i ka hoouna ana i holoku kanikau no kuu makuahine; aole no hoi au pela i kou, ua ike lea ia aole oe i ike i ka inoa o ko'u makuahine, aka, ke hai aku nei au ia oe, he hiki ia'u ke haawi aku i holoku kanikau i kou kaikuahine Iamena."

"E ka ouo hupo," wahi a Sira, me ka hoonee pu mai i kona lio imua, "ua kono ia au e oli mau i na lanakila o kou makuakane, no ka mea, o na ohana a Kaleba ia mau la, he poe kuapaa. A ka la apopo e oli ana kou makuahine a me ka wahine au i lawe mai nei mai ka waoakua mai, i ko'u lanakila. E hoopaa ia ana laua e kuu mau kupee hao i ka la apopo a i ole ia e huipu ia ke kikohu ana o ko olua mau koko i ka honua me ko olua."

I ka pau ana o kana olelo ana i keia mau mea, kiola mai la ia i kana ihe me ka ikaika i ka umauma o Habiba, aka, haka pololei aku la ko Habiba mau maka ia hou ana mai, a oniu ae la keia i kana ihe me ka hikiwawe loa, hala ae la ia, a haule aku la he hookahi haneri kapuai mai kahi aku a laua i hakaka ai.

I ka pau ana hoi o kana, hoopololei aku la o Habiba i kana ihe i ka puu o Sira, a olelo aku la, "Ua puana ino mai nei oe i ka inoa o kuu makuahine a me kuu wahine me ka hoonaukiuki ino mai ia'u, me he kanaka makau wale ino loa la. He kaikuahine kou he omaimai nae oia, a e oi aku ana nae kona omaimai mahope iho o kou make ana."

Alaila, pai iho la ia i kana ihe me kona lima, a i hou aku la ia Sira, "E hele oe a e lalau iho i kau ihe i kiola hewa ia ai e kou hawawa. O ii i ko ihe, no ka mea, he hilahila au ke hakaka me ka mea i paa ole i kana ihe mamua, nolaila, aole oe i kupono i ka hakaka ana me a'u i keia hora, ke kuhi nei au he akamai oe i ka lawelawe ana i na mea kaua."

I ka lohe ana o Sira i keia mau olelo a Habiba, ua hoenaena loa ia kona huhu, a holo aku la ia a lalau iho la i kana ihe, a hou mai la i kana ihe ia Habiba me kona ikaika a pau loa. I ka lele ana mai o ka ihe, alo iho la o Habiba ma ka aoao o kona lio, a palihi wale mai la no ke palaulau o kona keehi i ka ihe, a ku aku la a paa i kekahi kumu laau nui.

I ka hala ana o kana hou ana, kiola iho la o Habiba i kana ihe ilalo, a i ka ike ana mai o Sira ia mea, pii hou ae la kona huhu enaena, oiai he hailona ia o ka hoowahawaha aku i ka hoa paio. Huki ae la o ua Sira i kana pahikaua, a uhau mai la ia Habiba, a o na hauna a pau loa, ua haule iho ia maluna o na pale ana a pau loa a Habiba, me he paka ua hekili la. Ma keia hakaka ana, me he mea la ua like no na ikaika o na koa a i elua; aka, ma ke akamai a me ka waipahe o ka hauna a me ka pale ana, aole e loaa aku ke keiki nana i au na kai hanupanupa o na mokupuni ehiku. O na hou ana mai a Sira a pau loa, ua paa mua e aku no ia i ka pale ia, a ia ia i hapai ae ai i kana pahikaua e uhau mai me ka manao oia no ka hauna make loa o Habiba, aka, ike e aku la no o Habiba, a pale ae la ia. I ka hala ana ae no, lele ana ka lima o Sira i kahi e me kana pahikaua. Hoao iho la o Sira e hoohuli ae i kona lio me kona lima hema a holo, aka, hookahi paha imo ana a ka maka, haule ana ke poo o ua kipi nei ilalo.

I ka ike ana mai o na aoao a i elua mai ka hoomaka ana mai o ka hakaka a hiki wale i ka pau ana, ua hoopiha la ko lakou mau

puuwai i ka mahalo pau ole ia Habiba, oiai, he wahi keiki wale no ia, a he kanaka nui hoi o Sira. I ka haule ana o kona poo ilalo, kani mai la na leo hulo, a uwa mai la hoi ka pihe ma na aoao a i elua, me ka hooho ana me na leo wawalo, "Aohe lua! Aohe lua! Aohe lua e like aku ai me ka makahiapo a Salamisa!!"

I ka ike ana mai o na ohana a Kaleba ua make ko lakou alii, nolaila, puehu ae la lakou ma o a maanei, e ninaninau like ana pehea la auanei lakou e hiki ai ke holo, a e pakele ai lakou mai ka noho hookauwa ia ana e ko lakou alii kahiko e Salamisa. Aka, i ka wa i ike mai ai ka ohana malalo o Salamisa i ko lakou manao, hoopuni ae la lakou i na enemi.

O Habiba hoi a me kekahi mau alihikaua, komo kino okoa aku la lakou iloko o na halelole o ka ohana a Kaleba, me ka ninau aku i kela a me keia mea, e alakai a e kuhikuhi mai hoi ia ia i kahi i noho ai o Iamena. Kuhikuhi ia mai la oia, e noho ana o ua o Iamena iluna o kekahi ulili i haka ia a kiekie, kona wahi no hoi ia e nana mai ai i ka hakaka mawaena o kona kaikunane a me ka o Arabia.

O na alihikaua a pau i hele pu aku ai me Salamisa, ku puni ae la lakou a puni ko lakou alii opio; a hoouna aku la o Habiba e hao i na mea a lakou a pau loa e hoao ana e hao, e hoopakele mai ko lakou mau lima mai. I ka wa a Habiba e hoouna aku i keia mau olele, kahaha iho la ko Habiba manao, no ka mea, huli mai la na kanaka a pau loa mamuli o ka noho'na kahiko, oia hoi mahope o Salamisa. Hai ia mai ia Habiba ke kumu nui o ka maliu ana mai o ka ohana o Kaleba, no ka waipahe wale no o kana mau hana. Hele mai la o Salamisa i ukali ia mai e kona aoao palupalu, a me Doratila i na halelole o ka ohana a Kaleba.

I ko lakou hiki ana aku ilaila, hoea mai la o Iemana ma kona ano pio, aka, hoomalielie au la o Habiba ia ia ma ka olelo ana ae i kona makuakane penei:

"E kuu alii makuakane e, ua haawi aku au ia Iemana i ka'u olelo, e ahonui ana oe ia ia, oiai, ma kona mau noonoo ana a pau loa, ua komohia mai iloko o'u na manao ana ua kupono ia ke noho alii maluna o ka ohana a Kaleba. O na manao ino a pau loa i kue mai ai ia kakou a me kou mau ohana, ke hilinai nui no ia maluna o na manao hupo o kona kaikunane; a ua noi mai nei oia ma kou ahonui lokomaikai e hoihoi hou ia oia me ko kakou mau ohana, a i ke ahonui hoi o kuu makuahine o Amirala a me Doratila."

No ka hilinai nui loa o Salamisa ma na olelo a pau loa a kana hanau kama, nolaila, ia i hilinai ai i na mea a pau loa a kana keiki i olelo mai ai. No ka ike no o Salamisa aole i huipu ia ka manao o kona kaikuahine me ia, nolaila ia i hoopoina ai i na mea lapuwale a kona kaikunane i hana ai; a no ko Iamena manao no hoi kahi e uhai mau no ia, mahope o ka buke Korana, (oia no hoi ka buke a ka poe Arabia i manao nui ai,) a no ia mea olelo mai la o Salamisa penei:—

"E ke alii wahine opio, ke hui aku nei au i ko'u olioli me kuu hanau kama, ma ka hoihoi hou ana ia oe ma kou kulana mau. Ua hoohanohano mai oia ia oe ma na mea a pau loa e hiki ai ia'u ke hilinai aku." Ia wa koke no hoi i hilinai mai ai o Amirala a me Doratila i ka Salamisa olelo ana, a huipu mai la no hoi na ohana a pau a Kaleba i ka olioli no keia lokahi ana.

Mai hoihoi ia o Iamena i na halelole o na ohana a Benihilala e olioli ai no ka lanakila ana o Habiba; aka, ua kaohi ia mai oa e ka hoolewa ana i kona kaikunane, a ua hoolewa ia no hoi oia me na mea a pau loa i kupono i kona kulana, a me na mea no hoi a pau loa i kupono i kona ohana.

Kauoha ae la o Habiba e hooko i na mea a pau loa a Iamena e olelo ai. Hoi aku la o Salamisa i na halelole o na ohana o Benihilala me kona mau ohana, a ua hookipaia'ku oia me na mele o kona lanakila. Ua nui loa mai la ko Habiba mahalo ia e na mea a pau loa no kona lanakila ana maluna o Sira.

"Aka, e na kanaka maikai," wahi a Doratila, "heaha na mea a kuu kane i hana ai, i mahalo nui loa ai oukou ia ia? Aole anei o oukou manao, o ka hana kupono wale iho la no ia e hiki ai i ke keiki a Salamisa ke hana aku i kona ohana? Ua kuhihewa oukou i ka mea a oukou e mahalo nei. He ono no ka hua o ka laau ke hoao aku oe; aka, o ka laau nana i hoohua mai ka oukou e mahalo pono aku ai."

Iloko o na la he umi, aohe hana okoa e ae i hana ia o na halelole o Benihilala, o ka ahaaina wale no a me ka olioli. Hoi hou mai la na ohana i hoopuehu liilii ia ma o a maanei; kukulu hou ae la lakouu i ko lakou mau halelole ma kahi hoomoana mau, a ike hou iho la oia he alii oia maluna o na ohana he kanaonokumamaona, a hoi hou mai ke kiekie o kona kulana i oi ae ke kupaa mai kona noho alii ana mamua.

Mahope iho o na la he umi i olelo ia ae la maluna, hele mai la o Iamena i ukali ia e na'lii o kona mau ohana e hoolaulea mai la

ia iho me Salamisa. Aia me Salamisa kahi i noho ai ke keiki a kona kaikaina o Sape kona inoa. Hooholo iho la o Salamisa e haawi aku ia ia i kane mare na Iamena, me ka hoolilo pu ia ia i alii maluna o ka ohana a Kaleba.

Haawi hou ia ae la he mau ahaaina hou no ka hui hou ia ana ae o keia mau puuwai opiopio hou elua, a kahaha iho la na'lii i uhai mai ia Iamena no ke ano oluolu loa o ko lakou hookipaia ana mai.

I ka pau ana o ka olioli ana no ka ahaaina mare, olelo aku la o Habiba i na ohana a pau loa, "E na ohana a pau loa, o keia iho la ke ano o ka hoopai ino ana aku i na enemi a pau loa e kue ana i ka makemake o ke Akua. Mai keia la aku e na ohana, mai hoopaakikiia ko oukou mau naau e na kanawai maikai i kau ia maluna o oukou e ko oukou alii maikai. Mai mahalo a holo hoi ko oukou manao malalo o kekahi kanaka kipi e like me ko Sira ano."

Mahope iho o ko Iamena ma hoi ana i ko laua mau wahi hoomoana, manao iho la o Doraila ma e hoi i ko laua aupuni e hoomalielie aku la i ko laua mau ahakanaka. No ko Salamisa ike no i na oihana a ka Moi, nolaila, aole ia i keakea aku i na mea a pau a kana mau keiki i manao ai hoi i na mokupuni o ke kai.

Ua hookaawale ia kekahi la no ko laua hoi ana; a ua hooholo ia e hoi hou laua i kahi hale kuahiwi o ka uka, a mailaila laua e hoi aku ai, a haalele iho ia Arabia iloko o ka noho'na maluhia. I ka hiki ana mai o ua la nei, aohe i ike ka lahui i ko laua nei hoi ana i ka mauna; o na makua hoi, ko laua mau naau kai mokumokuahua ia e na ao kaalelewa kupikipikio o ke kaawale ana mai ka laua mau keiki mai. I kekahi kakahiaka ae, hiki mai la ka manu, a lawe ia aku la laua iloko o na ao ua awa.

Lawe aku la ua manu nei ia laua a hiki iluna pono o ka mauna Caucasusa, i kahi o ke kumu a ia nei, ilaila laua nei i noho ai no kekahi mau la elua; a hahai aku la hoi o Habiba i kana kumu i na mea a pau loa ana i hana ai ma ka pepehi ana ia Sira, a haawi hou ana aku hoi i ka maluhia mau mawaena o na ohana koa o Arabia.

Mahope iho o na la elua, lele hou aku la ua manu nei i ka mokupuni Keokeo, a mai laila aku i ka mokupuni o Olenalena, a ike iho la laua nei ua maluhia ka noho'na o ka lahui holookoa mai o a o. Ilaila no hoi laua nei i noho iho ai me ke aliiwahine nona na owili lauoho nani a me kana kane no kekahi mau la, a hoi aku la laua nei i Medinasa. O na mokupuni a pau loa ua noho maluhia lakou mai ia manawa mai, a hiki wale i ka makou haalele ana aku; e lai ana no ka noho'na.

Maanei la kahi i hooki ai makou i ka makou maka peni ma ke kakau ana aku i ke kaao o Habiba, oiai ma keia wahi no makou la hoi mai; a ke koi mai nei makou e ua koa opio nei, e haawi aku i kona aloha ia oukou e ka poe heluhelu, i ukali mai me ke ahonui ma kona kaao loihi.  HOPENA.

 

Ninau Baibala.

E KE AU OKOA E:—Aloha oe:

1 Owai ke 'Lii i kakau ia ke koena o kana mau hana a pau ma na kaao a Iko?

2. Owai ke kumukula a ka poe kuihao, kui keleawe?

3. Owai ke kanaka i noho mua iloko o ka Halelewa?

4. E hoike mai i ka nui o na waiwai ma ka lima o na kanaka ekolu e pii ana i ka hale o ke Akua?

5. E hoike mai i ka nui o na Kaula keleawe i hoopaa ia ai ke kanaka makole? A o wai ka inoa o ua kanaka la?

6. Heaha kekahi mea lele aole o lakou alii?

7. Heaha ka holoholona i kulai ia i kona huelo me he laau kedela la?

8. I ka wa o ke Kaula hea i ku ai na kanaka ma ka aoao o ke kuahu keleawe, e hoike mai i ka nui o na kanaka?

Me ka lana no o kuu manao e loaa no i na keiki o ke one hanau.

M. KANIHINA, LANIKAULA.

Kamakela, Honolulu, Malaki 17, 1866.

 

I kekahi wahine hoahanau e noho ana ma kona hale, hiki mai la kekahi mau luna o ka halepule i kahi o ua wahine nei, a kamailio iho la lakou no na mea e pili ana ia Iesu Kristo, aka, hemo e mai la ke pani o ka omole rama o ua wahine nei, a ninau ae la na luna, "Heaha la kela mea i pahu mai la?" A pane aku la ua wahine nei, "O kuu moe, ua helelei iho la ilalo, i ka helelei no i keia po a ao wale no." Aka, hoohuoi hou ae la no ua mau luna nei, me ka olelo ae, "Aala rama mai nei hoi," pane hou mai la ua wahine nei, "Aohe rama, he wai ala no'u." Aole i liuliu iho ka noho ana iho a lakou, ike iho la kekahi luna, e kahe ana ka rama ma ka papa hele, a pane aku la oia i ua wahine nei, "E! o ka lilo mai nei no ka keia ou i ka hoopunipui." A puka koke aku la na luna iwaho, me ke kaumaha o ka manao.

 

Olelo pane ia J. W. Kawaihae.

He poe makou aole i maa i nei mea he kakau manao ma na nupepa, iloko o na makahiki i hala ae nei, a ma ka puka ana ae o na olelo a J. W. Kawaihae, ma ka pepa o ka la 19 o Feberuari i hala aku nei, e pili ana i ke kula Loio ma Kawaihae-uka, nolaila, akahi no a loaa ia makou ka mea e kamailio pu ai me oe ma ke akea.

A mamuli o keia mau olelo wahahee ino loa ana i haku wale iho ai no , a hoolilo ia ae la i mea oiaio, me ka olelo mai, na makou ia olelo, oia hoi keia, "O ka makemake o ka Peresidena o ua Hui la o ka nui o ka poe komo mai e hui me lakou, ma ia oihana hanohano a maikai hoi." Wahi a lakou, a iloko o keia mau olelo nana i haku wale iho ai, ua loaa ka makou mea e kamailio ai ilaila, oiai, ma ka la mua a makou i hoomaka'i i ka makou hana, aole nae makou i ike i kekahi o makou, ua hoopuka ae i kekahi mau olelo o ia ano, e olelo ana, he oihana hanohano a maikai keia a kakou, a pela pu no hoi ko makeu lohe ole i na olelo koi mai a ua Peresidena nei o makou, e nui ka poe komo mai e pono ai, oiai no hoi, aole ona makemake e ao mai ia makou ma ke kanawai, no ka mea, he nui ko i ala pilikia ma kana mau hana ponoi, a no ka ane hiki ole hoi kekahi ia ia ke hoakaka pono mai ia makou ma na mea pohihihi o ke kanawai, wahi ana, oiai hoi, aole oia i makaukau ma ia hana, aka, no ko makou ikaika loa i ke koi ana ia ia iloko o ka manawa loihi loa, nolaila i ae mai ai kela, a hoomaka iho i keia hana mamuli o ko makou makemake iho, a mahea la i puka mai ai keia mau olelo a J. W. Keoni, oiai, aole oia kekahi me makou ia la, aole hoi o kona hope, a pehea la oia i lohe ai i keia mau olelo ana e olelo nei na makou, a ua kau hoi makou i mau rula no ka makou hana, aole e hiki i kekahi o makou ke olelo wale aku i o ia nei, i na olelo i hoike ia iloko o ko makou wa hana, a pela hoi ka poe hele mai, aole lakou e ae ia e komo a e hoolauna mai ma kahi o ka makou hana, nolaila, ua maopopo no aohe he mea e ae e ike ana, a ma ka nana ana a me ka hoomanao ana, ua maopopo lea, me he mea la, he manao ino kuloko mua la kona no makou, mamua o kona kakau ana i keia manao, oiai, ke lawe ia mai la na olelo i haku wale ia me ka wahee maoli, a hooili ia mai i luna o makou.

Oiai, ke ike ae la no kakou ke nana aku i ke ano kupono ole o ke kahua, kahi hoi ana i kukulu ai i kona mau manao, oiai, ke lawe mai nei kela i ko makou ao ana i na kanawai o ko makou aina makuahine, i kumu a i kahua hoi e kukulu ai i kana mau olelo hoohenehene ano ole, e hoohewa ana ia makou ma ia ao ana, a no ke ano kohu ole a hiki ole paha, hookomo pu iho kela i na olelo ana i haku ai ma ke ano hoopunipuni, i hoike ia ae nei maluna, ana e olelo mai nei, na makou, i kumu e hoopuipui ai i kana mau olelo hoopunipuni, a lilo ia i mea oiaio nana e olelo ai ma ke akea. Me kona manao ino paha, ua kohu ia olelo ana, a ua ku i ka oiaio ka hoolaha ana ma ke akea, me he mea la ua aneane nele loa ko makou makamaka i na olelo kupono e olelo ai, oiai, ke lawe mai nei oia i na olelo epa i hakuia ma ke ano wahahee loa, i mau olelo oiaio nana e hai ai ma ke akea.

A eia kekahi mea nani loa i ua kanaka kakau manao nei o kakou, a o ka lua ia o ka kakou mea e kamailio ai, o ka hoohuli ana i kona inoa oiaio, oia hoi o J. W. Kenui, a lilo i mea ole, a o ka inoa oiaio ole, oia hoi o J. W. Kawaihae, a lilo ia i mea oiaio, a me ua inoa hoopunipuni la oia e kamailio nei me na hoa kahu ekalesia ona, ma na nupepa, no ke aha la kona mea i hoohuli ia ai ka inoa pela? Eia no ia, no ka piha loa o ka opu i ka wahahee a komo i na naau, nolaila, piha loa a hu ma ka waha, a kahe au ma na lehelehe, a komo ana iloko o ka nupepa KE AU OKOA. Ka i ka ai no hoi, ka hana a ke kanaka i ike i ka wahahee, nolaila, ke kokoke iho la iloko o na olelo a ka Buke Nui Hooweliweli a lakou e io mai ai, e olelo ana, "O ke kanaka i lole lua ka naau, ua lauwili a pakaawili oia i kona aoao iho." A kupono iho la no ka ii o keia olelo i ua o J. W. Keoni, oiai, he hope kahuna oia no Kaalaea, i Kawaihae-uka nei, a he kumu kula hoi, alua ana oihana, nolaila, he kupono anei i na hope kahuna pule, ke hoolole lua i ko lakou naau? O kekahi naau, e ku i ka luakini, e hai i ka olelo oiaio a ka Haku, a o kekahi naau, e hai i ka olelo wahahee ma ka nupepa KE AU OKOA. He kupono anei i na hope kahuna pule e ao aku ma na hana epa ino loa, i keia ao i na hoahanau? A he kupono anei ia lakou ke haku i mau olelo wahahee, a hooili aku ma ka nupepa? A he makemake anei ke Kahukula Nui a me ka Papa Hoonaauao, e lilo ke kanaka wahahee i kumu ao aku i ka poe opiopio, e like me ka hana a keia kumu?

Eia kekahi mea kupanaha loa ia J. W. Keoni, o ka hoowahawaha a hoopailua loa i ka oihana Loio, a no ia hoopailua, luai aku kela ma ka nupepa KE AU OKOA, aole hoi i pau ke poi kai a kela poe, noho aku ana o ua o J. W. Keoni i ke kula Loio a B. Kamakala, e ole ka huhu ia ana mai e ke kahuna pule, haalele ai kela, kupanaha; e nana aku a ku

ke ahua o ka mania ole, no ka ilio hoi nei nea e olelo ia nei, ka hoi hou aku e ai i ka luai, eia ka hoi i keia kanaka kekahi, kinoa ia e ku ka auau nei a pau ka ino o ia mea, aole la hoi e miki hou aku ana, a eia no ka hoi e nunui aku ana na maka ilaila, mai o no a ku ana i ke kakala, puu ana ka lae, kahi ke pohue, oia la hoi kau he pipili ilio, o pa ia ka lae. Ku kauahi o kahi kanaka hilu nui wale, heaha la ke ano, he pupule paha?

Eia no paha kahi mea kupanaha loa i keia kanaka, o ke kehakeha o ka ninau ana iho, "Heaha la ka pomaikai nui e loaa mai ana ia kakou ma keia hana, o ke ao Kanawai?" Oi hiamoe iho la no paha a, o ka puoho ae la no ia, ninau ana pela, kainoa hoi o ka pomaikai ko ike i na kanawai o kou aina iho, i mea e kokua ai ia oe iho, ma ke pale ana'ku i na pilikia e hiki mai ana, e like me na maka a ke Akua i waiho mai ai mamua o ko poo, i mea kokua ia oe, mai ka haule ana iloko o na lua, na auwaha, a haule paha i ka pali, a pela'ku, a pehea oe i ke kanaka makapo loa, i kuli na pepeiao, a e hiki ana anei ia ia ke alo ae i na me ae kuia'i oia i na poino? Aole paha makou e ao ana i ke kanawai i mea e hanohano ai, a e waiwai ai hoi, a hele aku e loio no hai, i mea no makou iho e pono ai keia noho ana, maluna iho o keia honua, oiai, ke kanaka i ike ole i na kanawai o kona aina hanau, ua like no ia me ka pupule a me na holoholona, ka ike ole i kana mea e hana aku ai.

Eia no kau wahi ninau hookano loa, "He kumu akamai nae paha ka oukou i na kanawai kuloko a me na kanawai moana?" Haina o kau ninau, "aole," a he oi wale aku no oe, aole e loaa aku kou lua ma nei mea he ike a me ka naauao i na kanawai kuloko a me na kanawai moana, a manuahi wale mai ka wahahee a me ka hoopunipuni, a oia wahi lea no ia ou, e akena mai nei, "E nana'ku makou ia J. W. Iaukea, o Waimea, aole ka ona ulakolako ma ia oihana hanohano, a oukou e olele nei." Pela io no, he nele io no ia, a he oi wale aku no oe o ka ulakolako, ma kau oihana, o ka wahahee imua ona, o oe ka paha ka Lunakanawai Apana o  Hamaku, a aole o J. W. Iaukea ka Loio o Waimea, ku no hoi ka uwahi o ua mea he hooio ia oe e J. W. Keoni, o kau no ka oihana hanohano a waiwai, o ka wahahee a me ka hoopunipuni akuu ia hai, a iliki ia mai, noho aku i Kawa, paa na lima i ka hao, a hoolilo iho ke koena o kou mau la ma keia aoao o ka honua, i kahuna lapaau no na wahi ino o na alanui o ke kulanakauhale o Honolulu, kau uluna o ua kanaka, o Ikiiki ka malama, no ka nui o ka hana i na la a pau o ka hebedoma.

A ke pane hou mai nei no oe, i ko makou lilo i ka oihana hanohano, aohe mea nana e kanu ka makou uala—u, pela io no, nau la hoi e hana nei ka makou mau eka uala, e waiho mai la, i oi ae ka nui mamua o na eka he 25, a ehia hoi au mau eka uala, a ka mea wahahee, he haneri a oi aku paha? Ua pau ka makou maanei, a hiki i ka wa e pane hou ia mai ai, alaila, e kiola hou aku no makou i na ala paa o Kauweleau. Na KULA LOIO.

Kawaihae-uka, Mar. 15, 1866.

 

He keiki i kauo ia e ka lio a make.

Ma ka la 23 o Feberuari nei, ma ka auina la hora ehiku me ka hapa, kii aku la ka makuakane o keia keiki i ka lio ma ke kula, e alakai mai e hooinu i ka wai, ma ka muliwai o Waimea nei, o keia keiki pu no kekahi i kii pu i ua lio nei, me ka manao o ka makuakane e iho mai ma kahi kokoke, a no ka ikaika loa o ke koi a ke keiki makai ka ono ma ke alanui aupuni, e holopololei ai a ka muliwai, a i ke kaawale ana aku o ke keiki mai ka makua aku, kau no keia keiki maluna o ka lio, aole kaulawaha o ka lio aole no hoi he pale, o ke kaula i hikiikii ia ai o ke kaula no ia i punukuia ai, ua maa iki no keia keiki maluna o keia lio, a o ka la ka hoi keia o ka make la holo aku la ua keiki nei, a mawaho mai o kahi o Maalo ma, o ka wa iho la no ia o ke kuupau ana o ka lio i ka holo nui holo pono ole no hoi ka holo a ka lio kuupau kihikihi i kahi kula o Panaewa, a o ka haule iho la no ia ilalo a kauo ia aku la me he pauku laau la e kauo ia ana i o a i anei, me ke ku aku o ke poo i ka pohaku uina a pela no ke kauo holo ana a ka lio a hiki i ka puka pa ponoi o lakou, me ka poino lua ole, nana aku mainoino a manaonao no hoi, minamina no hoi ke keiki i ka nalo o ka inoa o na makua, o Puuiki ke kane, a o Hilu ka wahine na laua keia keiki i make, o ka inoa o keia keiki o Kamakahelu, he keiki kane, o ka nui o kona mau makahiki, 6 me na mahina keu, elua no ona la i komo aku ai i ke kula, a mek e no, elua o keiki a keia mau mau mea a make aku la kekahi, koe hookahi, he mau keiki kane no laua a elua, o ka makuakane he keiki papa no Koloa, a o ka makuahine hoi he wahine papa no Kamalino i Niihau, he keiki keia na ka hoahanau o ka'u wahine, ma ka hanau ana o na mukua, ke hoi nei ke keiki kanu raiki o Waimea, ke hele kolonahe mai nei ke anu a ka Waipao.

P. K. HOLI-O-Hana.

Hulumoa, Waimea, Febuari 26, 1866.