Ke Au Okoa, Volume II, Number 2, 30 April 1866 — He mau ninau i ka poe akamai i ke kuauhau. [ARTICLE]

He mau ninau i ka poe akamai i ke kuauhau.

O Kamakahelei ke alii wahine o Kauai owai kona makuakane, a owai hoi kona makuahine, owai hoi kona kaikunane, ina he kaikunane, ina he kaikuahine kona, mahea kona wahi i hoao wahine ai, he kaikunane hanauna anei kona, a mahea kona wahi i hoao wahine ai, a he mau keiki anei kana, a he mau moopuna paha ? Ina paha o Kaeo ke 'lii i hoao ia Kamakahelei ke 'lii wahine, nana no anei o Kaimualii ke 'lii i noho aupuni ia Kauai, a ehia la a laua mau keiki, i ka make ana o Kaeo ma Kalauao i ke kaua i kapaia o Kukiehu, owai ke 'lii kaikoeke o Kaeo i holo a pii ma Lihue a hoao ina 'lii o Lihue i Ohau, ua hanau keiki anei, a he mau moopuna anei e ola nei, ina paha o Holoholoku kahi kapu o na 'lii ma Wailua i Kauai, owai ke 'lii nana e komo ilaila e pono ai, he mau alii ma o iho o Holoholoku, ma ka inoa hoi i kapaia'i ia mau loi a ma ka inoa o ke 'lii hea ? I ka make ana o Kaeo owai ke 'lii i pani i kona hakahaka, a pehea hoi i noho alii ai o Kaimualii, mai a Kiikiki aku anei, mai kona poe kakaolelo paha, ke hooki nei au ke hoi nei ko Wailua keiki ke ohu mai la ka wai ina pali, me ke aloha i ka Lunahooponopono me na keiki hoonokepau ka mahalo. JORLY LANIHULI. Wailua, Kauai, Mar 23, 1866.