Ke Au Okoa, Volume II, Number 38, 7 January 1867 — Untitled [ARTICLE]

Ano e ka poe heluhelu, ua komo mai kakou iloko o ka poai ana o ka makahiki hou, a he mea no hoi na kakou e olioli ka ike ana i ke olinolino o kona la. Pomaikai nui no ke kanaka i ka ae a me ka hookuu maikai ana mai o ka Makua Nui e ike kakou i keia makahiki hou. Ua hala aku la kela makahiki me kana mau hana o kela a me keia ano, ina paha he pono a ina paha he hewa; a he mea pono no hoi i ke kanaka ke hooaiai ae i kona mau ala o ka wa e hiki mai ana, i ole e okalakala e like me ko ka wa i hala. O kela Poalua aku nei, ka la "Hape Nuia !" ua malama nui ia ma ke Capitala nei, mawaena o na kanaka a me na haole. Ua malama ia e kekahi poe me ke ano maikai ole, a ua malama ia no hoi e kahi poe me na ahaaina o kela a me keia ano. Ua lehulehu no na ahaaina i haawi ia ma ia la, maloko nei a mawaho no hoi o ke kulanakaulahle. Ua poloai ia mai makou e kekahi mau hoa'loha e Keliikanakaole a me W. Kapela i ka laua mau ahaaina i hoomakaukau ai no ka hookipa aku i ko laua mau hoa'loha, a o makou pu kahi i loaa o ia kulana. Aohe no e nele ana ka haawi ana ae o ko makou puuwai i ka mahalo i ua mau ahaaina nei; oiai hoi, ma ka Keliikanakaole, ua halii maikaiia ka lanai ahaaina i na palaluhiehu o ka uka nahele i paoa i ka moani a ka palapalai, ka awapuhi a me ka maile. O luna iho hoi o ka hokua o ka papaaina, ua hoouka ia iho i na mea e hoomaliolio ai i ka opu, o ka puaa, ka bipi, a me na i-a o na kai hohonu a me na kai papau. Kainoa hoi i nei wale iho la no la hoi, pau iho ka ike ana i ka nani o na mea ai, a me ke ano o ka hoouka ana i ka papaaina, ei aku no ka hoi io ua nani i ka ahaaina a W. Kapela ma Apua. Ua ane maikai loa na mea ai oia ahaaina a me ke ano no o ka hoonani ana i ka papaaina, no ka mea, ua ulu ia mai na mea hoomoni haae a pau loa ilaila, me he mea la, he kakaikahi wale aku no paha na mea i koe o ke kai. Kahi mea nae paha e olelo ia ai, ua oi ae keia ahaaina mamua o ka Keliikanakaole, no ka hiki ana aku o ka poe Puhi Ohe ilaila e hookuku ai i ko lakou mau kani me na pahihi nalu mai o ua aekai la o Apua.

Aohe no i ane maluhia ia la, ua nui no ka poe, "I hihina wale i Moeawakea," i ka hapahapai ia ae paha e ka mana a na kulu wai a ka naulu. Kahi poe hoi, "ua palaluhi ehu mauka o ka akoa," ua hele wale a ua nonono, a unounoa wale i ka pi wai ia paha e ka wai hoeha ili. Ua nui no ka poe holo lio ma ke kaona i ua la la, a ua olioli nae makou i ka hai aku i kela a me keia, iloko o ia lehulehu a me ia uluaoa la, aohe mau mea i haule a hakihaki hoi na lima, na a-u a nahoahoa hoi na lae. Mawaena o na haole kamaaina, ua nui o lakou i hele aku e ike kahi i kahi; a ua hai ia mai makou i ka haalele ana o kahi i kona home i ke kakahiaka, aia i ka hora 10 o ka po ka hiki ana i ka hale.

No ka Mokuahi Kilauea.—I keia pule iho nei, ua haohao nui ia, aia la i hea kahi i nalowale ai ka mokuahi Kilauea. I ka Poakolu mai hoi, ku mai oia i ke kaona nei, a hai mai la oia i kona mau wahi i hele ai. I ke awakea o ka Poaha, ua loaa oia i ka makani ma Kawaihae, a holo aku la i Waipio; a mai laila mai ku ma Hana, a loaa malaila elua mau paila wahie me ka hapa; me ka manao e ku ma Maliko, a malaila e hoopiha ia ai i ka wahie hou, aka, kue mai la ka makani ia ia; a holo pololei mai la oia i ke kaona nei, me kona poino ole. I ke ahiahi iho no o ka Poakolu, ua holo hou aku no oia i Lahaina, no ka nele i ka moku e lawe mai ai i ko laila mau ko. A i ke kakahiaka iho nei o ka Poaono, ua hoi mai oia mai Lahaina mai, a e holo hou ana no oia no na awa ku mau ana e holo mau nei. Ua kuai ia.—I keia pule iho nei, ua kuai iho nei ke Aupuni i na pono Pai a pau o kahi nupepa makika i uwa iho nei, a pau ke aho; no na dala $800.00. Ke Kau Jure.—Ua konoia mai makou, e hai aku i ka poe jure kanaka maoli ; e noho malie no lakou, a kii ia aku e na Makai, alaila, hele mai.