Ke Au Okoa, Volume III, Number 29, 7 November 1867 — He waapa i poho ma ka lae o Wewehi, i Hamakua, Maui. [ARTICLE]

He waapa i poho ma ka lae o Wewehi, i Hamakua, Maui.

E Ke Au Okoa e :—Aloha oe : He wahi mea hou ka'u e hoouna aku nei ia oe, a nau ia e hai aku i na lehulehu o kaua e noho ana mai ka la puka i Haehae, a ka welo'na a ka ia i Lehua. Penei no ka moolelo oia wahi mea hou, ma ka la 10 o Okatoba, ua holo aku makou mai Keanae aku, o ka hora 9 paha ia, eha ko makou nui. E hiki paha ia'u ke hai pakahi aku i ko makou mau inoa, i ike mai na kini o kaua, o Kalepa, o J. Makaena, o Timoteo, o Kekahuna, a ma na la mua ae, ua makaukau na pai ai he haneri me kanaono, a ua hooukaia keia mau pai ai a pau iluna o ka waapa, e lawe aku i ai na ka mahiko o Makawao. I ka nana iho i ka waapa, ua nalo iho ka molina i ke kai, ua hiki i na ale ke komo ma ma na aoao o ka waapa, ua ikeia keia pilikia o makou ma kahi i hooukaia ai ka ai, he mea ole iho la ia i na hoa holo, a pane mai la ko uka poe, "o ko oukou wahi pilikia no keia a ku ae ka pea o oukou pau ka pilikia." A pau na hoa i ke kau mai, hanaia na hemahema e pili ana i ka waapa, o ko makou holo no ia. Ia manawa, elua i ke ka liu, ma keia holo ana, aole i ka moana lewa loa; i ka pilipili aina mai no, manao iho la au e pilikia ana ma ka lae ino o Hamakua, oia hoi o Pohakuomailani, Hawini a me Ihuomano, a hala hope ia mau lae ia makou, kaa aku la i ke kai kaikamahine, pau ae la ko'u manao ana no ka pilikia. Eia aku ka mamua kahi e poho ai, a hiki makou ma Papanuiokane, a hala ia ale, nanea aku la makou i ka alania o ke kai, a kokoke e hiki i ka lae o Wewehi, he kowa mawaena, a he wahi komo mau ia e na waa, i ka wa malie nae. Ia makou i kokoke aku ai e hiki ma ka lae o Wewehi, ninau mai la ko makou kapena, " Mahea kakou ? " O ko'u pane aku la no ia, "Mawaho kakou ma ke akea." Aole nae i hookoia, no ka mea, ke aneane aku nei e hiki i kahi i piho ai. Ninau hou no ko makou kapena, " Pehea kakou ? " " Maloko aku nei no," wahi a na hoa. Ua ike aku no he kupikipikio loa na ale, o ko makou hookomo aku la no ia mawaena o ke kowa, he hookahi hapaha paha o ke kowa i hala mahope o makou, a o ka uhi mai la no ia o na ale iloko o ka waapa, makai mai, a mauka mai, a o ka piha iho la no ia o ka waapa, ua hooikaika makou ekolu i ke k-a ana i ka liu, aole nae he lanakila, a o ka poho iho la no ia, me ka paa no o ka ai i na palepale o waho mai, i ke kaumaha hoi o kekahi aoao ia makou o ke kahuli mai la no ia, a huli iho la ka waha o ka waapa ilalo, me ka pea no e paa ana, me ka o a me ka paepae, au ana makou iloko o ke kai, a hele aku la ka ai iloko o ke kai, a lana aku la kekahi. I ka waha o ka waapa e huli nei ilalo, hamohamo i ke kuala o ka waapa, a puana ae la au i keia wahi lalani mele, "Hamohamo ana o ke kuala o Puna." Hooikaika loa iho la makou i ka hoohuli ana i ka waapa, a huli ka waha iluna, ke aneane aku nei e hui me na lae aa o Eleile, hoa-u ikaika loa makou i ka waapa a hiki i ka lulu, e pili ana no i kahi i poho ai, k-a ia ka wai a pau, lana loa ae la ka waapa, ua koe mai no na lako o ka waapa. A o ko makou pilikia nui, ina e poino ka waapa, maluna o makou ia pilikia.

Eia kekahi, o ko makou mau wahi puolo kapa, ua holo-a ia aku la i ke kai, a ua paa mai i ko makou mau lima na pai ai he 24, a o ka holo no ia a hiki i Maliko, a pae ka waapa iuka, a ike mai la kolaila poe i keia mea hou, a o ka pau ana keia o keia wahi mea hou. Me ke aloha no i ka Luna Hooponopono a me kou poe paahana. IOSUA MAKAENA. Keanae, Koolau, Maui, Oct. 15, 1867.