Ke Au Okoa, Volume V, Number 48, 17 March 1870 — Ka wanana a ke Kaula J. Kaona. [ARTICLE]

Ka wanana a ke Kaula J. Kaona.

E KE AU OKOA E ; — Aloha oe: Akahi no au a a wahio malihini aku i keia wahi puolo e kau ae la maluna, oia hoi ka wanana a ke Kaula J. Kaona imua ou. A nau ia e ahai hele aku ma na kihi eha o ko kaua mau kaiaulu i ike mai ai ai na opuu rose opiopio a me na Iwi Paluplau o ke @au Kamehameha V e ola nei i ka wanana o kekahi io Hawaii, ina hoi e ko, a e ole ana, aka mamua ae o kuu hoomaka ana e hoike aku ua wanana la, he mea pono no ia'u ke hoakaka aku, o ke mea nana ka wanana ia no aia ma ka home paa o na lawehala ma Kawa i keia manawa. He mau malama elua i hala mamua ae nei ua lohe ia aku ka leo o ua Kaula la e puana ana imua o na paahao, a penei no ia. E hookuu ia ana na lawehala a pau loa, a e puka pu ana me a'u, aole nae na'u ponoi keia, aku, na ka Haku no, nolaila, e ai ka ai, a e inu hoi ka wai, a e aahu hoi ka lole o ke aupuni, alaila, kakali aku o ka hiki mai o ka manawa e ko ai oia mau mea a pau, aole nae no ka poe paahao pokole o ko lakou hoopai, no ka mea, e puka ana no lakou, o keia wanana, no ka poe lawehala i hoopaiia no na la loihi, maluna o lakou, a ko ia ai keia mau mea a'u e hau nei ia oukou. Nolaila, ia oukou e oili aku ai mailoko aku nei o kahi paa, a kaalo aku hoi ma na huina alanui, a me na ala loa, kahi hoi a na keonimana oiaio, a me na lady opio e akoakoa ana, e ku kala aku oukou E hookuuia ana na paahao! E hookuuia ana na paahao ! No ka mea, ua lewa na moku i ke kai, ua ino ka aina, ua hewa ka honua i ka lelemua. Nolaila, a i ninau ia mai oukou no keia mea, alaila, e hai aku no, na ka Haku mai. O keia ae la ka wanana a ua Kaula kaulana la o keia au e kunewa nei, aka ina ua wanana ae oia ma ke ano "He lilo i Puna i ke au a ka Hewahewa," alaila, he mea pono ia oe e ka mea e heluhelu ana i keia ke hoomanao ae i kela mau wahi hua mele. "Hili hewa ka na noho i ke pili." Oiaia ma ka hoomaopopo ana iho e loaa ai ia oe a me a'u ka hoohuoi ana, no ka mea hea, a no ke kumu hea la, e hookuu ia ai ka poe i ahewa ia ma ke kanawai, ka poe hoi i uhaki i na kanawai o na Kamehameha. Aka, aole no paha i poina ka hoomanao ana ae o ka lehulehu i kana mau hana i hala mamua a he mea no ia na kakou e kaana iho ai me ke akahele. No ka Luna Hooponopono ke aloha, a me na keiki hoonoho kepau o ka Halepai ka mahalo. J. H. M. Kaikuahine. Station House, Honolulu, Mar 2, 1870.