Ke Au Okoa, Volume VI, Number 49, 23 March 1871 — He Inoa no Kaleleonalani. [ARTICLE]

He Inoa no Kaleleonalani.

1. A Waimea makou I ka uka Waiahulu, A ka Halauaola Malu i ka hale lau-koa. 2. Hoononoho i Waineki Kauhale a Limaloa., O kahi puu hulahula Noho ana a Emalani. 3. A Kauaikanana Paheehee ka iho'na, Pakikakika ka pii'na, Ai e ana i ka loa. 4. Ku ana i ke kualono, Puili hua ohelo, Mea ai na ka wahine, Alo anu o ka mauna. 5. Ka mauna o Alakai, Oni ana Waialeale, Ku kilakila ka ike'na, I ka luna o Kawaikini. 6. He aloha mai na hoa, Na hoa pukui anu, Moe wai o Aipo, Pulupe i ka na noe. 7. I ka hale malu i ka ohu, Haihai lau laau, Ka moena o ia uka, O ia uka ahiu. 8. Ike anu makamaka ole, Aohe hoa olelo, Pukui no kela, Kulou no keia. 9. A oi hopo Emalani, Ke Kuini a'e kuahiwi, I ka naku i ka naele, I ka noe o Alakai. 10. A Kalehuamakanoe, Ako ia na pua helu, I lei hoohiehie No Emalani he inoa. L. Keliimoewai. Koloa, Mar. 6, 1871.