Ke Au Okoa, Volume VII, Number 40, 18 January 1872 — He Kai Hoee Ano e. [ARTICLE]

He Kai Hoee Ano e.

Ma ka hoi ana mai o ka mea lawe leta inehinei, mai kana kaapuni ana i keia mokupuni, ua lawe mai oia i ka lono, aia ma ka wanaao Sabati iho nei, ua hoea mai ia kekahi kai hoee ano e ma ke kapakai o Waialua. E like me ka hai ana mai o ua lawe leta nei, o kahi e hoee mai ai o ua kai nei, ua hoomaka mai maluna iki aku o Waimea a holo mai ilalo nei a maluna aku o ka nuku muliwai o Kaiaka hoi aku iluna; me he mea la ka, o kahi a ua kai nei i hoee mai ai, aia ia maloko o ke ana puni o na mile ehiku a ewalu a oi aku paha. Ua pomaikai nae ka pae ma ke kapa kahi a ua kai nei i hoea mai ai, no ka mea, aohe mau poino nui i hanaia. Ma ka muliwai o Waimea, ua eo aku ke kai maluna o ka lapa one a huipu me ka wai o ka muliwai. Mai laila mai a hiki loa ilalo nei o "ke ehukai o Puaena," ua pii mai ke kai a ae loa mai hoi maluna o kahi kupono mau a ke kai e poi mai ai. O kahi poino, o ke kuapa ma Ewa o Lokoea, ua naha ka a ua lawe pu ia aku kahi hale kiai makaha; a ua pau aku kahi i-a i ka puka iwaho. O kahi o ke Kiaaina Dominis e pili pu ana, ua pakele mai ia aohe i hoopoinoia. O ka mea kupaianaha ma ka ee ana mai o keia kai, oia no ke ano e ma ia wahi uuku wale no; oiai, i ka hiki ana o ka mea lawe leta i Waianae, aohe hailona o ia hana malaila. Aole i maopopo loa kahi o ke kumu i hoea mai ai o ia kai hoee kupanaha. Ua lono ia mai ka hoonaueue olai ana ma Puna, aka, aole paha i pili ia mea me keia. Malia paha he luaiapele moana ke kumu o ia.