Ka Elele, Volume 3, Number 5, 1 June 1847 — NO KA ELELE. [ARTICLE]

NO KA ELELE.

E Limaikaika: Ke hoouna hou aku nei au ia oe i kekahi manao o makou ma keia kuaaina ma Makawao nei, no Berinimake, a me kana olelo hoino i na'lii a me kanaka o Hawaii nei. Ua haawi au ia oe i kekahi mau pepa mamua, na mea i kakauia e Daniela li, a me Gideona Haleole, Kaisara Kealoha, Paele, a me na mea e ae, he nui wale. Ua nui loa paha na manao ikaika i loaa ia oe, no kela hoahanau o makou i haule, a lilo i enemi huhu hihiu loa. Ina aole nui, a e hoino ana ua Berinimake nei, ea, e haawi auanei au ia oe, no ka Elele, kekahi moo-olelo nona, i kona noho pu ana me kakou ma Hawaii nui. Ina ua pau kona hoino ana, alaila, aole au e kakau, no ka mea, aole au makemake e hoakaka imua o kanaka i na mea hoino ana i olelo pinepine mai ia'u, a me na mea kekee ana i i hana'i. Auhea oe, e ke Lii nui, e ke Kuhina, na'lii a pau a me na hoahanau a pau loa? Aolc anei e hiki ia kakou ke hoolilo i ka hoino a ua Berinimake nei i hoino mai ia kakou a pau, i mea e pono ai? Auhea kakou? E haalele kakou i na mea ino a pau, na mea e oluolu ole mai ai ke Akua ia kakou. O oe ke Lii nui, ke Lii wahine, ua oki ka hana hewa a pau. E mihi a e huli koke i ke Akua ma o Iesu la, me ka manaoio, a me ka malama i kona mau kanawai a pau. Oia kuu makemake io, ka pule pinepine i ke Akua. Owau nei Gelina, kou kanaka ma ka hoohiki, kau kauwa aloha, e ke Lii nui. Mai hoole mai i kuu noi ana. Aloha oe, a e maluhia kou Aupuni. Pela oukou e na hoahanau a pau. Ua oki ka hewa. ka palaka, ka palaualelo. E hapai like kakou i ka hana, e pule mau. E kiai, e makaala. Ma ka hana pono a me ka oiaio, a me ka pololei, ea, e hoouhi aku

i ka enemi i ka hilahila i ole hiki ia ia ke hana hou aku pela. Eia kekahi, e pule kakou i ke Akua no ua haole nei, i hooweliweli mai ke Akua i kona manao, a e hoohuli ia ia i ka pono oiaio i ole e make mau kona uhane. Aloha oukou a pau, Na'u na GELIMA. Makawao, Mei 19, 1847.