Ka Elele Hawaii, Volume IV, Number 23, 25 July 1849 — OLELO HOOLAHA. [ARTICLE]

OLELO HOOLAHA.

E ka Elele Hawaii e, Aloha oe; he wahi ukana kaumaha ka'u e haawi aku ana ia oe, o oe hoi ko kaua mea i kaulana nui mai i ka mama i ka holo, a me ka leo nui i ke kahea i kela mea i keia mea, e noho ana lema na kihi o ka Mokupuni o Hawaii. Eia ua wahi ukana la a'u i manao ai he wahi ukana kaumaha, ina o kuu kino ponoi ka mea nana e hapai, he mea e ka luuluu a me ka malohilohi o na lima i ka wa hele io a ia nei. Eia ka mea mua a'u e hai aku ia oe, i ka makahiki i hanau ai o Kinau, hiapo a Keelikolani wahine Wm. B. Leleiohoku. Oia ka wa i lilo ai kuu lio, he lio wahine ulaula, aole i kuniia i ka hao, ua hanau aku ua wahi lio nei o'u, ua loaa ka ha o kana mau keiki, i keia wa. Eia no lakou ke hele nei ma ke alo o ke kuahiwa o Maunakea, a no Wm. B. Leleiohoku ka lio kane, nana i hoopiha mau i keia lio o'u, o ka makahiki hookahi no o laua i lilo pu ai i mau lio hihiu noia kuahiwi no keia paa ole ana i ka hao i hoike aku ai a'u ia'u iho i kela mea i keia mea i ole e hoopaapaa mahope, no keia paa ole ana o ko lakou ili i ka hao. Me ke aloha ia oe, Na'u na S. H. Liwai. Honolulu, 20 o Iulai, 1848.