Ka Elele, Volume 9, Number 7, 2 June 1854 — PALAPALA A KAAIKAULA. [ARTICLE]

PALAPALA A KAAIKAULA.

Pono Kikili, Bonebe, Ianuari 19, 1854. Aloha oukou: e na hoahanau, a me na luna ekaleaia, ma Kaumakapili. No ka lohe o makou i kekahi moku okohola, mai Maui mai e holo aku ana i Kina, a malaila paha loaa kekahi moku e holo aku ana i Oahu. Ua makaukau makou me kamanao, e hoo-

una aku i mau palapala ma keia moku; hiki aku paha, aole paha. Ma keia mau la a makou e noho nei. he like wale no, aole pilikia, aole mai; aka, aole launa mai na lii i ka makou hana e noho nei i keia wa; aka, o ko L. H. Gulika ma wahi o Makalaninuu, ke ao nei na keiki olaila i ke kula; a no ko laua noho ana ilaila, ua holo pinepine mai na kanaka o laila ia nei, Ua pau ka makau nui ana oia aupuni i ka holo mai maanei. Dekemapa 24. 1853. holo aku o A Sturges ma i Makalaninui, e nana i na keiki kula a Gulika ma. Noho iho maua me Debola i ka Hurgo ma ka hale, e nana, e kiai hoi i ka aihue. Eia ka'u kauoha i ka nui o na hoahanau a pau, e pule ikaika loa oukou i ke Akua, no na kanaka o Maikonisia; i pau ka paakiki o ko lakou naau; i huli koke mai lakou, a hoomana i ke Akua kiekie; pela kela hoahanau keia hoahanau, kela luna keia luna; no kamea, aole e hiki i ka lima o na kanaka ke kii aku a kauo mai. O ka uhane o ke Akua a me kamana, oia ka mea hoohuli mai i na kanaka a pau, mai ko lakou aoao hewa mai a i ka pono o ke Akua. Oia ka manao kauoha ia oukou, e kuu mau makamaka ma ka pono hookahi o ke Akua mau loa o Iehova Sabaota ko kakou Alihikaua, nana hoi e hoopio i na hana hewa o na aina naaupo, a nana no e kau i kona nani hemolele, a me kona malamalama mau loa, maluna o ka poe pono. O ka makou kauoha no ia i ke Akua, i ke - la la, keia la; no oukou no kekahi kauoha a makou i ko makou wa pule, aole i hoopoina i ka pule i ke Akua, ua hoomanao no, me ke aloha ia oukou. Ke lohe nei makou, he pilikia nui ma ka aina o kakou i ka mai luku; ua lohe maopopo loa iho nei makou i na kanaka Hawaii, mai Honolulu mai, ma ka moku okohola. Olelo mai lakou, o na pa hana hewa, pau loa i ka make; o Kapuukolo ka pa i pau loa i ka make. Nolaila e hoomanao kakou i ke Akua.i ka mea nana kakou e malama i ka wa pilikia, a me ka wa pilikia ole, i ke kau ai a me ka wa ai ole, i ka wa hihia a me ka wa hihia ole. Pela no hoi makou ma keia aina e noho nei, hoomanawanui no makou e noho nei: aole i huli mai na lii me na kanaka, o ka ae wale no e noho na kumu; aole nae he malama ia o ka la Sabati e lakou; aole makou i paupauaho; ke kali nei no makou me ka hoomanawanui. Ua hoomanawanui no i kekahi manawa pololi, a ma keia, aole i ka haha ka manao, kuihe, aka, ke ka nei no ka manao ia Iehova ko kakou Akua, a ia Iesu hoi ko kakou Haku. Owau me ke aloha ia oukou a pau, a i ka kakou mau kumu hoi, ia L. Kamika, me Kamika wahine, na makua hanai o ko kakou mau Uhae. Ke noho pu la hoi oukou me laua i keia manawa; ke lohe la no oukou ko i laua mau leo, i ke ao ana mai i na mea pono, i ka papa ana mai i na mea ino, e hookaawale. Ke halawai mau la oukou me ka kakou mau

kumu i kela makahiki i keia makahiki, a owau nei la, ua pau ko'u lohe ana i ka leo o kakou mau kumu, a me ko kakou halawai pu ana he kino he kino. I hea la uanei kakou e halawai hou ai? i kela ao paha, aole paha? Aka, ma ka olelo a ke Akua, i mai no ia, e halawai mau ko ke Akua poe kanaka ma ke ao o ke Akua. Ina he oiaio ko kakou makemake i ke Akua, a me kana mau kauoha, e pau no na mea o kona aupuni i ka haawi ia ia kakou, ke kupaa kakou a hoomau i ka pono. Aloha oukou me ke Akua pu. Na Kaaikaula, ko oukou wahi makamaka aloha e noho nei i Bonebe, pae aina o Maikonisia. Ke mahiai nei no makou i na kihapai o ke kino. Ua ulu na mea kanu, ua hua, ua ai makou ina hua o ke kihapai o ke kino; o ko ka Uhane kihapai koe; aole i ulu a hua mai ke kipulu nei no. I ka wa e hui ai ka kakou mau pule, a ae mai ke Akua, a hookomo i kona uhane iloko o keia lahui naaupo, alaila pio ka hana a ka poe aia, lanakila ka hana a ko ke Akua poe kanaka. Awalu moku ma ko makou wahi, ma Rono Kiti nei. E mau aku ke aloha a me ka lokomaikai o ke Akua me oukou a pau. Na B. Kaaikaula