Ka Elele, Volume 9, Number 12, 17 August 1854 — KE MAKE KUPANAHA. [ARTICLE]

KE MAKE KUPANAHA.

I ka la 24 o īulai iho nei, i ke ahiahi poeleele oia la, oia ka poakahi hope o keia malama, Ua make loa kekahi haole, ma Waimea nei me kona lio, aole nae akaka ke kumu o keia make ana. Penei ka mea i akaka iki mai, I ke awakea, pii mai la keia haole ma kahi o Logons maluna o ka lio, i laau kona manao o. ka piiana mai, a loaa, hoi aku no me ka mai ole, a ahiahi loa hoi aku no ia i kona wahi e noho ai, ma kahi o Timope ma Keanuiomano, Aole nae i hiki aku, o ua loaa iho la no ia i ka pilikia mawaho ae o ka pa o Kenuwe, o Puuloa ka inoa oia pa, ma ka aoao hema o ka pa. Malaila kahi i waiho ai laua a e lua, o ka lio me ka haole pu, he wahi maikai loa kahi o ka hina ana, aole aa, aole lua, aole hoi he okumu laau e hina ai la hoi, make loa ka lio ia po no, a o ka haole ua nawaliwali loa ia, o kona inoa o Keoni Paioa. He haole kamaaina keia ma Waimea a puni, ua noho no ia ma kela wahi keia wahi, mamuli o na haole e ae kona noho ana. I ka po ma| o ka la 25 mai, make loa iho la ua haole nei, ma ka hale o Kenuwe. Ua ninau pinepine na haole ia ia i ke kumu o keia pilikia ona. Aole nae hiki ke olelo mai, he mauliawa wale no kona, a pau kona ola, aole kanaka i ike i ko laua hina ana i lalo. I ke ao ana ae, ike aku la na nakanaka, e waiho ana laua i lalo. Hapai na kanaka i ua haole nei iloko o ka hale o Kenuwe, malaila kahi i waiho ai a hiki i ka po. Make loa iho la ia. E ka poe e heluhelu ana i ka Elele e nana oukou me ka weliweli a me ka hoomanao i ka olelo a ko kakou Haku, ma ka waha a kana mau kauwa “Ma Luka 12: 28 a me I. Kekalonike 1: 2 a ma ia mau pauku, ua akaka ole ka loihi o ko kakou ola ole ana, ke mau kakou iloko o ka hevya, Aka, e noho

kakou me ka makaukau. I pomaikai kakou no ka hele ana aku ma kela ao. “No oukou kekahi aloha. Iosepa Kaaukai. Waikoloa Waimea,Iulai 28, 1854.