Ka Elele Poakolu, Volume I, Number 21, 26 January 1881 — He Poloai Aloha ! [ARTICLE]

He Poloai Aloha !

I na hoahanau aloha, na kaikuahine, na makamaka. na makua a me na hoalauna a pau. Welina oukou : Ano, ua panee pono mai nei ke au o ka manawa a hoea kakou iloko o keia makahiki hou, ka M. H. 1881. A oiai oukou e lohia ana i ke kaalo ana ae o na ea o kela a me keia la o keia M. H. Ke nonoi aku nei ko oukou makamaka, mamuli o ko oukou ano naauao a puni mea hou o na ano a pau, e ku like mai oukou iluna e na opio kane a wahine, a me na makua o Kauai o Elepulukahonua, Oahu a Kuihewa, Molokai i ke Alakahi, Lanai a Kaulahea, Maui o Kama- malawalu, a me Hawaii nui a Kuauliekane, olelo ka ELELE POAKOLU, i hoa haihai olelo ho oukou, he wahaolelo kuokoa e lili mau ana i ka hoinoino ia mai o ko kakou mau pono a pau. He kuokoa oia ma na mea a pau, aole iloko ona ka hoopilimeaai, a me kai apoipoi ma ke ano hoonalonalo ina he mau ninau ano nui e hoea mai ana ma ke ano e nune ia'i. Ua hiki ia makou ke hoike oiaio. E hoounaia ana na nupepa no ka Hikina, (Maui & Hawaii) ma ke ahiahi Poalua, a o Kauai i ke ahiahi Poaha ma Makee. E ike pu ana oukou ia pule hookahi me ko Honolulu. Aole hoopanee ia ka hoouna a kekahi pule ae, he eleu mau makou no ko oukou mau anoi. A ano e na hoa, e lawe i pau kuhihewa o lohe olelo, a e hoouna mai i ka uku ia F. Hayselden. O NIOI MA.