Ka Holomua, Volume I, Number 36, 6 June 1914 — KAMEHAMEHA I-Ka Moi Na'i Aupuni [ARTICLE+ILLUSTRATION]

KAMEHAMEHA I —Ka Moi Na'i Aupuni

O Kalani KAMEHAMEHA I, ka Liona Hae o ka Pakipika nana i hoohui na Paemoku o Hawaii i hookahi me ka ikaika o ka Ihe Laumeki a kona mau lima Alii i na'i ai. Ka mua iloko o ke kaua. Ka mua iloko o ka maluhia. A o ka mua hoi iloko o ka puuwai o kona lahui. Ua hanauia ke Alii ka Moi ma Kohala, Hawaii, mai ka puhaka mai o Keoua-kupu-a-pa-i-ka-laninui me Kekuiapoiwa II. (w), i manaoia ma ka la 11 o Iune, 1736. O ke kii keia o kana hooili kaua lanakila hope loa me ke Alii Kalanikupule o Oahu a keiki hoi a Kahekili ke Alii o Maui ma ka Nuku o Nuuanu, iaia e kilohi ana i ka nani o ke Koolau ame na ko'a mokumoku o Heeia. Nana i kukala ke Kanawai Mamalahoa no ke aloha i kona Lahui.