Ka Hae Hawaii, Volume 1, Number 3, 19 March 1856 — HE KANIKAU ALOHA NO L. KAHUAKAI. [ARTICLE]
HE KANIKAU ALOHA NO L. KAHUAKAI.
Aloha kuu hoa o kaua pau pili, Kuu hoa o ka malu o ka ulu, O ke ahe a ka makani he aa, Kuu hoa o ka pii'na o Paupau a me na Lehua o Lihau, Kuu hoa o ka nalu o uo, a me ka wai o Kapoulu, Aloha kuu hoa o ka hono o na moku, Moku kaua e ke hoa la Kaawale ae, Kaawale hoi au me ka u me ka pau make ia oe, ea. Kuu hoa pili o kaua me ka makani, Kuu hoa o ka la wela o Kamaomao, Kela kula panoa a kaua e hele ai; Kuu hoa pupuu anu o Kamaohe, Mahana aku kaua i ko aloha; I ko pane ana mai, huli mai kaua he wahi ana keia, ea. Aloha kuu hoa o kaua Ulalena, Ke hapai ia maila e ka Hoolua, Elua kaua i ke anu a ke Kiowao. Kuu hoa o ka malu Kuawa, O ka makani anu he Kilioopu. Kuu hoa o ka pii'na ikiiki o Puuhele; Hele aku'la oe i ka huakai, hoi ole mai, Noho au me ka u me ka Paumake ia ae—ea. Aloha kuu hoa o ka laula o Kapaa, A me ka nani o ke Kalukalu o ke wa. Kuu hoa o ka pua hoolana i ka wai; He waiwai nui ka'u e malama nei; Elia nei o ke Kuluaumoe; O ko leo i ka pane ana mai, malaila aku au. Aloha kuu hoa o ka ua he Paupua, Ke hii ia aela e Kalanipuu, E ka noe anu a Kawaiolohia—ea. Aloha kuu hoa o na Hala o Holola, Ke lei ia maila i luna o Haupu, I ka wai anu la e Kemamo. Kuu hoa o ka wai ula ili ahi, O ke kula wela ia o Waiolono, O kela kaha ai ole a Kaua e hele ai, Hookahi no ai he aloha, Inai pu no me ka waimaka, Kuu hoa o ka makani he Lawakua, E welo ana ma ka pali i makuaiki, E Kuehu ana ke Kupa i ka Momoku, E kuni ana i ka ili o Kaipoahi, He ahi ke aloha i ke kanaka ke hiki mai He haawe kaumaha ia i kuu manawa—ea. Aloha kuu hoa o ke one o Hoohila, Ona ohia o Kupa'koili, Ke ai ia maila o na keiki a Naiwi, E waha ana ma ka pali o Makaua, Hala aku la oe i ka noe anu a Kaukaopua, Noho au me ka u me ka pau make ia ae—ea. Aloha kuu hoa kuka o ka po me ke ao, Kuu hoa o ka ai Haaheo o ka aina, O ke koekoe anu o ka Waikoloa, Ehikikii ana i ke kula o Kokoloea, Ea mao ole i ke poi a ke kai, Lohea ka nu i kai o Ewa—ea. J. H. KAAUWAEPAA. Kawaihona Hale, Honolulu, Feb. 8, 1856.