Ka Hae Hawaii, Volume 2, Number 3, 15 April 1857 — HE LEO I PAE MAI MAI NA AINA MOANA MAI [ARTICLE]

HE LEO I PAE MAI MAI NA AINA MOANA MAI.

E ka Hae Hawaii e : ALOHA OE. No kou makaukau ana, e holo hou ae ma keia mau Mokupuni; i ka la 4 o Maraki nei. Nolailo, ke manao nei au, ua pono keia mau wahi olelo haku hooili iho maluna ou. A he oluolu ia e ka mea Hoopuka i ka Hae. Eia no ia mau olelo haku malalo iho nei. No na aina pouli mai, a no Hawaii nei aku. Ke pae mai nei ka leo hea, Mai Maikonisia mai, A me Fatuhiva pu, E na haipule o Hawaii nei, I kuonoono i ka pono; E lawe mai i ka Euanelio, Ma keia waonahele nei, Ke poai nei makou la; Ma ke kiko waena o Gehena, Ka hooilina ia o ka poe hewa. E ko Maikonisia, "Ahui Fatuhiva, Me ko na aina e," Eia mai na Elele, A ke Keiki Hiwahiwa—e, Maluna o ka moku, Ka Hoku Kakahiaka, Ua lako lakou a pau, I na pono no na Uhane, No ka poe pouli mau. Eia makou ke noho nei, Ma ke kahawai o Hanawawe, Uwe kanikau no, No na hewa e make ai; Paa mau i ka wiliau, Na kaula a Satana, Pehea la e pakele ai? Keia mau huna lepo; Ke lohi oukou, a kanalua, E na haipule o Hawaii. Ua hoouna ia aku nei, Ka La, a me ka Mahina; A o e ka la i nauwe ai, Ma ka moana Pakifika, Ke paio 'la paha lakou, I ka paio maikai no; E na haipule o Iesu, "E paio loa, e paio mau; E paio i na la a pau, E paio wiwo ole no." Ke pae mai nei ka leo ia kakou e na haipule; mai Hawaii a Niihau. E noho kakou me ka hoomanao, i keia mau leo e uwe nei; iloko o ke au (lipolipo eleele o ka make.) No ka mea, ke ike nei kakou a pau, ke hooko ia nei iloko o ko kakou mau la; ka mea a Isaia i wanana ai. "Nani wale ma na mauna, na wawae o ka mea hai i ka Euanelio; ka mea hoolaha i ka malu, ka mea hai i ka Euanelio maikai." E ae io aku no kakou a pau, e hookaulana i ka inoa o Kristo i waena o na Pedana. Me ke aloha no. J. H. MOKU. Lahainaluna, Maraki 4, 1857.