Ka Hae Hawaii, Volume 2, Number 14, 1 July 1857 — KANAKA KAHIKO. [ARTICLE]

KANAKA KAHIKO.

Eia ma Waikiki kai i Oahu nei kekahi kanaka kahiko, o Kamaukoli kona inoa. Ua ninaninau aku au ia ia, hai mai oia. ua nui oia mamua aku o ke ku ana mai o Lono ma Maui, o ka makahiki 1778 ia, oia ke ku alua ana mai o Lono ma keia pae aina, mai ia manawa mai a hiki ia nei, o ke 79 keia o na makahiki mai laila mai a hiki ia nei. Aka, ua nui o Kamaukoli mamua aku oia wa ua 6 paha makahiki mai kona, hanau ana a hiki mai ia ku ana mai o Lono. A ina i huiia me na makahiki he 79+6=85 mau makahiki oia paha ka nui o ko Kamaukoli mau makahiki. Aka, aole i nawaliwali iho keia kanaka, eia no ke noho nei me ke kino ikaika. Eia hoi, Ua hai mai oia ia’u, e 7 ana kaua i ike, eia ka nui o ia mau kaua a me ko lakou mau inoa. 1, Mokuohai, 2 Kepaniwai, oia hoi o Kauaupali, a o lao, ekolu inoa oia kaua, 3 Kauaawa, 4 Kawai, oia hoi o Kepuwahaulaula. A ekolu mau kaua aole i loaa na inoa. Oia ka’u mea hai aku no keia kanaka. No kona noho ana ia aupuni a komo mai nei i keia aupuni hou. Oia ka’u mea hai aku. Me ka mahalo. W. K. HAKUOLE. Ulokou, Waikiki, Oahu, Iune 28, 1857.