Ka Hae Hawaii, Volume 3, Number 2, 14 April 1858 — MOOOLELO HAWAAII.-Helu 1. [ARTICLE]

MOOOLELO HAWAII.— Helu 1.

He nui wale na ike i iini ia e na kanaka, aole nae like ka waiwai o keia mau ike a pau, o ka mooolelo no ka aina kekahi ike i makemake ia, he wahi ike maikai ia, a he waiwai hoi, no ka .mea, malaila no i hoakaka ia ae ke ola ana o na kanaka a pau, o ko lakou noho ana, a me na hana .i hana ia ma ka aina. Ua ano like ka mooolelo me he aniani la e hoike mai ana i ka hana a ke kanaka i hanaʻi He oiaio no ka olelo a kekahi kanaka akeakamai o Kikero kona inoa, "o ka mooolelo oia ka mea e hoao ai ka manawa, oia ka malamalama o ka oiaio, ke ola o ka hoomanao, ka lula o ka hoomanao, ka elele o ka wa kahiko,” o ka mooolelo o kekahi aina ua ike ia, ua akaka, a ua maopopo loa, pela ka mooolelo no ka poe ludaio, no Beritania, Farani, Amerika Huipuia, aka, o ka mooole|o kahiko loa no Hawaii nei, aole i akaka loa ia, ua powehiwehi no, eia ka mea i nui |oa ai kii pohihihi, a akaka ole na mea kahiko loa, o ko na kanaka ike ole ana i ke kakau palapala, ua paa kekahi inau mea maa ka naau o ka poe kahiko, aka, ua paa kapekepeke no, aole i paa pono. Eia kekahi he nui na mookuauhau o Hawaii nei, aole nae i kulike lou lakou kekahi i kekahi, okoa ke kumu o kekahi mookuauhau, okoa ke kumu o kekahi, manao kekahi poe, o ka lakou ka pono nui loa, a pela no ke kue ana o ua mookaao, okoa ka lohe o kekahi, okoa ko kekahi, aole i like pu na lohe e pono loa ai. O Kumulipo ke kumu kuauhau o kekahi poe, o Paliku ka kekahi poe, Ololo ka kekahi poe, o Puamau ka kekahi poe, aole like ka manao o keia poe a pau, aka, kue kekahi i kekahi, no ia mea, pohihihi no ia mau mea kahiko, aole i akaka lea ia, he oiaio kekahi, a he wahahee kekahi. Eia hoi kekahi, aia ma ka makahiki 1838, i hala aku, ua pai ia he wahi Buke mooolelo Hawaii ma Lahainaluna, ua kakau ia iloko o o ia Buke e kekahi mau haumana o ke Kulanui, na lakou no i hele aku a ninau i ka poe kahiko, a loaa mai kela mooolelo mai ko lakou waha mai, a kakau iho ma ka pepa a paa, a na kekahi kumu o ke kula i hooponopono a i pai, o kekahi mau mea i ike ma ia Buke, he oiaio aka, o kekahi, aole i akaka ka oiaio, a ua pau no hoi ia buke i keia wa, kakaikahi wale iho no i koe, no ia mea, ua manao ia he pono ke hooiponopono ia buke, a e hoomahuahua ia, a e hoopololei no hoi, a e pai hou.