Ka Hae Hawaii, Volume 3, Number 16, 21 July 1858 — No Ponepe mai. [ARTICLE]

No Ponepe mai.

E Rev. L. Kamika. Aloha oe: - Ua ku mai kekahi moku ma ko Kulika wahi, e holo ana i Kina; malaila paha loaa ka moku e holo ana i Oahu. Ua makaukau makou e hoouna aku i mau palapala aloha ia oukou, no na mea i ike hou ia e makou, mahope mai o ko Hokuao hoi ana. He manao kaua. O Matalanimu a me U, oia na Aupuni elua ka i manao e kaua. Penei ka mea i kaua 'i. Hele aku kekahi kanaka no Matalanimu aku, a pepehiia a make. Nolaila, manao na'lii o Matalanimu e kaua. Hoouna mai o Rev. L.H. Kulika ia Kanakaole laua o Alika, e lawe mai i wahi palapala e kauoha ana ia Rev. Mr Sturges e olelo aku i ka Nanikini o Kiti nei. Ua olelo aku o Mr. Sturges i ka Nanikini, nolaila, ua palapala aku oia i ke alii o U, a me ke alii o Matalanimu, aole e kaua. Nui na manao o ka Nanikini i kakau ai ma ka pepa; maikai kona mau manao wehewehe aku imua o na'lii. Ua nana no au i kana palapala, a a me ke ano o kona manao penei: "He mea ino loa ke kaua ana, e malama kakou i ka pono o ke Akua o Iehova. E huli kakou, a e malama i ka pono." A pau kana palapala ana, oia ka la 13 o Novemaba, 1847. Holo makou ia la no, a moe i Natiwanaao. Kakahiaka ae, holo makou a hiki i U. E noho ana ke alii, me na kaukau alii, me na kanaka e ahaaina ana. Aloha aku makou i ke alii. Hoakaka aku o Mr. Sturges; Eia ka palapala a ka Nanikini o Kiu e nana oe. I mai ua alii la, aole au i ike i na hana, e aho e heluhelu mai oe, e hoolohe aku makou. Heluhelu aku la o Rev. Sturges, a mahalo mai no ua alii la. I mai la ia, aole o'u makemake kaua. Ninau aku o Mr. Sturges, nawai i pepehi aku i ke kanaka o Matalanimu? I mai la ia, ua kanaka o'u. Aole au i

ike i ka pepehi ana, no ka mea, o kanaka wale no, a make. I hou aku o Mr. Sturges, e ao oe i ou kanaka, mai pepehi hou. Ae mai ua alii la. I mai la oia ia Mr. Sturges, e hele e olelo aku i ka Isipau o Matalanimu, no ka mea, oia ka mea manao e kii mai e kaua ia makou nei. Pau ke kamailio ana, holo aku makou, a Matalanimu, kahi o ka Wajai, ka mea malalo iho o ke alii nui. Kamailio o Mr. Sturges me ia, ae mai no ia, he maikai e pau ke kaua, no ka mea, he mea ino o ke kaua. Holo aku makou a hiki i ke alii nui; kamailio hou ilaila. Ae mai no ia, e pau ke kaua ana. Oia la; ua ae like mai lakou e hoopau i ka makou kaua; aole nae lakou i mihi i ko lakou hewa. Aka, na ke Akua no ka mana e hoopau i ka manao paa o kanaka. Mahope mai o ko makou hoi ana i Ronokiti, hiki mai ka palapala a ke alii o Matalanimu e ae mai ana ia, i ka pono o ka pau ana o ka manao kaua; nolaila, ua hala aku nei na la i oleloia'i e kaua. Oia kahi mea hou i puka mai, mahope o ka hoi ana'ku o Hokuao. Ua mau mai ke aloha o ke Akua, a me kona lokomaikai ia makou a pau; nolaila ke ake nei makou e loaa na mea noluna mai; oia hoi, ka Uhane Hemolele e hoohanau hou mai i kekahi o keia lahuikanaka, i lilo lakou he poe keiki na ka Haku. Owau no me ke aloha aku. B. Kaaikaula.

Ponepe, Dekemaba 21, 1857.