Ka Hae Hawaii, Volume 5, Number 3, 18 April 1860 — No na aina e mai. [ARTICLE]

No na aina e mai.

Ma Europa, o na hihia ma Ilalia, ka aina o ka Pope, na mea i manao nui ia. He ano kue inaina o ke Alii o Farani a me ka Pope, a ua hoopau ke Alii o Farani i ka nupepa Kalolika o “ Univers,” i paiia ma Paiiaa. Oia ka nupepa kokua ika Pope ma Farani. He ano kue no hoi iwaena oka pope a me Viclor Emmanuel, ke Alii o Sardinia. He haunaele no hoi ma Hunakele.'a ua manaoia e pau ana ka noho pio o na kanaka o Hunakele malalo o ke aupuni o Auseteria, a pela no hoi o Ilalia. Ma keia hope aku e nui no na hoololi ana ma na aupuni o Europa; nawaliwali loa ke aupuni o Auseteria, ikaika no ka poe ohumu ma kona nina. Aole aloha o na kanakamalaila i ko lakou poe alii. Aole noho malie ma Europa, kaua pinepine malaila e like me na kaua o keia pae aina ma ka wa kahiko.