Ka Hae Hawaii, Volume 5, Number 43, 23 January 1861 — He kanikau aloha no Limaikaika. [ARTICLE]

He kanikau aloha no Limaikaika.

Aloha nui oe e Limaikaika, Ka mea i naue aku nei i ke ala hoi ole mai, Hele aku la oe e ku imua o Iehova, E hoike i kau mau hana a pau, O oe no ke keu a me ka hoomanawanui, I kou noho ana ma keia aina malihini, Ke mahalo aku nei makou ia oe, Ma Kahiki-ku, Kahiki-moe, Ma ke apapa-nuu me ke apapa-lani, Ma ka pae opua kiikii i kahiki, Hiki aku la oe e noho pu me na anela, Ma kahi maikai i oleloia, Eia no makou ke noho nei mahope o Kilauea, O kela mokuahi, Nana i alo na ale o Pailolo, A komo mai i ka lai, I ka pohu o Lahaina, Nana aku o ka loa o ke kai o Alenuihaha, A he keu aku o Kilauea, Ka mea nana i alo na mokupuni, Mai Hawaii a Kauai, He u, he mahalo, he aloha ia oe ia—e, Aloha nui oe me ka minamina, No ka nui o kau mau hana maikai, Ke noho nei kou ohana me ke aloha, Aloha wale ka wai o Waiehu, Ka wailele huna i ka lau o ka laau, I noho launa me Mokihana, Aloha no oe, ka makua o makou, O keia hanauna hou, He makua lokomaikai i keia poe auwana, Haalele aku la oe i kou one hanau, Manao mai oe ia makou i keia poe ilihune, Ike aku la oe i ka nani o Hiikua, Hii aku la oe i ka mea laha ole, He u, he mahalo he aloha ia oe la–e, Aloha ka wai hu mai i ke pili, Pili ka ua me ka makani, Pili aku la oe me ke Akua, Aloha ka iu ma ke kehau o Kahili, I holahola ia e ke kehau o ke kakahiaka, A kakahiaka ka ua moe olu, A awakea ka ua uniki, Pela wale no ka hoa kamalii, I ka A, E, I, O, U kaua, i ka H, K, L, M, N, Oia iho la i wahi kaona kepakepa ia’na, I kuhi au ia ka Lae o Kalaau, he huelo ia, E kahili ana i ke kai o Kaiwi, E hooke ana i ka pili o na moku, He moku o Moi a me Neke, He kai opiopi ko Kawaihoa, Nani Kaimanahila i ke kilakila i ka makani, He palulu ia no Mamala, E na keiki opiopio mai Hawaii a Kauai, Nani wale ko oukou ike ana i ka ua o Eleao, Ka ua hakilo mai ia Nuuanu, Ua lei wale i kamakahala o Lanihuli, E huli mai kakou e aloha i ka makua, Me ka mahalo i kana mau hana maikai, Hele aku la oe, he dala paa, Ahu iho nei makou he hapaumi, Kukulu ka laihi a ke aloha, Hele hookahi aohe lua, O ke aloha ka mea i hiki mai, Ke noho nei no i ka lai, Ke kula o Lahainaluna, Kapaepae hoolua ka makani kolonahenahe, Hikikii lua i ka olu o ka uka o Puuopelu, Paa mai nei i ka noe o ka uka o Lihau, O kela uka a ka manu, Manu ai pua lehua, He u, he mahalo ia oe me ka nani, A nani, a maha, A maha ma ka poli o Aberahama, Kuu ka luhi me ke kaumaha, Palekana, ua pau ka eha, Ua hoi ka Uhane i ke Akua, Ua kokua pu i na hana malaila, Me kona mau anela, Ia ao aku, ia ao aku. D. W. P. KAHANANUI.