Ka Hae Hawaii, Volume 5, Number 48, 27 February 1861 — J\o ka Hae llunali. [ARTICLE]

No ka Hae Hawaii.

E ka Hae Hawaii e - Aloha oe: No ka hiki ana mai o kekahi kii ma ka Hae Hawaii, Helu 45, aoao 184, e pili ana i ka Moolelo Baibala. A no ka mea, ua kauoha ia mai e hai aku i ke ano o ke kii a me kona moolelo, nolaila, ke hai aku nei au e like me kahi malamalama uuku e hoomalamalama ana i ko loko o ka hale; aole e like me ka malamalama o ka la e hoopuni ana i ke ao nei a pau. O ua kii la, oia no ke kaikamahine a Parao ke 'lii o Aigupita a me kona mau wahine. O ke keiki iloko o kekahi waa, oai no o Mose, he mamo no ka ohana a Levi. Ua waiho kona mau makua ia ia iloko o ka muliwai, mawaena o na kaluha. Pukaana 2:1 - 3. O ke kumu o keia hana a kona mau makua ia ia pela; ua olelo ke 'lii, e pepehi ia na keiki kane a pau o ka poe Hebera. A nui ae la ua keiki la, kapa iho la ke kaikamahine a Parao i kona inoa o Mose, ma ka olelo Aigupita. O ke ano oia inoa ma ka olelo Hawaii, "Ua lawe mai au ia ia mailoko mai o ka wai." Pukaana 2:10. A kanaka makua oia, hele aku la oia e ike i kona poe hoahanau, ike aku la ia e pepehi ana kekahi Aigupita i kekahi o kona lahui, kii aku la ia e pepehi i ua kanaka Aigupita la a make. Pukaana 2:11,12 I kekahi la mai, ike aku la ia, elua kanaka Hebera e hakaka ana, hele aku la ia e hooponopono a e hoopau hoi; aka, hopuka mai la kekahi o laua no kona pepehi ana i ke kanaka Aigupita, hoomanao iho la ia, ua ikeia kona hewa. Pukaana 2:13,14. Mahope iho, mahuka aku la ia a noho iho la ma ka aina o Midiana. Haalele oia i kona hanohano a me na mea a pau i loaa ia ia, ua aoia oia ma na mea a pau iloko o ka hale alii o Parao, a ua nui kona ike a me kona naauao; aka, he mea ole ia mau mea a pau i kona maka. Ia ia i hiki aku ai ma ia aina, noho iho la ia ma kekahi lua wai. Hele mai la na kaikamahine ehiku a ke kahuna o ia aina e huki wai, kokua aku la keia ia lakou. A hoi aku la lakou i ko lakou makuakane, haohao mai la ko lakou makuakane no ko lakou hiki wawe loa, hai aku la lakou ia ia, ua kokua mai makou e kekahi kanaka Aigupita, kauoha mai la keia ia lakou e kii aku i ua kanaka la, a lilo ia i hunona na ua kahuna la. Waiho mai la kona makuahonowai i na holoholona iloko o kona lima e malama, alakai aku la ia ma ke kula a ma ke kuahiwi a a hiki loa i ka mauna o ke Akua. Ike aku la ia i ka anela o Iehova maloko o ka lapalapa o ke ahi, e a ana i ka laau. Malaila i hoike mai ai ke Akua i kona manao ia ia e lawe mai i na mamo a Iseraela mailoko mai o Aigupita. Pukaana 3: 1-22. He kanawalu na makahiki o Mose ia ia i ku ai imua o Parao, a hoike aku la i ko ke Akua manao ia ia a me na hoailona mana. He kanaka pono o Mose imua o ke Akua. Mamuli o ka ke Akua kauoha i hana'i oia me ka hoolohe, a ua lilo ke Akua i makamaka maoli nona, noho pu laua a kamailio pu he maka no he maka. He nui na hewa iloko o ka Iseraela, nolaila, kue mai na lahuikanaka e noho koke mai ana ma ke ala a lakou e hele ai; aka, pule no o Mose i ke Akua no lakou, hooponopono mau oia i na hihia mai ke kakahiaka a po ka la me ka ai ole i ka ai. Nui na enemi ma ke ala kahi e hele ai, kaua aku kaua mai, ohumu no ia Mose a me Aarona, no ko lakou hewa, ua kanu ke Akua i ko lakou mau kupapau ma ka waonahele. Pela no hoi o Mose a me Aarona, aole laua i komo iloko o ka aina a ke Akua i hoohiki ai; no ka mea, ua hookae laua i ke Akua i ka la i kahe mai ai ka wai noloko mai o ka pohaku. He nui loa kana mau hana, aole paha e hiki ke hai aku no ka nui loa; aka, e ike no kakou iloko o kana mau Buke, malaila e ike ai kakou mai ka mua a ka hope o kana mau hana. Ke nonoi aku nei au ia oukou e o'u mau makamaka, e heluhelu i ka moolelo o keia kanaka, a e ninau iho. Owai ke kauwa a ke Akua i oi aku e like me Mose? Owai hoi ke kupapau i kanu pono ia e ke Akua e like me ia? Na ke Akua ponoi no i kanu iloko o kekahi awawa, i ka wa ana i kuhikuhi ai i ka aina o Kanaana, maluna pono o ka piko poo o ka puu o Pisega, ma ka aina o ka Moaba. I ko'u manao, he mea nui keia e alakai ai i ko kakou manao, ke hoomaopopo i keia moolelo; a e loaa no ia kakou kekahi malamalama ma ka ke Akua olelo, he kaao keia e hooulu mai ai ko kakou manao i ke Akua. Nolaila, ke hoopau nei wau, me ka makemake no na kakou e hoolawa iho. Lahaina, Feb. 20. J. Kanikanoe.