Ka Hae Hawaii, Volume 5, Number 48, 27 February 1861 — Weliweii» [ARTICLE]

Weliweli.

Ua hana ke alii o Dahome, ma Aferika, kahi i loaa nui ia na nika i hookauwa kuapaa ia ma Amerikahui a me na aina o Amerika Hema, i kekahi mea weliweli loa. Ua eli no ia i kekahi auwai nui, me ka manao e hoopiha ia i ke koko o kanaka, i hiki ai ia ia ke hoolana i ka waa. He mea keia, wahi ana, e hoolaulea ai i ka uhane o kona makuakane. I ka lohe hope ana, ua pepehi oia i na kanaka he 1,700, a ua manao no oia e hoomau aku i ka pepehi ana a pau na kanaka he 2,500 i ka hoomakeia. Ua hele mau no kona poe koa i ke kaua tne na lahui e pili ana me na palena o kona aina, a o ka poe i lawe pio ia, oia no ka poe i mohai aku ia. He mea mau no ma keia aina, ke make i kekahi alii nui, e pepehi i na kanaka he nui a e ninini ke koko maluna o ka luakupapau. Ua mare lehulehu na alii i na wahine, a o lakou no kekahi i pepehi ia, i mau hoa hele nona ma kela ao, wahi a lakou ; a o kekahi o kona poe aialo no hoi kekahi i pepehi ia; Ua makemake ko laila alii e hoolilo keia pepehi ana i mea kamahao loa a oi loa aku hoi o ka nui o ka poe make.