Ka Hae Hawaii, Volume 5, Number 48, 27 February 1861 — Ka Hualielu Ehiku. [ARTICLE]

Ka Huahelu Ehiku.

O ka la ehiku o ka malama ehiku, ua kauohaia i la hoano no ka poe Iudaio, a ahaaina lakou i ehiku la, a noho hoi lakou ehiku la iloko o na hale lole. O ka hiku o na la he la Sabati ia. O kela hiku keia hiku makahiki, ua kauoha ia i makahiki Sabati, oia hoi he makahiki e hoomaha ai na mea a pau ; a i ka pau ana o na makahiki ehiku ehiku hoomaka ae la ka makahiki iubeli nui. I ka hiku o ka makahiki hoi, aole i kanu ia ka aina, ua waiho wale ia, a i ka hiku o ka makahiki no hoi, ua hookuu ia na mea a pau i ko lakou aie, a ua kuu ia ka poe kauwa e hele. I ka wa mamua, aole no i kapaia mai ke keiki i ka inoa mamua o ka la ehiku mahope mai o kona hanau ana. Puka mua mai no na niho o ke keiki i ka malama ehiku o kona ola, a i ka hiku o na makahiki, haule na niho mue a puka mai na niho hou, a aia a pakolu na hiku makahiki, ua lilo no i kanaka oo, a aia a i paumi na hiku (70) o na makahiki, oia ka palena o ka loihi o ke ola, e like me ka mea i olelo ia mai ai e ke kaula o ke Akua iloko o ka Baibala.