Ka Hoku o Hawaii, Volume XII, Number 6, 11 July 1918 — UA HUA MAI KA HANA HOOMAKAULII [ARTICLE]

UA HUA MAI KA HANA HOOMAKAULII

Ke hoolaha aku nei makou i keia leka i haawi lokomaikai ia mai ia makou e ka Lunahoomale o ka Papa Lunakiai o ke Kalana o Hawaii, a e hoike ana hoi i ka hua mai o ka "olelo a'o maikai" i kamailio ia ma kela halawai i malama ia ma ka Hale Kaawai o Hilo, he manawa loihi loa i hala aku nei, a o ka mea i'o no i hooko aku e malama i na wahi hua o ka hana, ua loaa i'o no ka pomaikai. Ua hoike ia mai ia makou e ka Lunahoomalu ua kauoha aku oia i ka Lunaalanui o Hamakua, e haawi aku i ka hana e pono ai keia Hawaii i noi mai la i ke kokua ma ka hana.

Ke haawi nei makou i ka mahalo nui i kela Hawaii i malama i ka olelo a'o maikai, a mahalo pu no hoi i ka Lunahoomalu Kauhane o ka Papa Lunakiai no ka pahola hou ana aku i ka lima kokua hooikaika i ka Oiwi Hawaii e hoao ana e hoonee imua i kona kulana hookuonoono maluna o kona aina oiwi. L. H. Kalopa, Homestead Lot 367 Paauhau Hamakua, June 22, 1918. Samuel K. Kauhane, Chairman, Hilo, Hawaii. Aloha oe. —E oluolu e lawe aku i ko'u hoomaikai mai ka papaku ae o kou puuwai, ma o kau hana ku i ke aloha hoakanaka, i hoike no ia hana aloha au. Owau kekahi o na lima hana alanui o ke Kalana ma ke Kulanakauhale Moiwahine o Hilo i apo aku i kau mau a'o ana a i hoopaa pu aku imua ou e hooko i ka manao nui o ka halawai i ma-

lama ia ma ka Hale Kaawai iloko o ka mahina o November A. D. 1916 oia ka hoahu ana i wahi waihona i wahi e loaa ai o na aina, a ku na wawae a ua hooko i'o no au pela mamuli oia hoahu ana, ua loaa kahi kenikeni e uku mua ai i ka aina, a ke ku nei kahi pupupu hale me ka hoopaa ole i kona aina malalo o na aelike. Ua ulu na wahi lau uala a me na wahi opuupuu huli ai, a ua aneane no hoi e pau ka'u ko i ka hoomaemae, hookahi a'u noi i koe i kou hanohano ke loaa hoi ke aloha ia e oe, oia keia i wahi hana alanui ma Hamakua nei, ua lawe aku nei na hoolilo o ka aina a me kahi hale a ua ku olohelohe. E oluolu hoi oe e hoouna mai i mau wahi huaolelo hoolana i ko nei Lunaalanui nui, i loaa hoi ka'u wahi kamaaina e hoi aku ai me ia i na noi ua ku keia noi i ke ano hookano, e oluolu e huikala mai ia'u no hoi a i ia oe, komo i ke ie opala eia nae me ka lana o ko'u manao e loaa mai ana kau pane. Me kealoha, a na ke Akua no auanei e paepae i kou mau kapuai ma ke ala o ka holomua o kau lawelawe oihana ana i ka pono kaulike o ka lehulehu. Ke hooki nei me ka lana o ko'u manao. Me ka haahaa GABRIEL HEAUKULANI