Ka Hoku o Hawaii, Volume XXII, Number 11, 7 August 1928 — HE MARE HANOHANO MA PIIHONUA [ARTICLE]

HE MARE HANOHANO MA PIIHONUA

Ma ke kihapai nani o “Moani Ke Ala” a malalo hoi o ka malumalu o na kumulaau ma ka home o na makua o ka wahine opio ma Piihonua, a imua hou o kekahi anaina nui o na hoaaloha me ka ohana. ua hoohui ia ma ka berita maemae oka mare o Miss Lei Rebecca Henderson o Hilo nei me Hardy Conrad Hutchinson o ka Mokuaina o Kaleponi, ai hoohui ia hoi laua ma ka berita maemae o ka mare e Rev.S. L. Desha Sr. ke Kahu o ka Ekalesia o Haili. I ka hoao ana i ka hora 3:30 PM o ka auinala Poaha, ua hai ai mai la. ka kane i ukali ia e kona mau ku aoao ma ka aoao makai mai o kela kihapai, a ma ka aoao mai hoi ma uka ka wahine mare e kuikui hele ana me kona makuakane James Henderson, ai waena hoi o na leo himeni o ka puali himeni o na wahine opio i alakai ia e Mrs. Helen Desha Beamer a i kokua pu ia mai hoi e ke kalaha himeni a Kualii ua hui ae la na paa mare ma kekahi wahi kiekie o kela kihapai, ai haliilii ia hoi kela wahine na lau uliuli o ka amaumau, ai uhi ia hoi me kekahi moena Hawaii. Ma ia wahi ohuku o kela kihapai nani o “Moani Ke Ala” a imua hoi o na haneri o na hoaaloha me na ohana o na paa mare opio, ua lawelawe ia ka hana o ka Oihana Mare me ka eehia maoli, ae hoolilo ana i keia mau opio i hookahi iloko o ke apo o ka Materemonia o ka Mare Hemolelo. I ka pau ana oka lawelawe ia ana o ka oihana mare maluna o laua, a ma kekahi pakaukau koa e ku kokoke e ana ma ia wahi, a imua hoi o kela mau haneri o na makamaka ua kakau inoa iho la laua i ko laua palapala mare ame na hoike o ka mare ia ana, ai ka pau ana oia mau hana pili i ka oihana mare, ua hoi hou ae la laua maluna o kela Moena Hawaii, a oia ka manawa o na ohana me na hoaaloha lehulehu i kai mai ai e haawi ika lakou mau “ Hoomaikai ana i na Paa Mare Opio.” I ka pau ana o kela ike ma ia wahi, ua hoi aku la ke anaina me na paa malalo o kekahi halelole nui i hoomakaukau mua ia mahope aku o ka home noho o na makua, a malaila i inu ia ai ke ola o na “Paa Mare Opio” e kela lehulehu. Ua malama pu ia he paina o na mea ai mama, a mahope iho o kela i haalele mai ai na ''Paa Mare Opio" no ka hoohaia ana i na la mua o ka "Mahina Meli” ma ka Hotele o ka Lua o Pele, ai hele aku ai laua mawaena o na kipehi pua ana, ame ka lu ia o na laiki maluna o laua. O kekahi paha keia o na Mare Hanohano maoli i ike ia ma Hilo nei, ai mare ia hou iwaena o ka ulu wehi o na laau me na pua o ke Kihapai o “Moani Ke Ala,” ai waena hoi o na leo himeni anoano o ka puali himeni o na wahine opio. E hahai ia ko laua mau la o ka noho mare ana iloko o ka hauoli, ae hoolaupai ia mai hoi laua ma na mea e hoohauoli ai i ko laua la o ka noho mare ana. “ALOHA NUI MR. me MRS. HARDY C, HUTCHINSON.” Ma keia puka hou ana aku o ka Hoku e hoea aku ai ka “Moolelo Hawaii" o ka noho ana o keia la — hui kanaka i ka manawa kahiko loa ame ka manao hoi o ka poe kahiko no kahi i hoea mai ai keia lahui kanaka. He Moolelo Hoonaauao mai i ka poe opio hou o ka Hanauna hou o Hawaii nei.