Ka Hoku o Hawaii, Volume XXIV, Number 26, 30 December 1930 — UA HALA O DAVID MAO LONOHIWA [ARTICLE]

UA HALA O DAVID MAO LONOHIWA

Ma ka hora 11 o ka la Karikimaka nei, ua pauaho mai la o David Mao Lonohiwa i keia ola ana ma ka Home o kona Kaikuahine Mrs Rosebel|a Johonson ma Villa Franca Hilo Town, a i ke 50 hoi o kona mau makahiki o ke o'o ana. Ua hanau ia oia ma Paauhau, Hamakua, a ua hoonaauao mua ia iloko o na Kula Apana o kona wahi hanau, a ua hoouna ia aku i ke Kula o Lahainaluna, a mai kela Kula aku i hele loa ai no ke Kula Kamehameha, a i kona puka ana mai, ua lawelawe oia i ka oihana Kumukula ma Kukuihaele, Kapulena ma ka apana o Hamakua no aneane 17 makahiki, a mamuli o ke ano nawaliwali ua waiho aku oia i ka hana Kumukula, a hoi mai la no Hilo nei, a noho pu me kona kaikuahine, a lawelawe i ka hana helu eke kopaa no ka Hui Mokuahi o Matsona, a no ka Hui Kaani nei i kekahi mau manawa i hala aku nei. Mamuli o ka nui loa ana mai o ka pilikia ma kona puuwai, ua hoihoi ia oia ma ka Halemai o Hilo nei, a hiki wale i kona hoihoi ia ana mai i ka Home noho o kona kaikuahine, a ma ia home i pauaho mai oia i keia ola ana. Ua malama ia ae kona anaina hoomana hope e kona Hui i komo ai, ia hoi ka Hui Kamehameha Mamalahoa o Hilo nei, a na ke Kahu o Haili i malama hope ae i kona anaina hoomana hope loa, a lawe ia aku la oia a kanu ia ma ka Ilina o Haili Kulamanu ma kahi kanu o na Lala o ka Hui Kamehameha, a ua ukali aku la kona mau Hoa o ka hui mahope o kona huakai hoolewa, a hooko ia aku la na hana hope ma mua o kona kino kupapau e kona mau Hoahanau o ka Hui Kamehameha. Me kona mau Kaikuahine ame kana mau keikamahine ame kona ohana ko makou mau manao aloha. Ua hoomaha iloko o ka maha mauloa.