Kuu Hae Hawaii, Volume I, Number 1, 19 April 1913 — Page 12

12  KUU HAE HAWAII

He Kuai Hoemi a Hoopau

O na waiwai Tini, Piula, Kepau, Keleawe, na mea pili no ka ai ana ame Halekuke, e loaa no ma kahi o
LIN SING KEE
1mo.   1044 Alanui Nuuanu.

kona hoa i ka hookokoke mai o na keonimana imua o laua, ua wehe ae la ua mau kanaka nei i ko laua mau papale, pela no hoi ko laua mau hoa malihini, me ka hoopuka oleia he hookahi huaolelo mawaena o lakou, alaila hui ae la o Konela Moriki me ka barona, me ka hele ana aku e nana pono i kahi o ke kahua hakaka e uleleia aku ai e na enemi i hoalaia na manao inaina, mamuli o ka wahine hookahi.
                Mahope iho o ke kukakuka ana o ua mau kanaka nei i ka laua mea e hana aku ai, ua haawi mai la ke konela i ka pahu o na pupanapana i ka barona e paa ai, alaila homaka aku la ua konele nei e ana i ka mamao o kekahi e ku ai mai kekahi mai, me ka hookau ana iho i kekahi maka, i maopopo ai i kela ame keia o na moho ko laua mau wahi pakahi.
                I ka pau ana o kela apana hana, o ka manawa ia i mahele ae ai laua i na pu panapana, alaila lawe mai la imua o na kanaka e paio aku ana ia kakahiaka. Ua laweia aku la ke duke ame ke kauna ma ko laua mau wahi, e moe ana i ka akau ame ka hema, alaila ku mai la ko laua mau kokua ma ke komohana ame ka hikina, ma ke ano ke nana aku, aia lakou ke ku la ma kekahi kuea.
                Ke haka pono la ka nana ana a ke duke, a oiai e kakali ana o ka manawa e hoohanaia aku ai ko laua akamai ki pu, o ka wa ia i poha mai ai ka leo kahea o Konela Horiki i ka pane ana mai:
                "Ua makaukau anei olua e na keonimana?"
                "Ua makaukau maua," i pane like aku ai ua mau kanaka nei.
                "Akahi—alua—akolu—ki!" i poha mai ai ka leo kauoha o ka barona, a he olapa ana o ka uwila mai ka waha mai o na pu panapana, o ka manawa no ia i hina iho ai o Kauna Waladema ilalo; me ka holo koke ana mai o kona hope e nana, aia hoi ke duke ke ku malie mai la me ka neeu ole, alaila hele pu mai la oia me kona mau hoa, no ka nana ana i ke kino o ke kauna e waiho oni ole ana.
                Kahea kokeia aku la ke kauka iluna o ke kaa e hele mai, a mamua nae o kona hoea ana mai no kahi o ke kauna e waiho ana, ke ku la ke duke me na maka kaumaha, me he mea la ua kau aku na ahewa iloko o kona lunaikehala no kana mea i hana aku ai maluna o kela kanaka, oiai nae he kanawai kela i palapala ia o ka make ana o kekahi mea ma ka hakaka kiki pu, he mea ia i pili i ke kulana hanohano o ke ola ana o kekahi kanaka.
                Ia hiki ana mai o ke kauka, me kana paiki o kana mau lako hana, me na welu no ka wa-hi ana i na wahi i eha, ua waiho iho la oia i ua mau lako la ilalo, alaila noke iho la i ka nana i ke kino e waiho oni ole ana, a o ia kana o ka pane ana ae, mahope iho o ka hala ana o kekahi mu minute: "Ua loaa pono ka puuwai o ke kauna i ka poka aole loa he wahi manaolana no ke ola i koe iloko o kona kino!"
                I ka lohe ana o ke Duke o Hawada i kela pane mai ke kauka aku, ua piha loa oia me ka ehaeha. Aole loa oia i ike i ke ko'iko'i o ka mea ana i hana aku ai a hiki i kela manawa, no ka mea he hana hiki ke huikalaia kana mau hewa liilii i hana ai, aka o ka hawahawa ana o kona lima, me ke koko hala ole o ke kanaka e waiho ae ana imua o kona alo, ua oi aku ia mamua o ka hiki iaia ke hoomanawanui, ame na maka kunahihi, ua pane mai la oia:
                "Aole anei he mea hiki ke hana aku no ka hoopakele ana ae i ke ola iloko o kona kino?" wahi a ua duke nei, aole no kona manaolana e hiki ana ke ola, aka no kona weliweli loa i na ahewa e kau mai ana maluna ona.
                "Aohe mea hiki ke hana aku i keia manawa, ua hala ke ola. Pehea ka nui o ka ike ame ke akamai o kekahi kauka, aole loa e hiki iaia ke hoola i ka mea i make, koe wale no paha ke Akua!" wahi a ke kauka me ke kaumaha.
(Aole i pau)

(Mai ka Aoao 5 Mai)

o Kalakona me ka pioo o kona manao.
                "Ua hiki loa ia'u ke hoike aku ia oe i ke kumu nui o keia hoea ana maila o maua iloko o ka wa pokole loa," wahi a'u i pane aku ai iaia. "I hele mai nei au no ke koi ana aku ia oe no kou hoihoi ana mai i kuu keiki me a'u nei."
                "Aole i maopopo ia'u kau mea e olelo mai nei," i pane mai ai o Kalakona me ka hele ana o kona helehelena i hele ae ai a haikea.
                "Ua maopopo ia oe ka'u mea e kamailio nei e Kalakoa, wahi a'u i pane aku ai, "a ua ike oe i ka oiaio o  ka'u mau olelo i hoopuka aku nei i ko'u wa i koi aku nei i kuu keiki ke keiki hoi a maua o Likeke Poleka."
                I kela wa no i huli ae ai au me ka manao e puili mai i kuu lei aloha eia nae ua ike iho la au ua noho oia maluna o kekahi noho me ka hele o kona helehelena a kunahihi me ka haalulu pu ana hoi o kona kino holookoa.
                "Ua makemake au e hoike mai oe ia'u i na hooiaio apau loa no kau mau mea i olelo mai nei," wahi a Kalekona i pane mai ai imua o'u.
(Aole i pau)

I. HOKAMURA

He mea hoomaemae i na lole kahiko a pahonohono no hoi.
Alanui Liliha, kokoke me Moi
3mos.

Makemake anei oe i Pa, Pohaku He no na ilina, a i ole i Pahu Hao paha?
E hele mai e ike ia
J. C. AXTELL

1048 Alanui Alakea.
3 mos.

"E ike ia kaua hoa kanaka."
Owau no o
SAMUEL K. KAMAIOPILI

Notari no ka lehulehu, Agena Haawi Laikini Mare, he mea Imi no na Pepa Aina, a he Mea Ohi i na Aie.
Tel. 1211, Keena Aina, Hale Manahooko.
6mos.

SUNRISE CLEANING SHOP

Helu 741, Alanui Moi, kokoke i ka Luakini o Kaumakapili.
Maanei ka hoomaemae ana o na lola kahiko, a pahonohonoia a aianaia.
E hanaia no me ka maiau loa au e hoohalahala ole ai.
1mos.