Ka Hoku o ka Pakipika, Volume I, Number 6, 31 October 1861 — Untitled [ARTICLE]

E ka Hoku o ka Pakipika :—Aloha oe :

Eia mai kahi kanikau aloha ia oe no kou puka ana mai iloko o keia hapa o ka makahiki, nolaila, ke kuili nei makou ia oe i neia mau la me he ipo la, ke kaena nei makou i kau kino imua o ka lehulehu, no kou lanakila a me kou ahonui. Eia ua wahi kanikau la malalo iho. He mele no ka Pakipika. Kau ana la e kau ana. Kau ana ka hoku Pakipika i kuu maka, Mele mea la e i mai ana iaʻu e naue aku, Mahea la hoi au e hiki aku ai, I ke kapaepae Aluaka, I ke kekee o ka nalu o Makaiwa, He Iwa kau lehua oe no ka laau paa, E imi ae ana i kahi e hemo ai, Hemo ka pili hooko i ka makemake O kuu makemake nui pau ole i ka Pakipika, E lawe ia ala e ke Kalepa, Haaheo i ke kai o Mesiso Kikoo i ke kai o Papiue, Pania? ia mai e Bosetona, A he Kona ka makani o ka aina, Ua pa kupono ia oe ua aina, Mai ka hikina a ke komohana, Ka Hoku Pakipika aloha oe, E kali kou manao a hala o Welehu, Ka malama ino ia o ke kau, Kaua no kai ike i ka nani o na aina, I ka ulu wehiwehi o ka nahele, Ua hele hui au a wela i ko aloha, Mehe ao naulu la e kau nei, Kau aku ka manao a hiki mai no oe, A hiki mai no oe e pili kaua i ua puahau E pili no kaua i na la maka puniuniu ai ole, A hoomaona aku kaua i ke ahe a ka makani, O ka makani Kauaula no kaʻu aloha, Ke nu maila la i ke kuahiwa, E wiki mai oe e ka Hoku o ka pakipika, A loaa mai au i Kaumakapili nei, E hoekepue ana i ka lai malu Inia, Hu hu-hui aloha olioli kaua, A nui mai no ko aloha e uwe no au, Uwe honehone i ka lau kukui, E kui no au a paa ko aloha, Aloha polinahe oe ka Hoku o ka Pakipika, Ka ohe nana i Pakiliona ia ka ike ma keia ao, I hulali memelu lua i ke kanana o Lihue, I miki wela i ka ili o ka lehulehu, Ahi loko huila i ka makemake ia oe la–e, O oe ka mea moe ole o kuu po e noho ia nei, O oe ka kalipoa aala o Pakua, Ka wai lele maopu o Kolumebia, Ka uwahi nokenoke o Pelekane, Kaliponia alalalaueno me ua hoa nei, Aloha no hoi oe ka Hoku Pakipika, Na'u na LUKA. Kaumakapili, Honolulu, Oct. 24, 1861.