Ka Hoku o ka Pakipika, Volume I, Number 6, 31 October 1861 — Hoku o ka Pakipika. He kanikau aloha no ka uhane o ke kanaka. [ARTICLE]

Hoku o ka Pakipika.

He kanikau aloha no ka uhane o ke kanaka.

Ua kakau ia keia Kanikau e Maewa, kekahi haumana o ke Kulanui o Lahainaluna, i ka manawa o L. Analu ke kumu mua. Oia hoi paha ka puka ekolu ana o na haumana o Lahainaluna. Aole paha hoi keia e lilo ana i mea hoohilahila i na keiki kupa o ka aina, no ke kau ana i keia Kanikau. "Aloha ka uhane, Ka hoa pili o ke kino, I pili ia ka ua me ka la, A o ke anuanu me ke koekoe, Aloha kuu hoa ohumu o kahi mehameha, Hoa hoolaukanaka o kahi kanaka ole, Aole hoi na okuu hoa i ka ua lani polua, Hoa ae ale o na kai ewalu, A me na makani eha, Kuu hoa o ka moana kalawalawa, A me ka la makaponiuniu, pololi ai ole, He pokakaa ka la e nohoa nei, A hala na makahiki eha, Malaila no ka halialia aloha ana mai, e aloha, Aloha oe o haalele nei ia makou, A hoi aku i ke Akua, E like me na mea e imi ana i ke kumu, Ua nui ke ahi i kona kumu o ka la, A o ka wai hoi i kona kumu o ke kai, Pela no ka uhane i kona kumu o ke Akua, Aia i ka la e kani mai ai ka pu leo lea, Ka pu hoala hiamoe, Alaila, ala mai ka honua, E puunaue i kana mea i ale ai, Ala ka ia nui huhu hala ole o ka moana, E hoike i kana mea i nahu wale ai, Nolaila la, elua wahi e noho ai o ko ke ao nei. A i luna, i luna, I ke ao eleele la, o luna lilo aku, A i lalo, i lalo, I o Milu la la, o lalo lilo aku, Alaila, pau na wahi e noho ai o ko ke ao nei, Auhea oukou e oʻu makamaka me oʻu hoalauna. E ka pili kaikaina, me ka pili kaikuaano, E ike ia kakou hookanaka. O kipa hewa ke aloha i ka ilio, No ka mea, he Ilio no ka hewa, E nahu ana e aki ana i ka pono me ka maikai. Ua hakihaki ia ka ulili, ka laau keakea, Ma waena konu o na laau nui he umi, Ua pokopoko liilii loa i ko ke ao nei, Aole loa e pakele ka uhane lawe hala, Ke uku aku i na dala he kana wahi mili-ona, Aole hoi i ka puaa kea i halala ka niho, Aole hoi ina wao iho ole pau lua, Aole hoi i ka lako o ke kanaka waiwai Aole loa e pakele ka uhane lawehala, he uku aku i kekahi o keia mau mea, Ina ua haule kekahi mau lalani, a o kekeahi mau hoa paha, ma keia kakau ana, e hiki no i kekahi ke kakau hou mai i kahi i koe. W. N. PUALWEA. Kaliulalo Honolulu Oct 19. 1861.