Ka Hoku o ka Pakipika, Volume I, Number 22, 20 February 1862 — Hoku o ka Pakipika. He Kanikau no Ioseba Nawai. [ARTICLE]

Hoku o ka Pakipika.

He Kanikau no Ioseba Nawai.

Ioseba Nawai aloha, Kun kane mai ka ua nihipali ma Moelana e, Lana mai ka manao i paia e ke aloha e, Kou aloha pau ole la, Kuu kane i ka paia ala i ka hala e, Hele ka uhane i ke ala hoi ole mai e, Hoi ka uhane i ka makua la, Ka mea nana i hana e, Pau ka pili ana a kaua la, Aloha ke kane kuu hoa pupuu ana e, Kuu hoa ohumu o ka pono o ke Akua la I pili ia e kaua ka la e me ke koekoe hoi la, Koekoe ka po ua hele oe la, Ka hoa pili o ke kino e, Kuu kane mai ka ua Kiowao e, Mai ka ua poai hala o Kahaluu e, Mai ke koa mokumoku o Heeia la, Kuukane mai ke kula o Heleloa e, Hele ke kane hoi ole mai la, Noho no wau uu i ko aloha e, O ke aloha ka ukana a loko e hana nei la, Mahea la oe i nalo iho nei e, Au wale ana au o kahi e iki ai e, Auwe! auwe!! auwe!!! Kuu kane e. NOHOLOA. Kuu kane mai ke kahuwai o Puuaawahakea Mai ka malu hale ke noho la, Kuu kane mai ka po loloa o ka hooilo, Kuu kane mai ka mahi inia la, Me he pali la ke aloha o ke kane la, Ke kukilakila i kuu manawa e, Ua piha a hanini mahui lana loko e, Kuu kane o kahi mehameha e, O ka po anoano kanaka ole e, Aloha oe i hele aku nei la, Kuu kane mai ka ai haaheo o ka aina e, Mai ka ni mili lima o ke Kaona la, I paia mai e ka makani he aoaoa e, Kuu kane mai ka makani anu he Waikoloa Aloha kuu kane i ka makani he moae e, Mai ka makani kulai kanaka o Nuuanu la, Auwe! auwe!! auwe!!! Ka mea aloha o ke kane a, HAKAU. Kuu kane mai ka makani malualua e, Mai ka ua hehi mai i ke pili la, Halawai me ka uhane kaikaina e, O aʻu kane makuaole a, O ke kane ka hoi ka mea aloha e, Kuu kane mai ka makani o Lanihuli e, Huli ae nei au aole oe, Mahea la oe i nalo iho nei e, Auwe! auwe!! auwe!!! Ka mea aloha o ke kane e. NAKANEELUA. Auwe kuu makuakane e, Mai ka ua apuakea o Mololani e, Mai ka ua liolio i ka moana la, Ke hehi mai la i ka ili o ke kai e, Hoolei ae la iuka o Ahuimanu e, Ua manu ka uhane ua kino-wailua la, Elua mea a loko e hana nei la, O ka manao me ke aloha e, [la, Kuu makuakane mai ka wai hoaiai i na pali Mai ka makani wehe kapa o KaholoakeahoMai ke kawelu o Lanihuli la, [le e, Huli ae nei makou aole oe e, O oe ka uhane i ka liko o ka lehua e, I walea ka uhane i ke kui pua kamakahala e, Ua hele ka uhane me ke Akua e, Kuu makuakane aloha e, Mai ka hehi mai iluna o ka hala e, Hala ku makua ka mea aloha e, Auwe kuu makuakane a, Kuu makuakane mai ka wai o Waipuhia la, Ke hoihoi ia ala e ka makani la, Kuu makuakane e! o ke awa lau o Puuloa e, Mai ka ia hamau leo la, Auwe! auwe!! auwe!!! MRS. HARATA KAMOAKEAWE. Puuaawahakea, Kaneohe, Feb. 4, 1862.