Ka Hoku o ka Pakipika, Volume I, Number 27, 27 March 1862 — He keu o ka Apiki. [ARTICLE]

He keu o ka Apiki.

Ke noho nei ma Waikiki waena kekahi kanaka apiki o Napahi kona inoa. Penei. I ka makahiki 1858, hoonoho aku la ua Napahi nei i kana kaikamihine ia Kahuakainui, a me Lono kana kane, na laua e hooponopono ka aina o ua Napahi nei, ina i make ua Napahi nei, lilo ia Kahuakainui ka hooilina. Nolaila, nui ko laua lilo i na mea a pau e pono ai o Napahi a me ka aina, hookahi makahiki a me ka hapa ko laua hooponopono ana, lawe hou mai no ua Napahi nei me ka hewa ole o Kahuakainui ma. Nui ke poho o keia mau mea. I ka malama o Iune o ka makahiki 1861, nui na pilikia o ua Napahi nei, no ka hoopii a Lono no ko laua poho, no ka hoopii a Kupaliilii haole, no ke kuai apiki ana ia ia i ka aina o hai, no ka hoopii ana a ua Napahi nei, no ke poho o ka waiwai o ka Moi i waiho ia ma ka lima o Uwepa, a na ua Napahi nei i hooponopono. Hele aku la oia, a olelo aku la i kana hanai alii ia C. Kapaakea e kokua i kona mau pilikia, a hooili aku la i kona aina i kana hanai alii. Ae mai la kana alii, a olelo aku la i ua Napahi nei a me kana wahine. Ina he oiaio ko olua hooili ana mai nei ia'u i ko olua aina, eia ka pono, e hana olua e like me ke kanawai. Ae mai la laua, a hoolimalima ia o J. Nailiili e kakau i ka palapala hoolilo aina ia C. Kapaakea, a kakau laua i ko laua mau inoa, a hooia ia ia ma ka puke Aupuni, i ka la 28 o Augate, o keia makahiki i hala iho nei. A i ka malama iho nei o Feberuari, hele hou aku la ua Napahi nei, a haawi hou ia M. Kekuanaoa i ua aina nei i lilo mua ia C. Kapaakea. I ko'u manao, kupanaha maoli ka hana a keia Napahi. Aka, ua nele nae ia i ka aina ole, ua lilo loa ka aina ia C. Kapaakea, ka mea i hana naauao e like me ke kanawai, a nele iho la ua Napahi nei, a ku iho i na pa ohoma. E na makamaka e, e nana mai kakou i ka hana kolohe a keia kanaka, mai hana kakou penei, ka lauwili i o a ia nei, me ka hana kekee i ko kakou mau aoao iho. NA IKEMAKA. Ua ae ia o W. C. Kaukuna o Kealakekua i Luna no ka poe lawe i ka Hoku o ka Pakipika, ma Kona Hema, ma ko laua inoa me J. W. Kupakee, e hooiliia aku ai na ope Nupepa. Ma Farani, i kela makahiki keia makahiki, ua ohiia he 2,250,000 pauna o na lau pua, a ua kuai aku ia no na dala he $1,250,00.