Ka Hoku o ka Pakipika, Volume II, Number 6, 20 November 1862 — Hoku o ka Pakipika. NO IOLANI KAMAKA O IOULI KAMEHAMEHA VI. [ARTICLE]

Hoku o ka Pakipika.

NO IOLANI KAMAKA O IOULI KAMEHAMEHA VI.

Kalaninui kua liholiho i ke kapu he inoa, He kua kapu oe no Meawahine o Maliko, Kupu ae la ke ao makani o Kalua, Kupu ae la e ke ao nei ke lii nona ia kue–e, Noho io lele ka ua Makaupili, He ua makaupili noho i na uka, Noho no i na uka o Kanaha, Nahaha ke kiowai a Kamalua, I wawahia e ka hoolua a wali, A wali e nopu i ka ua Paliloa, Loa ka ua Nahua hoi i na pali, Noho koke no i ka uka o Kahananui–e, Ua i–I aku la oe ia ia nei–e. Akahi hoi au wahahee i ike, Alua akolu aku i kaalapahi, Aha aku no hoi pau kauna–e, Ua i–I aku la oe ia ia nei–e, Noho i Lilikoi ka ua ulalena, He ua ulalena no Pipiiholo, Holo ka huna o ka ua ku i Kokomo, E hai poolelo ana me Alelele, I hai aku i ke ano o Waiouli, I lohe mai ke kini o Kuanaulu, Me ka poe o makou i Kamaole, E hiki aku ai a Hopukoa–e, Ua i–I aku la oe ia ia nei–e, He koa-koa ia nei no ka lima nui, He hopuhopu nana nae no ka luahi, O ka ike aku no a makou–e, Ua i–I aku la oe ia ia nei–e, Ua i–I aku la oe ia ia nei–e. K. WAHINEALOHA. Kalaninui kua liholiho i ke kapu he inoa, He kua kapu oe no Hikawainui, Nona ke kua hoanoano kapu nona ia kua, Huki na maka o Kalalea alo i Nounou, Hoopaewa i ka pua hala o Luia, Hauwawa i ka nahele o Pelehuna, Paa ka heke makani o Malamalamaiki Huai puka nui ki wai o Wailua, Olo heke ae la ka luna o Kalanipuu, Hamoa iho la luna o Aahoaka, Pau ae la na kihi pea o Haupu, Holo olohe i ka laula o Kapaa–e, Ua i–I aku la oe ia ia nei–e, Pupue ka hanu i ke one o Nohili, He one hoailuna ia na ka malihini, Hala loa ae la makai o Polihale–e, Ua i–I aku la oe ia ia nei–e, O Limanui ka'u aloha ua kuia, Ua kuhi aku la ka lihi i Maunahina, Newa au ae la i Kawaikini, Ukupe aku la ha i Koianana, Ina maka kokoe o Kohelekua, Ua hai aku na eu i Alakai, Paa aku la i ka paiki a ka lena mua, He ai waiwai kekahi maikai na ka hopu lepa, Ua i–I aku oe ia ia nei–e, He alapahi ka puhipuhi na ke aloha, Ua make aku la oe ia waihui wailele, Wai hau wai o Laielohelohe, I ka pule kahui a Kuioiomoa–e, Ua i–I aku la oe ia ia nei–e, Ua i–I aku la oe ia ia nei–e, KALANIMOKU W. PAALUA BENNETT. Kalaninui kua liholiho i ke kapu he inoa, He kua kapu oe no kalani kau hookahi aohe lua, He lua ole ka lani o Makuhikaaala, O ke kuohomoe a hua ka lani noa ia kua–e, Kahiko Haene i ka ua Nahua, Ke ua mai la iuka o Honokowai, Iuka no ka ua hoonani ai, O ka omaka ia e iho nei i kai, Halawai i kai o ka wai lua, Mai hoalua aku oe i ka moe, E hooko mai ka pono i hookahi, Ma ka lohe mua i haina aku ai–, Ua i–I aku la oe ia ia nei–e, O ka manao no ia e hooko mai, O ka hi-a a ua hooko ia mamua, Ua kudala ia a pau ka waiwai–e, Ua i–I aku la oe ia ia nei–e, Kau ke kilohana a ka la i Mana, Paa ke kuina kapa a Kalaulaolao, E kaa ana ka huila i Makaliua, E pauma ana i Kaawaipaki, I ike mai ke kini i Kahakahalani, Ua kaha ka maka nana i ka lehua, E haule ana i ka pali o Kaukini, O ko kini aku no ia o ka manao–e, Ua i–I aku la oe ia ia nei–e, He wahi manao kahiko no ka kou, Ua kala ia ka hewa a pau imua, Mai hoi hou aku oe i ua wahi la–e, Ua i–I aku la oe ia ia nei–e, Ua i–I aku la oe ia ia nei–e, CH. KANAINA. Kalaninui kua Liholiho i ke kapu he inoa, He kua kapu oe no ke Kukaiaoa Mahuenalani, A Kauhini ai pala kehau ka lani, Ko makuahine nona ia kua–e, Nani ka po maka ala o Kanoenoe, I ka hia-a no a malamalama, He mea iki wale no ka po i ka ala ia, Ala ae Kalena hoolana a ninau, Owai na walaau o ke aumoe, O Lihue laua me Pulee, Heaha la ka laua mea i ala ai, Anoa anoai he manao no Kawaiopua–e, Ua i–I aku la oe ia ia nei–e, Oia nei no ia e noho iho ana, He mea hoi kau a ike wale iho, O na hoalauna no na hoa–e, Ua i–I aku la oe ia ia nei–e, Alii kahea pea ka hau i ka laau, Ke opu la iuka o Malamanui, Ka opua kea i ka mauna o Kaala, Alina ka hui alina i ka makani, He malaialena ulu ma ke Kioao, Me he muhee lehua la ka laau, Pau–u ka ihu o Ewa i ka makani, Kani ka ole iluna o ka laau–e, Ua i–I aku la oe ia ia nei–e, Hoolaau ana ke aloha ia'u, Hahi hele i ka maka me he alanui la, Helelei kana ukana a ka waimaka–e, Ua i–I aku la oe ia ia nei–e, Ua i–I aku la oe ia ia nei–e, KEKAULUOHI.