Ka Hoku o ka Pakipika, Volume II, Number 7, 27 November 1862 — He muhee he ia hololua. [ARTICLE]

He muhee he ia hololua.

E ka Hoku Pakipika e:—Aloha oe. O oe ka ipu kukukui aa pio ole i ke Kauaula. He wahi manao no hoi ko'u e kau leo aku ia oe, a nau ia e alawa ino mao a maanei o keia mau Mokupuni, mai Hawaii a Niihau, i kela wahi kumu manao e kakake wai a kauna ae la maluna, e hai ana i kona inoa, " He muhee, he ia hololua," a penei no ia. Eia ma Kaohewai, Kamoiliili, Waikikiwaena kekahi wahine kahi i noho ai, o Kalemu kona inoa. Ua hoolimalima oia me Kumuhea i kekahi mau loi nui ekolu dala, a elua loi uuku iho, pakahi na dala, i ka hui ana elima dala no ka makahiki hookahi. He mau mahine ae nei, ka lilo ana o ua mau loi nei ia Kumuhea, me ka hana ia o kekahi mau loi a maikai, me ke kanu ia i ka huli, a koe hookahi wahi loi uuku i koe, me ka manao e hana aku a paa pono, alaila, nana aku o na dala elima o ka makahiki, eia ka auanei, ua hoolimalima e aku me kahi kanaka e aku, a nele iho la o Kumuhea, ka mea i hoolimalima mamua, a lilo aku la i ke kanaka hou. Ke manao nei ka mea nana i hoolimalima mamua, he hoolimalima paewaewa o Kalemu. J. W. K. L.