Ko Hawaii Pae Aina, Volume I, Number 24, 15 June 1878 — KA LA O KAMEHAMEHA. [ARTICLE]

KA LA O KAMEHAMEHA.

Ua malama lokahi ia keia la kulaia aupuni no ko kakou hoomanao paulehia ana i ka Na-i Aupuni Kaulana, ka mea nona na iwi e waiho mai nei iloko o ka honua. Ma Honolulu nei, ua hoolilo nui ia keia la, i la heihei lio, ahaaina, holoholo kaa a holoholo lio. O kahi i oi loa aku o na kanaka i hoakoakoa ae ai ia lakou, oia no ke Kuea o Kapiolani. A ua kohoia, aole no e emi ka nui o ka poe i akoakoa ae malalo o ka 4,000. KA HOOMAKA ANA O NA LEALEA. Mahope iho o ka hora 10, ua hoomaka ia na lealea o ka la, e like me ia i hoike ia malalo iho: 1 Ke Pa a Kamehameha—$200 makana. Eo i ka lio o Mr. Agnew, he ekolu holo ana. Manawa : 2:59, 2:53 3/4, 2:55. Elua wale no mea heihei. 2 Eke a ka Moi—$200 makana. Eo ia Jimmie. Manawa : 4:23, 4:37. Elima ka nui o ka poe holo. 3 Heihei Kukini—$15 makana. Eo ia Wm. Allen. Manawa holo no 200 iwilei, 18 sekona. He eha ka nui o ka poe kukini. 4 Heihei Kiauau—$100 makana. Eo i ka lio kaa o Mr. Chayter. Manawa holo, 3:37, 3:38. He elima ka nui o ka poe kaa heihei. 5 Eke a ka poe Mechanic—$200 makana. Eo i ka lio o Toma Cuminis. Manawa holo, 1:57. He eono lio i komo i keia heihei. 6 Eke Hui—$100 makana. Eo i ka lio o H. B. Hales. Manawa holo, 2:02. He ekolu lio i komo i keia heihei. 7 Heihei kukini lele pa—$15 makana. Eo ia Wm. Allen. He eha ka nui o ka poe kukini. 8 Eke a ka Moiwahine—$100 makana. Eo i ka lio o H. B. Hales, (oia ka lio i eo i o ke eke hui). Manawa holo, 2:06. Eono ka nui o na lio i holo. 9 Heihei miula—$40 makana. Eo ia Paliaitea, oia ka miula o Umauma. He eha miula i holo. 10 Eke a na kamalii—$15 makana. Eo i ka lio o H. B. Hales. Manawa holo, 2:11. He eono lio liilii i holo. 11 Eke a ka lehulehu—$20 makana. Eo i ka lio o H. B. Hales, o ke kolu ia o na eo ana i ka lio hookahi ona, o Kate Lee ka inoa. 12 Heihei lio lele pa—$80 makana. Eo ia Jimmie. He elua lio i komo. O ka pau keia o na lealea o ka la ma Kapiolani Paka. Ua hala aku ia la me ka loaa ole o na poino ulia kaumaha, koe wale no ka poe i noho alii iho ka moi alakohola maluna o lakou.